പത്തനാപുരം എംഎൽഎയുടെ ഓഫീസ് ആക്രമിച്ചത് മാനസിക രോഗി; ഉണ്ണികൃഷ്ണൻ അറസ്റ്റിൽ; ഗണേശ് കുമാറിന്റെ വെട്ടേറ്റ സ്റ്റാഫിന് ഒൻപത് തുന്നിക്കെട്ട്; ആക്രമിയെ കീഴ്‌പ്പെടുത്തിയത് നാട്ടുകാരും എംഎൽഎയുടെ സ്റ്റാഫും ചേർന്ന്
കൊല്ലം: പത്തനാപുരം എംഎ‍ൽഎ. കെ.ബി. ഗണേശ് കുമാറിന്റെ ഓഫീസിൽ അക്രമം. പാർട്ടി പ്രവർത്തകന് വെട്ടേറ്റു. അക്രമിയെ ഓഫീസ് ജീവനക്കാർ കീഴ്പ്പെടുത്തി പൊലീസിന് കൈമാറി. വെട്ടേറ്റ കേരളാ കോൺഗ്രസ് ബി പ്രവർത്തകൻ ബിജു പത്തനാപുരത്തെ സ്വകാര്യ ആശുപത്രിയിൽ ചികിത്സയിലാണ്. അപകടനില ഇയാൾ തരണം ചെയ്തിട്ടുണ്ട്. മാനസിക വിഭ്രാന്തിയുള്ള ഉണ്ണികൃഷ്ണനാണ് പിടിയിലായത്.
അക്രമം നടത്തിയ ആൾക്ക് മാനസിക അസ്വാസ്ഥ്യമുണ്ടെന്ന് പറയപ്പെടുന്നു. രാവിലെ ആറുമണിയോടെയാണ് പ്രദേശവാസിയായ ഇദ്ദേഹം അക്രമം നടത്തിയത്. എംഎ‍ൽഎ. ഓഫീസിന്റെ വാതിൽക്കൽ നിൽക്കുകയായിരുന്ന ബിജുവിനെ, ഓടിയെത്തിയ അക്രമി വെട്ടുകയായിരുന്നു. ബിജുവിന് കയ്യിലാണ് വെട്ടേറ്റത്. ഉടൻതന്നെ ഓഫീസിൽ ഉണ്ടായിരുന്ന മറ്റ് ജീവനക്കാരും ബിജുവും നാട്ടുകാരും ചേർന്ന് അക്രമിയെ പിടികൂടി പൊലീസിന് കൈമാറി.
നിലവിൽ പൊലീസ് കസ്റ്റഡിയിലാണ് അക്രമിയുള്ളത്. ഇയാളെ വൈദ്യപരിശോധനയ്ക്ക് പുനലൂർ താലൂക്ക് ആശുപത്രിയിലേക്ക് കൊണ്ടുപോയി. വിഷയത്തിന് രാഷ്ട്രീയമാനമില്ലെന്നാണ് പ്രാഥമികനിഗമനം. പത്തനാപുരം സിഐയുടെ നേതൃത്വത്തിലുള്ള സംഘം അന്വേഷണം ആരംഭിച്ചു.
