ഒഡീഷയിലെ വനിതാ ശിശുവികസന മന്ത്രിക്കും കോവിഡ്; താനുമായി സമ്പർക്കത്തിൽ വന്നവർ കോവിഡ് പരിശോധനക്ക് വിധേയമാകണമെന്ന് തുക്കുനി സാഹു

ഭുവനേശ്വർ: ഒഡീഷയിൽ വീണ്ടും മന്ത്രിക്ക് കോവിഡ് ബാധ. സംസ്ഥാന വനിതാ ശിശുവികസന, മിഷൻ ശക്തി വകുപ്പ് മന്ത്രി തുക്കുനി സാഹുവിനാണ് കോവിഡ് സ്ഥിരീകരിച്ചത്. കൊറോണ വൈറസ് സ്ഥിരീകരിക്കുന്ന ഒഡീഷയിലെ അഞ്ചാമത്തെ മന്ത്രിയാണ് തുക്കുനി സാഹു. മന്ത്രി തന്നെയാണ് ട്വീറ്റിലൂടെ ഇക്കാര്യം അറിയിച്ചിരിക്കുന്നത്. എനിക്ക് കോവിഡ് പോസിറ്റീവ് സ്ഥിരീകരിച്ചു. ഇപ്പോൾ ഹോം ഐസൊലേഷനിലാണ്. കഴിഞ്ഞ കുറച്ചു ദിവസങ്ങൾക്കുള്ളിൽ ഞാനുമായി ഇടപഴകിയവർ പരിശോധനയ്ക്ക് വിധേയരാകണമെന്ന് അഭ്യർത്ഥിക്കുന്നു. സാഹു ട്വീറ്റിൽ കുറിച്ചു.

ജ്യോതിപ്രകാശ് പാണി​ഗ്രഹി, സുശാന്ത സിം​ഗ്, അരുൺകുമാർ സാഹു എന്നീ മന്ത്രിമാർക്ക് നേരത്തേ കോവിഡ് ബാധിച്ചിരുന്നു. മറ്റൊരു മന്ത്രിയായ പത്മിനി ദിയാനും കോവിഡ് സ്ഥിരീകരിച്ചതായി മാധ്യമങ്ങൾ റിപ്പോർട്ട് ചെയ്തിരുന്നു. ഒഡീഷയിൽ 3996 പേർക്കാണ് പുതിയതായി കോവിഡ് ബാധിച്ചിരിക്കുന്നത്. കൊറോണ വൈറസ് ബാധ ​ഗുരുതരമായി ബാധിച്ച സംസ്ഥാനങ്ങളിലൊന്നാണ് ഒഡീഷ.