തിരുവനന്തപുരത്ത് ബിജെപിയെന്ന് കേന്ദ്ര ഇന്റലിജൻസ്
കൊച്ചി: കേരളത്തിലെ ലോക്‌സഭാ തെരഞ്ഞെടുപ്പു പൂർത്തിയായി നേതാക്കൾ മറ്റിടങ്ങളിലെ പ്രചരണത്തിനായി പുറപ്പെട്ടു കഴിഞ്ഞു. ഇക്കുറി ശക്തമായ ത്രികോണ മത്സരം നടന്ന രണ്ടിടങ്ങളിലെ ഫലം ദേശീയ രാഷ്ട്രീയവും ഉറ്റുനോക്കുന്നുണ്ട്. തൃശ്ശൂരും തിരുവനന്തപുരവുമാണ് ഈ മണ്ഡലങ്ങൾ. ശശി തരൂരിന് ശക്തനായ എതിരാളിയായി രാജീവ് ചന്ദ്രശേഖർ കടന്നുവന്നതോടെ പ്രവചനാതീതമായ മാറിയ പോരാട്ടമായിരുന്നു തലസ്ഥാന മണ്ഡലത്തിലേത്. ബിജെപി സർവശക്തിയും പ്രയോഗിച്ചു പൊരുതിയ തെരഞ്ഞെടുപ്പിൽ താൻ വിജയിക്കുമെന്നാണ് കോൺഗ്രസ് നേതാവ് ശശി തരൂർ അവകാശപ്പെടുന്നത്. ഇതിനിടെയിലും കോൺഗ്രസിന് വെല്ലുവിളിയായി അടിയൊഴുക്ക് ഉണ്ടായിരുന്നോ എന്ന സംശയവും ശക്തമാണ്.
കോൺഗ്രസ് ക്യാമ്പിൽ ആശങ്ക വിതറിക്കൊണ്ടാണ് കേന്ദ്ര രഹസ്യാന്വേഷണ വിഭാഗത്തിന്റെ റിപ്പോർട്ടിനെ ഉദ്ധരിച്ചു കൊണ്ടുള്ള പത്രവാർത്ത പുറത്തുവന്നത്. കേരളത്തിൽ നിന്നും ലോക്‌സഭയിലേക്ക് ബിജെപി അക്കൗണ്ട് തുറക്കുക തലസ്ഥാന മണ്ഡലമായ തിരുവനന്തപുരത്തു നിന്നാണ് എന്നാണ് മാധ്യമം ദിനപത്രം റിപ്പോർട്ടു ചെയ്യുന്നത്. കേന്ദ്ര ഇന്റലിജൻസ് ഇത്തരമൊരു റിപ്പോർട്ടാണ് നൽകിയതെന്നാണ് പത്രവാർത്തയിൽ വ്യക്തമാക്കുന്നത്. തിരുവനന്തപുരത്ത് കേന്ദ്ര മന്ത്രി രാജീവ് ചന്ദ്രശേഖർ നേരിയ വോട്ടിനായാലും വിജയിക്കുമെന്നാണ് കേന്ദ്ര രഹസ്യാന്വേഷണ വിഭാഗത്തിന്റെ നിഗമനം എന്നതാണ് വാർത്ത.
അതേസമയം ബിജെപി വലിയ പ്രതീക്ഷ വെക്കുന്ന തൃശ്ശൂരിൽ സുരേഷ് ഗോപി വിജയിക്കില്ലെന്നും ഇന്റലിജൻസ് പറയുന്നു. തൃശൂരിൽ എൽ.ഡി.എഫ് സ്ഥാനാർത്ഥി വി എസ് സുനിൽകുമാർ വിജയിക്കുമെന്നാണ് ഇന്റലിജൻസ് വൃത്തങ്ങളെ അവലംബിച്ചു മാധ്യമം വാർത്തയിൽ പറയുന്നത്. അതേസമയം സംസ്ഥാനത്ത് തെരഞ്ഞെടുപ്പിൽ യുഡിഎഫിന് മേൽക്കൈയെന്നാണ് റിപ്പോർട്ടുകൾ വ്യക്തമാക്കുന്നത്.
എൽ.ഡി.എഫിന്റെ സിറ്റിങ് മണ്ഡലമായ ആലപ്പുഴ അടക്കം 14 എണ്ണം യു.ഡി.എഫിനെന്നും ശേഷിച്ച നാലെണ്ണത്തിൽ യു.ഡി.എഫും എൽ.ഡി.എഫും ഒപ്പത്തിനൊപ്പമെന്നുമാണ് റിപ്പോർട്ട്. ആറ്റിങ്ങൽ, മാവേലിക്കര, ചാലക്കുടി, പാലക്കാട് എന്നിവയാണ് ഇവ. സംസ്ഥാന സർക്കാറിനെതിരായ ഭരണവിരുദ്ധ വികാരം യു.ഡി.എഫിനെ തുണക്കുമെന്നും ഇക്കാരണത്താൽ ഈ നാല് മണ്ഡലങ്ങളിൽ മിക്കതും യു.ഡി.എഫ് സാധ്യത നിലനിൽക്കുന്നുവെന്നും രഹസ്യാന്വേഷണ വിഭാഗം പറയുന്നു.
