സംസ്ഥാനങ്ങൾ സമ്പൂർണ വാക്സിനേഷൻ ഉറപ്പാക്കുന്നതിന് പുറമേ ഫലപ്രദമായി സമ്പർക്ക പട്ടിക തയ്യാറാക്കുകയും, പരിശോധനകളുടെ എണ്ണം കൂട്ടുകയും വേണം; ഓമിക്രോൺ രോഗികൾ പെരുകുന്ന പശ്ചാത്തലത്തിൽ ജാഗ്രത വർദ്ധിപ്പിക്കണമെന്ന് പ്രധാനമന്ത്രി; കേന്ദ്ര സംഘം സംസ്ഥാനങ്ങളിലേക്ക്; യുപി തിരഞ്ഞെടുപ്പ് ഒന്നോ രണ്ടോ മാസം നീട്ടി വയ്ക്കണമെന്ന് അലഹബാദ് ഹൈക്കോടതി
ന്യൂഡൽഹി: രാജ്യത്ത് ഓമിക്രോൺ രോഗികൾ കൂടുന്ന പശ്ചാത്തലത്തിൽ, സംസ്ഥാനങ്ങൾ ജാഗ്രത വർദ്ധിപ്പിക്കണമെന്ന് പ്രധാനമന്ത്രി. ഡൽഹിയിൽ ഉന്നതതല അവലോകന യോഗത്തിൽ സംസാരിക്കുകയായിരുന്നു അദ്ദേഹം. പരമാവധി പേർ സമ്പൂർണ വാക്സിനേഷൻ എടുത്തുവെന്ന് സംസ്ഥാനങ്ങൾ ഉറപ്പാക്കണം. ഫലപ്രദമായി സമ്പർക്ക പട്ടിക തയ്യാറാക്കുക, പരിശോധനകളുടെ എണ്ണം കൂട്ടുക, വാക്സിനേഷൻ വേഗം കൂട്ടുക, ആരോഗ്യരംഗത്തെ അടിസ്ഥാന സൗകര്യങ്ങൾ കൂട്ടുക എന്നീ കാര്യങ്ങളിൽ ശ്രദ്ധ കേന്ദ്രീകരിക്കണം.
ഓമിക്രോണിനെ നേരിടാൻ ജില്ലാ തലം മുതൽ ആരോഗ്യ സംവിധാനങ്ങൾ സുസജ്ജമെന്ന് ഉദ്യോഗസ്ഥർ ഉറപ്പാക്കണം. മഹാമാരിക്ക് എതിരെയുള്ള പോരാട്ടം അവസാനിച്ചിട്ടില്ല. കോവിഡ് പ്രോട്ടോക്കോൾ പാലിക്കേണ്ടത് ജനസുരക്ഷയ്ക്ക് അത്യാവശ്യമാണ്. രൂപപ്പെടുന്ന ക്ലസ്റ്ററുകളും, ഹോട്ട്‌സ്‌പോട്ടുകളും ജാഗ്രതയോടെ നിരീക്ഷിച്ച് നടപടികൾ സ്വീകരിക്കണം. ഓക്‌സിജൻ വിതരണ സംവിധാനങ്ങൾ പൂർണമായും പ്രവർത്തനക്ഷമമെന്ന് സംസ്ഥാനങ്ങൾ ഉറപ്പാക്കേണ്ടത് സുപ്രധാനമെന്നും പ്രധാനമന്ത്രി പറഞ്ഞു.
താഴെതട്ടുമുതലുള്ള ആരോഗ്യസംവിധാനം ശക്തിപ്പെടുത്തണമെന്നും സംസ്ഥാനങ്ങൾക്കുള്ള പിന്തുണ തുടരുമെന്നും മോദി പറഞ്ഞു. കോവിഡ് കേസുകൾ കൂടുതലുള്ള സംസ്ഥാനങ്ങളിലും വാക്സിനേഷൻ നിരക്ക് കുറവുള്ള സംസ്ഥാനങ്ങളിലും കേന്ദ്രസംഘം എത്തും.
