തിരുവനന്തപുരം: അർഹതപ്പെട്ട ജോലി ലഭിക്കാൻ മുട്ടിലിഴഞ്ഞും യാചിച്ചും വരെ സമരം ചെയ്യേണ്ടി വരുന്ന ഉദ്യോഗാർത്ഥികളുടെ ദുരവസ്ഥയാണ് കേരളം ഇപ്പോൾ ഏറ്റവും കൂടുതൽ ചർച്ച ചെയ്യുന്നത്. സമരം തുടരുന്ന ഉദ്യോഗാർത്ഥികളെ നേരിട്ട് സന്ദർശിക്കാനെത്തിയ മുൻ മുഖ്യമന്ത്രി ഉമ്മൻ ചാണ്ടിയുടെ കാൽക്കൽ വീണ് കരയുന്ന ഉദ്യോഗാർഥികളുടെ കരളലയിപ്പിക്കുന്ന ദൃശ്യങ്ങൾ ആർക്കും മറക്കാനാവില്ല. സമൂഹമാധ്യമങ്ങളിലും ഇത് ഏറെ ചർച്ചയായി. ഇതിനു പിന്നാലെ സമരത്തെക്കുറിച്ച് ഉള്ളുതൊട്ട കുറിപ്പ് ഉമ്മൻ ചാണ്ടി പങ്കിട്ടത്.

'സെക്രട്ടേറിയറ്റിനു മുന്നിൽ വീറോടെ സമരം നടത്തുന്ന പിഎസ് സി റാങ്ക് ഹോൾഡേഴസിനെ സന്ദർശിച്ചപ്പോൾ ഹൃദയം നുറുങ്ങുന്ന അനുഭവമാണ് ഉണ്ടായത്. ഒരു കൂട്ടം യുവാക്കളുടെ നിലവിളി ഇപ്പോഴും എന്റെ ചെവിയിൽ മുഴങ്ങുന്നു. അവരുടെ കണ്ണീർ വീണ് എന്റെ കാലുകൾ പൊള്ളി. നട്ടുച്ച വെയിലത്ത് യുവതികൾ ഉൾപ്പെടുന്ന ഉദ്യോഗാർത്ഥികൾ ചുട്ടുപൊള്ളുന്ന ടാർ റോഡിലൂടെ മുട്ടിന്മേൽ നീന്തി. അവരുടെ കാലുകൾ പൊട്ടി രക്തം പൊടിഞ്ഞു. ചിലർക്ക് ബോധക്ഷയം ഉണ്ടായി. പ്രിയ യുവസ്നേഹിതരേ, കേരളത്തിലെ ജനങ്ങൾ നിങ്ങളോടൊപ്പമുണ്ട്. തീർച്ചയായും ഞാനും മുൻനിരയിൽ തന്നെ ഉണ്ടാകും.' ഉമ്മൻ ചാണ്ടി കുറിച്ചു.



മുട്ടിലിഴഞ്ഞും യാചിച്ചും സമരം ചെയ്തവരെ കാണാൻ ഉമ്മൻ ചാണ്ടി തിങ്കളാഴ്ച സമരവേദിയിൽ എത്തിയിരുന്നു. സമരക്കാരോട് സംസാരിക്കുന്നതിനിടെ ഒരു കൂട്ടം യുവാക്കൾ കൂട്ടത്തോടെ കാലിൽ വീണ് അപേക്ഷിച്ചത് ഒരുവേള ഉമ്മൻ ചാണ്ടിയെയും അമ്പരപ്പിച്ചു. പിടിച്ച് എഴുന്നേൽപ്പിക്കാൻ അദ്ദേഹം ശ്രമിക്കുമ്പോഴും യുവാക്കൾ അപേക്ഷ തുടരുകയായിരുന്നു.

oommen chandy social media post

മറുനാടന്‍ മലയാളി

    മറുനാടന്‍ മലയാളി ബ്യൂറോ