ഷിക്കാഗോ: സീറോ മലബാർ ഭദ്രാസനം ഷിക്കാഗോ, ആഗോളവ്യാപകമായി നോർത്ത് അമേരിക്ക, കാനഡ ഇടവകകളെ കോർത്തിണക്കി കൊണ്ട് ഭദ്രാസന വലിയ പിതാവ് ബിഷപ്പ് മാർ ജേക്കബ് അങ്ങാടിയത്തിന്റെ  നേതൃത്വത്തിൽ പതിനഞ്ചോളം പട്ടക്കാരും, നിരവധി കന്യാസ്ത്രീകളും, നൂറോളം വിശ്വാസികളും ഉൾപ്പെട്ട സംഘം നവംബർ 16-ന് ഷിക്കാഗോയിൽ നിന്നും, നവംബർ 17-ന് ന്യൂയോർക്കിൽ നിന്നും ഇറ്റലിയിലേക്ക്  യാത്രതിരിച്ചു.

നവംബർ 23-ന് വത്തിക്കാനിൽ വച്ച് വിശുദ്ധ പദവിയിലേക്ക് ഉയർത്തപ്പെടുന്ന വാഴ്‌ത്തപ്പെട്ട ചാവറ അച്ചന്റേയും, ഏവുപ്രാസ്യാമ്മയുടേയും വിശുദ്ധ പദവി പ്രഖ്യാപന കർമ്മത്തിൽ പങ്കെടുക്കുക എന്ന പ്രധാന ലക്ഷ്യത്തോട് ഒരുക്കപ്പെട്ട പിൽഗ്രിമേജ് ടൂർ ഇറ്റലിയിൽ വെനീസ്, ഫ്‌ളോറൻസ്, പിസാ, അസീസ്സി സന്ദർശനങ്ങൾക്കുശേഷം 23-ന് റോമിലെ വിശുദ്ധ കർമ്മത്തിലും പങ്കെടുത്ത്, 24-ന് സീറോ മലബാർ സഭാംഗങ്ങൾ വന്ദ്യ പിതാവിന്റെ നേതൃത്വത്തിൽ മാർപാപ്പയിൽ നിന്ന് നേരിട്ട് അനുഗ്രഹങ്ങൾ വാങ്ങുന്നതാണ്. തുടർന്ന് പത്തുമണിയോടെ സെന്റ് പീറ്റേഴ്‌സ് ബസിലിക്ക സീറോ മലബാർ സഭാംഗങ്ങളുടെ വിശുദ്ധ കുർബാനയ്ക്ക് സാക്ഷ്യംവഹിക്കും. 25-ന് സംഘം അമേരിക്കയിലേക്ക് മടങ്ങുന്നതാണ്.

മാത്യൂസ് പിൽഗ്രിമേജ് ടൂർ ഷിക്കാഗോ, അടുക്കോടും ചിട്ടയോടും ഒരുക്കിയ ക്രമീകരണങ്ങളിൽ അങ്ങാടിയത്ത് പിതാവ് സന്തുഷ്ടിയും നന്ദിയും പ്രകടിപ്പിക്കുകയുണ്ടായി.