പ്രധാനമന്ത്രിയുടെ കേരള സന്ദർശനം; കൊച്ചി നഗരത്തിൽ ഞായറാഴ്ച ഉച്ചയ്ക്ക് 12 മുതൽ രാത്രി 07 വരെ ഗതാഗത നിയന്ത്രണം

കൊച്ചി: ഇന്ത്യൻ പ്രധാനമന്ത്രി നരേന്ദ്ര മോദിയുടെ കേരള സന്ദർശനത്തോട് അനുബന്ധിച്ച് കൊച്ചി നഗരത്തിൽ ഞായറാഴ്ച ഗതാഗത നിയന്ത്രണം. നേവൽ ബെയ്‌സ്, വാത്തുരുത്തി, ബിഓടി ഈസ്റ്റ്, തേവര ഫെറി ജങ്ഷൻ, കുണ്ടന്നൂർ എന്നീ ഭാഗങ്ങളിൽ ഞായറാഴ്ച ഉച്ചയ്ക്ക് 12 മുതൽ രാത്രി 07 വരെയായിരിക്കും ഗതാഗത നിയന്ത്രണം.

ഞായറാഴ്ച ഉച്ച കഴിഞ്ഞ് 2.45ന് കൊച്ചി നാവികസേനാ വിമാനത്താവളത്തിൽ പ്രധാനമന്ത്രി എത്തും. തുടർന്ന് ഔദ്യോഗിക പരിപാടികൾ ക്രമീകരിച്ചിട്ടുള്ള അമ്പലമുകൾ വി എച്ച് എസ് ഇ സ്‌കൂൾ ഗ്രൗണ്ടിലേക്ക് പോകും. വൈകിട്ട് നാലര വരെയാണ് വിവിധ ഉദ്ഘാടന പരിപാടികൾ നടക്കുന്നത്. നാലര മുതൽ അഞ്ചു മണി വരെ ബിജെപി കോർ കമ്മിറ്റി യോഗത്തിൽ പങ്കെടുക്കും. ഇതിന് ശേഷം അദ്ദേഹം ഡൽഹിയിലേക്ക് മടങ്ങും.

പൊതുജനങ്ങളുടെ ശ്രദ്ധയ്ക്ക്
ഗതാഗത നിയന്ത്രണമുള്ള സമയങ്ങളിൽ എറണാകുളം നഗരത്തിൽ നിന്നും പശ്ചിമ കൊച്ചിയിലേക്ക് പോകേണ്ട വാഹനങ്ങൾ എസ്സ് എ റോഡ്, വൈറ്റില, കുണ്ടന്നൂർ മേൽപ്പാലം, അരൂർ, ഇടക്കൊച്ചി വഴി പോകണം.
പശ്ചിമ കൊച്ചിയിൽ നിന്നും എറണാകുളം, ആലപ്പുഴ ഭാഗങ്ങളിലേക്ക് പോകേണ്ട വാഹനങ്ങൾ ഇടക്കൊച്ചി, അരൂർ വഴി പോകേണ്ടതാണ്.
എറണാകുളം നഗരത്തിൽ നിന്നും പശ്ചിമ കൊച്ചിയിലേക്കും പശ്ചിമ കൊച്ചിയിൽ നിന്നും എറണാകുളത്തേക്കും പോകേണ്ട വാഹനങ്ങൾക്ക് ഗോശ്രീ റോഡ്, വൈപ്പിൻ വഴിയുള്ള ജംഗാർ സർവീസ് പ്രയോജനപ്പെടുത്താവുന്നതാണ്.
കാക്കനാട് സിഗ്‌നൽ ജങ്ഷൻ ഭാഗത്തു നിന്നും ഇരുമ്പനം, തൃപ്പുണിത്തുറ, ഭാഗത്തേക്ക് പോകുന്ന സീപോർട്ട്-എയർപോർട്ട് റോഡിൽ ഗതാഗത നിയന്ത്രണം ഉള്ളതിനാൽ കളമശേരി, കാക്കനാട് എന്നീ ഭാഗങ്ങളിൽ നിന്നും സീപോർട്ട്-എയർപോർട്ട് റോഡ് വഴി തൃപ്പുണിത്തുറ ഭാഗത്തേക്ക് പോകേണ്ട വാഹനങ്ങൾ കാക്കനാട് സിഗ്‌നൽ ജങ്ഷനിൽ നിന്നും ബൈപ്പാസിലെത്തി യാത്ര തുടരേണ്ടതാണ്.
കാക്കനാട് പാർക്ക് റസിഡൻസി ഹോട്ടലിന് മുന്നിലുള്ള റോഡിലുള്ള യാത്ര ചെയ്യാൻ ഉദ്ദേശിക്കുന്നവർ കാക്കനാട് സിഗ്‌നൽ ജങ്ഷനിൽ നിന്നും പാലാരിവട്ടം ബൈപ്പാസിലെത്തി യാത്ര തുടരേണ്ടതാണ്.
കരിമുകൾ ജഷ്‌നനിൽ നിന്നും അമ്പലമുകൾ ഭാഗത്തേക്ക് ഗതാഗത നിയന്ത്രണമുള്ളതിനാൽ ആലുവ-പെരുമ്പാവൂർ-വണ്ടർലാ-പള്ളിക്കര ഭാഗത്ത് നിന്നും വരുന്ന വാഹനങ്ങൾ കരിമുകൾ ജഷ്‌നിൽ നിന്നും ഇടത്തോട്ട് തിരിഞ്ഞ് പീച്ചിങ്ങാച്ചിറ ജഷ്‌നലെത്തി അവിടെ നിന്നും പുത്തൻകുരിശ് വഴി തിരുവാങ്കുളത്തെത്തി യാത്ര തുടരേണ്ടതാണ്.
പീച്ചിങ്ങാച്ചിറ ജഷ്‌നിൽ നിന്നും കരിമുകൾ ഭാഗത്തേക്ക് വാഹന ഗതാഗതം അനുവദിക്കുന്നതല്ല.
ഹിൽപാലസിന് മുന്നിൽ നിന്നും അമ്പലമുകൾ ഭാഗത്തേക്ക് വാഹന ഗതാഗതം അനുവദിക്കുന്നതല്ല.
കരിങ്ങാച്ചിറ ജങ്ഷനിൽ നിന്നും ഇരുമ്പനം ഭാഗത്തേക്ക് വാഹന ഗതാഗതം അനുവദിക്കുന്നതല്ല.
ഏരൂർ ഭാഗത്ത് നിന്ന് എസ്എൻ ജങ്ഷനിലേക്ക് വരുന്നവർ എസ്എൻ ജങ്ഷനിൽ നിന്നും നേരെ കിഴക്കേ കോട്ട ജങ്ഷനിലെത്തി യാത്ര തുടരേണ്ടതാണ്.
എസ്എൻ ജങ്ഷനിൽ നിന്നും നേരേ സീപോർട്ട് എയർപോർട്ട് റോഡ്, കരിങ്ങാച്ചിറ, ഇരുമ്പനം, അമ്പലമുകൾ എന്നീ ഭാഗങ്ങളിലേക്ക് വാഹന ഗതാഗതം അനുവദിക്കുന്നതല്ല.
തിരുവാങ്കുളം ഭാഗത്തു നിന്നും കാക്കനാട്, എറണാകുളം ഭാഗത്തേക്ക് പോകേണ്ട വാഹനങ്ങൾ കിഴക്കേകോട്ട, മിനി ബൈപ്പാസ്, വൈറ്റില വഴി തിരിഞ്ഞു പോകേണ്ടതാണ്.