രാജ്യത്ത് ഓമിക്രോൺ കേസുകൾ കുതിച്ച് ഉയരുന്നതിനിടെ, നിരവധി സംസ്ഥാനങ്ങൾ പുതിയ നിയന്ത്രണങ്ങൾ കൊണ്ടുവന്ന് തുടങ്ങി. മഹാരാഷ്ട്രയിൽ 23 കേസുകൾ കൂടി റിപ്പോർട്ട് ചെയ്തതോടെ ഓമിക്രോൺ കേസുകളുടെ എണ്ണം 300 കടന്നു. മുംബൈയിൽ 602 കോവിഡ് കേസുകളും ഒരു മരണവും റിപ്പോർട്ട് ചെയ്തു. 24 മണിക്കൂറിനിടെയാണ് ഇത്രയും കേസുകൾ.
77 ദിവസത്തിനിടെ ഇതാദ്യമായാണ് മുംബൈയിൽ ഒറ്റ ദിവസം ഇത്രയും അധികം കേസുകൾ സ്ഥിരീകരിക്കുന്നത്. മഹാരാഷ്ട്രയിലെ 23 ഓമിക്രോൺ കേസുകളിൽ 13 എണ്ണം പൂണെയിലും, അഞ്ചെണ്ണം മുംബൈയിലും, രണ്ടെണ്ണം ഒസ്മാനാബാദിലും ആണ്. താനെയിലും നാഗ്പൂരിലും, മിര ഭയന്ദറിലും ഓരോ കേസുകൾ ഇതുവരെ സ്ഥിരീകരിച്ചിട്ടുണ്ട്. സംസ്ഥാനത്ത് ആകെ 88 ഓമിക്രോൺ രോഗികളാണുള്ളത്. കർണാടകയിൽ 12 പേർക്ക് കൂടി ഓമിക്രകോൺ സ്ഥിരീകരിച്ചു. കേരളത്തിൽ അഞ്ചുപേർക്കാണ് പുതുതായി രോഗബാധ കണ്ടെത്തിയത്. തമിഴ്‌നാട്ടിൽ 33 പേർക്കും പുതുതായി ഓമിക്രോൺ സ്ഥിരീകരിച്ചിരുന്നു. രാജ്യത്തെ 15 സംസ്ഥാനങ്ങളിലും ഏതാനും കേന്ദ്രഭരണപ്രദേശങ്ങളിലും രോഗബാധ സ്ഥിരീകരിച്ചിട്ടുണ്ട്.
സംസ്ഥാനങ്ങൾക്ക് വീണ്ടും ജാഗ്രതാനിർദ്ദേശം
രോഗവ്യാപനം തടയാൻ എല്ലാ മുൻകരുതൽ നടപടിയും സ്വീകരിക്കാൻ കേന്ദ്ര ആരോഗ്യമന്ത്രാലയം സംസ്ഥാനങ്ങളോട് ആവശ്യപ്പെട്ടു. രാജ്യത്തെ കോവിഡ് സ്ഥിതിഗതികൾ വിലയിരുത്തിയശേഷമാണ് സംസ്ഥാനങ്ങൾക്ക് ജാഗ്രതാ നിർദ്ദേശം നൽകിയത്. ഓമിക്രോൺ ഭീഷണി നേരിടാൻ അഞ്ചുതലങ്ങളിലുള്ള പ്രതിരോധതന്ത്രങ്ങൾ സ്വീകരിക്കാനാണ് നിർദ്ദേശം. കോവിഡ് കണ്ടെയ്ന്മെന്റ് സോണുകളിൽ ചുരുങ്ങിയത് 14 ദിവസം കടുത്ത നിയന്ത്രണം ഏർപ്പെടുത്തണം. ഓമിക്രോണിന്റെ രോഗലക്ഷണം ജലദോഷത്തിന്റേതിന് സമാനമാണെന്നും, എന്നാൽ പകരാനുള്ള സാധ്യത ഇരട്ടിയിലേറെയാണെന്നും കേന്ദ്രസർക്കാർ വ്യക്തമാക്കി.
