കൂവൽ കത്തിച്ച് പിസിയുടെ ഇമേജ് കളയാൻ ഇടത് തന്ത്രം; തീവ്രവാദികളുടെ വോട്ടു വേണ്ടെന്ന പ്രഖ്യാപനം എസ് ഡി പി ഐയെ കൂടുതൽ പ്രകോപിതരാക്കുന്നവോ? പലിശക്കാരൻ പരാമർശത്തിൽ പാറത്തോട്ടിലെ പ്രസംഗം അലങ്കോലമാക്കൽ; പൂഞ്ഞാറിൽ 'ജനപക്ഷത്തെ' തോൽപ്പിക്കാൻ ഇടത്-എസ്ഡിപിഐ സഖ്യമോ? കരുതലോടെ പിസി ജോർജും
പൂഞ്ഞാർ: പിസി ജോർജിനെ ശക്തികേന്ദ്രങ്ങളിൽ പ്രചരണത്തിന് സമ്മതിക്കെന്ന നിലപാടിലേക്ക് എസ് ഡി പി ഐ മാറിയോ? ഇരാറ്റുപേട്ടയ്ക്ക് പിന്നാലെ പാറത്തോട്ടിലും പി.സി.ജോർജിന്റെ പ്രചാരണത്തിനിടെ സംഘർഷം. സിപിഎം.-എസ്ഡിപിഐ പ്രവർത്തകർ പ്രസംഗം അലങ്കോലപ്പെടുത്തിയതായി പി.സി. ജോർജ് ആരോപിച്ചു. പ്രസംഗം പാതിവഴിയിൽ ഉപേക്ഷിച്ച് പി.സി.ജോർജ് മടങ്ങി. അതിനിടെ എസ് ഡി പി ഐ്ക്കാരാണ് പ്രചരണം തടഞ്ഞതെന്ന് പിസിയും പറയുന്നു. എസ്ഡിപിഐയുമായി ഇടതു-വലതു മുന്നണികൾക്കുള്ള ബന്ധം പ്രചാരണ വിഷയമാക്കുകയാണ് പി സി ജോർജ്.
പി.സി.ജോർജ് സംസാരിച്ചുകൊണ്ടിരിക്കുന്നതിനിടെ എൽ.ഡി.എഫിന്റെയും യു.ഡി.എഫിന്റെയും പ്രചാരണ വാഹനങ്ങൾ കടന്നുപോയി. ഇതോടെ അദ്ദേഹത്തിന്റെ പ്രസംഗം അലങ്കോലപ്പെട്ടു. രണ്ടുതവണ ഇത്തരം പ്രവണതകൾ ശരിയല്ലെന്ന് ആവർത്തിക്കുകയും അഭ്യർത്ഥിക്കുകയും ചെയ്തു. എന്നാൽ സിപിഎം. വാഹനങ്ങൾ വീണ്ടും അതുവഴി കടന്നുപോയതോടെയാണ് സംഘർഷത്തിലേക്ക് കാര്യങ്ങൾ നീങ്ങിയത്. ജനപക്ഷത്തിന്റെ പ്രവർത്തകരും സിപിഎം. പ്രവർത്തകരും ഏറ്റുമുട്ടുന്ന സാഹചര്യം ഉണ്ടായി. തുടർന്ന് താൻ പ്രസംഗം അവസാനിപ്പിക്കുകയാണെന്ന് പറഞ്ഞ് പി.സി.ജോർജ് മടങ്ങുകയും ചെയ്തു.
വോട്ട് ചോദിക്കാനെത്തിയപ്പോൾ തന്നെ കൂവിയവർ തീവ്രവാദ മനസ്ഥിതിയുള്ളവരെന്നും അവരുടെ വോട്ടുകൾ വേണ്ടെന്നും പി.സി ജോർജ് നേരത്തെ പറഞ്ഞിരുന്നു. തീക്കോയി പഞ്ചായത്തിൽ തെരഞ്ഞെടുപ്പ് പ്രചാരണത്തിന് എത്തിയപ്പോൾ പി.സി.ജോർജ്ജിനെ നാട്ടുകാരിൽ ചിലർ കൂക്കി വിളിച്ചിരുന്നു. ഈ സംഭവത്തിലാണ് പി.സി. ജോർജ്ജിന്റെ പ്രതികരണം. പ്രീപോൾ സർവ്വേയിൽ എല്ലാം പൂഞ്ഞാറിൽ പിസി ജോർജ് ജയിക്കുമെന്നാണ് പ്രവചനം. ഇതിനിടെയാണ് കൂവിയവരുടെ വോട്ട് വേണ്ടെന്ന് പിസി പറയുന്നത്. ഈ സാഹചര്യത്തിൽ പിസി ജോർജിനെതിരെ മണ്ഡലത്തിൽ അതൃപ്തിയുണ്ടെന്ന് വരുത്താനാണ് ഇടതുപക്ഷത്തിന്റെ ശ്രമം.