തിരുവനന്തപുരത്ത് രാജീവ് ചന്ദ്രശേഖറിന് സിറ്റിങ് എംപി യു.ഡി.എഫിലെ ശശി തരൂരിനേക്കാൾ ചലനമുണ്ടാക്കാൻ കഴിഞ്ഞുവെന്നും മികച്ച പ്രതിച്ഛായ അദ്ദേഹത്തിനുണ്ടെന്നും കേന്ദ്ര ഏജൻസി വിലയിരുത്തുന്നു. രാഷ്ട്രീയത്തിനും സമുദായ നേതൃത്വങ്ങളുടെ ആഹ്വാനങ്ങൾക്കുമപ്പുറം തീരദേശം അദ്ദേഹത്തെ പിന്തുണച്ചെന്നാണ് നിഗമനം. ആറ്റിങ്ങലിൽ വി. മുരളീധരൻ ബഹുദൂരം മുന്നിലെത്തിയെന്നും റിപ്പോർട്ടിലുണ്ട്. തൃശൂരിൽ ബിജെപിക്ക് പ്രതീക്ഷിച്ചപോലെ മുന്നേറ്റമുണ്ടാക്കാൻ കഴിഞ്ഞില്ല. വിവാദങ്ങളും ബിജെപിയിലെ പ്രശ്‌നങ്ങളും പ്രതികൂലമായി ബാധിച്ചു.
രണ്ടുമാസം മുമ്പുണ്ടായിരുന്ന അനുകൂല തരംഗം നഷ്ടമായെന്നും വ്യക്തമാക്കുന്ന റിപ്പോർട്ട്, വി എസ്. സുനിൽകുമാർ എൽ.ഡി.എഫിന്റെയും കെ. മുരളീധരൻ യു.ഡി.എഫിന്റെയും സ്ഥാനാർത്ഥികളായതും സാധ്യത ഇല്ലാതാക്കിയെന്ന് വിലയിരുത്തുന്നു. പത്തനംതിട്ടയിൽ അനിൽ ആന്റണി കഴിഞ്ഞ തവണ എൻ.ഡി.എ നേടിയതിനേക്കാൾ കൂടുതൽ വോട്ട് പിടിക്കും. വടകരയിലും കോഴിക്കോട്ടും ബിജെപിക്ക് വോട്ട് വർധിക്കും. കെ.സി. വേണുഗോപാലിന്റെ സ്ഥാനാർത്ഥിത്വമാണ് കോൺഗ്രസിന് ആലപ്പുഴയിൽ നേട്ടമായത്. ശോഭ സുരേന്ദ്രന്റെ സ്ഥാനാർത്ഥിത്വം ആലപ്പുഴയിൽ സിപിഎമ്മിന് തിരിച്ചടിയാകും.
മുസ്‌ലിം ലീഗിന് മലബാറിൽ അടിതെറ്റില്ല. ഇഞ്ചോടിഞ്ച് പോരാട്ടം നടന്ന വടകരയിൽ വിജയം ഷാഫി പറമ്പിലിനാകും. കണ്ണൂരിൽ കെപിസിസി പ്രസിഡന്റ് കെ. സുധാകരന്റെ വിജയവും ഏറെക്കുറെ ഉറപ്പാണ്. രാഹുൽഗാന്ധി കേരളത്തിൽ മത്സരിക്കുന്നതിന്റെ ഗുണം എല്ലാ തലത്തിലും ഇക്കുറിയും യു.ഡി.എഫിന് കിട്ടുമെന്നും നിഗമനമുണ്ട്. തെരഞ്ഞെടുപ്പിലെ അവസാനവട്ട പ്രചാരണം വിലയിരുത്തിയാണ് റിപ്പോർട്ട് തയാറാക്കിയിട്ടുള്ളതെന്നുമാണ് മാധ്യമ വാർത്തയിൽ പറയുന്നത്.
താൻ ജയിക്കുമെന്ന കാര്യത്തിൽ ഒരു സംശയവുമില്ലെന്ന് തിരുവനന്തപുരം മണ്ഡലത്തിലെ യുഡിഎഫ് സ്ഥാനാർത്ഥി ശശി തരൂർ ഇന്നലെ പ്രതികരിച്ചത്. ഇക്കാര്യത്തിൽ പാർട്ടി പ്രവർത്തകരും തികഞ്ഞ ആത്മവിശ്വാസത്തിലാണെന്ന് ശശി തരൂർ മാധ്യമങ്ങളോട് പ്രതികരിച്ചിരുന്നു. തരൂർ ആത്മവിശ്വാസം പ്രകടിപ്പിക്കുന്നതിനിടെയാണ് രാജീവ് ചന്ദ്രശേഖർ വിജയിക്കുമെന്ന വിധത്തിൽ റിപ്പോർട്ടുകൾ പുറത്തുവരുന്നത്.