ആൾക്കൂട്ട നിയന്ത്രണം
കോവിഡ് രോഗവ്യാപനം കൂടുതലായി ഉണ്ടാകുന്ന പ്രദേശങ്ങൾ കണ്ടെയ്ന്മെന്റ് സാണുകളായും ബഫർ സോണുകളായും പ്രഖ്യാപിക്കുക. രാത്രി കർഫ്യൂ ഏർപ്പെടുത്തുക, ആഘോഷദിനങ്ങൾ വരാനിരിക്കുന്നത് പരിഗണിച്ച് ആൾക്കൂട്ടം ഉണ്ടാകുന്ന അവസരങ്ങൾക്ക് കടുത്ത നിയന്ത്രണം ഏർപ്പെടുത്തുക.
കണ്ടെയ്ന്മെന്റ് സോണുകളിൽ കോവിഡ് മാർഗനിർദേശപ്രകാരമുള്ള നിരീക്ഷണം ഉറപ്പാക്കുക, കോവിഡ് ക്ലസ്റ്റർ മേഖലകളിൽ സ്രവസാംപിളുകൾ കാലതാമസം കൂടാതെ തന്നെ ജനിതകശ്രേണീകരണ പരിശോധനയ്ക്കായി ഐഎൻഎസ്എസിഒജി ലാബിൽ പരിശോധനയ്ക്ക് അയക്കണമെന്നും കേന്ദ്രസർക്കാർ സംസ്ഥാനങ്ങളോട് ആവശ്യപ്പെട്ടു.
കർശന നിരീക്ഷണം
പൂർണ വാക്സിനേഷൻ ഓമിക്രോൺ ഗുരുതര ആരോഗ്യപ്രശ്നങ്ങളും ആശുപത്രി വാസവും തടയുന്നു. അതിനാൽ എല്ലാവർക്കും വാക്സിൻ നൽകുന്ന പ്രവർത്തനം ത്വരിതപ്പെടുത്തണം. ജില്ലാ അടിസ്ഥാനത്തിൽ കോവിഡ് കേസുകൾ കർശനമായി നിരീക്ഷിക്കണമെന്നും, രോഗവ്യാപനത്തോത്, പുതിയ ക്ലസ്റ്ററുകൾ രൂപകൊള്ളുന്നത് ഇതെല്ലാം കർശനമായി നിരീക്ഷിക്കണമെന്നും, ആവശ്യമെങ്കിൽ പ്രാദേശികമായ നിയന്ത്രണങ്ങൾ ഏർപ്പെടുത്തണമെന്നും കേന്ദ്രം സംസ്ഥാനങ്ങൾക്കയച്ച നിർദേശത്തിൽ പറയുന്നു.
യുപി തിരഞ്ഞെടുപ്പ് നീട്ടണമെന്ന് അലഹബാദ് ഹൈക്കോടതി
ഓമിക്രോൺ പശ്ചാത്തലത്തിൽ, യുപി നിയമസഭാ തിരഞ്ഞെടുപ്പ് ഒന്നോ രണ്ടോ മാസത്തേക്ക് നീട്ടി വയ്ക്കണമെന്ന് അലഹബാദ് ഹൈക്കോടതി തിരഞ്ഞെടുപ്പ് കമ്മീഷനോട് ആവശ്യപ്പെട്ടു. യുപിയിൽ തിരഞ്ഞെടുപ്പ് റാലികൾ നിരോധിക്കാനും കോടതി പ്രധാനമന്ത്രിയോട് അഭ്യർത്ഥിച്ചു. റാലികൾ നിർത്തിയില്ലെങ്കിൽ, ഫലം രണ്ടാം തരംഗത്തേക്കാൾ ഭീകരമായിരിക്കും ജസ്റ്റിസ് ശേഖർ യാദവ് ഒരു കേസുമായി ബന്ധപ്പെട്ട് നിരീക്ഷിച്ചു.
