ഫോണിലൂടെ നഗ്നഫോട്ടോ അയയ്ക്കാൻ പ്രലോഭനവും പിന്നീട് ലൈംഗിക ചൂഷണവും; മലപ്പുറത്ത് പ്രായപൂർത്തി ആകാത്ത പെൺകുട്ടിയെ പീഡിപ്പിച്ച കേസിൽ 22 കാരൻ അറസ്റ്റിൽ

മലപ്പുറം: പതിനഞ്ച് വയസ് മാത്രം പ്രായമുള്ള പ്രായപൂർത്തിയാകാത്ത പെൺകുട്ടിയെ പീഡിപ്പിച്ച സംഭവത്തിൽ യുവാവിനെ പെരുമ്പടപ്പ് പൊലീസ് അറസ്റ്റ് ചെയ്തു. പോക്സോ പ്രകാരമാണ് യുവാവിനെ അറസ്റ്റ് ചെയ്തത്. ചാവക്കാട് എടക്കഴിയൂർ സ്വദേശി കാരക്കാട്ട് വീട്ടിൽ മുഹമ്മദ് ഹാഷിം (22) നെയാണ് അറസ്റ്റ് ചെയ്തത്.

ഫോണിലൂടെ നഗ്ന ഫോട്ടോകൾ അയക്കാൻ നിർബന്ധിച്ച് ഫോട്ടോകൾ അയപ്പിക്കുകയും ലൈംഗിക ബന്ധത്തിന് ഇരയാക്കുകയും ചെയ്ത സംഭവത്തിലാണ് ഇരുപത്തിരണ്ടുകാരനെ പെരുമ്പടപ്പ് പൊലീസ് അറസ്റ്റ് ചെയ്തത്. പ്രതിയെ എടക്കഴിയൂർ നിന്നു അറസ്റ്റ് ചെയ്തു പൊന്നാനി കോടതിയിൽ ഹാജരാക്കി. മഞ്ചേരി സബ്ജയിലിൽ റിമാന്റ് ചെയ്തു.പെരുമ്പടപ്പ് എസ്‌ഐ സുരേഷ്, സി.പി.ഒമാരായ രഞ്ജിത്ത്,സൗമ്യ എന്നിവരുടെ നേതൃത്വത്തിലുള്ള പൊലീസ് സംഘമാണ് കസ്റ്റഡിയിലെടുത്തത്