പാറത്തോട്ടിലെ പ്രശ്‌നത്തിന് പിന്നിൽ എസ് ഡി പി ഐ ഇടപെടലും ഉണ്ടെന്നാണ് പിസി ജോർജിന്റെ ആരോപണം. എൽ.ഡി.എഫ്. സ്ഥാനാർത്ഥി പലിശക്കാരനാണ് എന്ന് പറഞ്ഞതാണ് പ്രകോപനത്തിന് കാരണമായതെന്ന് പി.സി.ജോർജ് പറഞ്ഞു. 'പ്രസംഗം തടസ്സപ്പെടുത്താനുള്ള ശ്രമമാണ് നടന്നുകൊണ്ടിരിക്കുന്നത്. പലിശക്കാരനായ ഒരാളെയാണ് ഇവിടെ എൽഡിഎഫ് സ്ഥാനാർത്ഥിയാക്കിയിരിക്കുന്നത്. ഇരുന്നൂറിൽ അധികം ചെക്കുകേസുകളിൽ പെട്ടയാളാണ്. അത് ഞാൻ പറഞ്ഞതാണ് ബുദ്ധിമുട്ടായിരിക്കുന്നത്.'-പിസി പറയുന്നു.
പല സ്ഥലങ്ങളിലും പി സി ജോർജിന് ജനങ്ങളുടെ ഇടയിൽ നിന്ന് ഇത്തരം പ്രതികരണങ്ങൾ നേരിടേണ്ടി വന്നിട്ടുണ്ടെന്ന് ഇടത് മുന്നണി ആരോപിച്ചിരുന്നു. ജോർജിനെതിരെയുള്ള കൂവൽ മണ്ഡലത്തിൽ ആളിക്കത്തിക്കാനാണ് യുഡിഎഫും നീക്കം നടത്തുന്നത്. കൂവൽ വിവാദം മണ്ഡലത്തിലെ സജീവ രാഷ്ട്രീയ വിഷയമാക്കാനാണ് ഇടതു-വലതു മുന്നണികളുടെ തീരുമാനം. മണ്ഡലത്തെ തുടർച്ചയായി പ്രതിനീധീകരിച്ചു വരുന്ന എംഎൽഎയെ ജനങ്ങൾക്ക് മടുത്തു തുടങ്ങിയതിന്റെ സൂചനയാണ് ഈരാറ്റുപേട്ടയിലെ സംഭവമെന്നാണ് ഇടതു-വലതു മുന്നണികളുടെ വിമർശനം. ഈരാറ്റുപേട്ട ഒറ്റപ്പെട്ട സംഭവമല്ലെന്നും മണ്ഡലത്തിലെ വിവിധ ഇടങ്ങളിൽ സമാന അനുഭവം പി സി ജോർജിന് ഉണ്ടായിട്ടുണ്ടെന്നും ഇടതു സ്ഥാനാർത്ഥി സെബാസ്റ്റ്യൻ കുളത്തുങ്കൽ ആരോപിച്ചിരുന്നു.
തിക്കോയിയിൽ കൂവിയവരുടെ പെരുമാറ്റത്തിൽ കുപിതനായി കൃത്യമായി തന്നെ പി.സി. ജോർജ്ജ് മറുപടി നൽകിയിരുന്നു. തന്നെ കൂക്കി വിളിച്ചത് തീവ്രവാദ മാനസീകാവസ്ഥ ഉള്ളവരാണെന്നും ഭീകരവാദം അവസാനിപ്പിക്കാത്തിടത്തോളം അവരുമായി ഒരു സന്ധിക്കില്ലെന്നും ഈരാറ്റുപേട്ടയിലെ നല്ലവരായ മുസ്ലിംകൾ തനിക്കൊപ്പമാണെന്നും പി.സി. ജോർജ് പറഞ്ഞു. ''തീവ്രവാദ മനഃസ്ഥിതിയുള്ള ആളുകളാണ് കൂവിയത്. അത്തരക്കാരുടെ വോട്ട് വേണ്ടെന്ന് പരസ്യമായി പറയുന്നു. നിങ്ങളോട് യോജിക്കാൻ എന്റെ പട്ടി പോലും വരില്ല.''-പിസി ജോർജ് വീണ്ടും നിലപാട് ആവർത്തിക്കുന്നു.
നിങ്ങളിൽ സൗകര്യമുള്ളവർ തനിക്ക് വോട്ടുചെയ്താൽ മതിയെന്നും ഇല്ലെങ്കിലും കുഴപ്പമില്ലെന്നും പ്രതികരിച്ച പി.സി. ജോർജ്ജ് വീട്ടിൽ കാരണവന്മാർ പഠിപ്പിച്ചത് ഇങ്ങിനെയാണോയെന്നും ചോദിച്ചു. കാരണവന്മാർ നന്നായാലേ മക്കൾ നന്നാകൂ. അതിനായി അല്ലാഹുവിനോട് പ്രാർത്ഥിക്കാമെന്നും പറഞ്ഞു. താൻ ഈരാറ്റുപേട്ടയിൽ തന്നെ കാണുമെന്നും തെരഞ്ഞെടുപ്പ് കമീഷനിൽ പരാതി കൊടുത്താൽ നിങ്ങളൊക്കെ അകത്തുപോകുമെന്നും പറഞ്ഞരുന്നു.
