ടെഹ്‌റാൻ: കഴിഞ്ഞാഴ്ച ഇസ്രയേൽ ഇറാന് തിരിച്ചടി നൽകിയത് ഒരു ഈച്ച പോലും അറിയാതെ. ഇറാന്റെ വ്യോമ പ്രതിരോധ സംവിധാനത്തെ പൂർണമായി കബളിപ്പിച്ചാണ് ഇസ്രയേൽ വ്യോമസേന ഡ്രോണുകളും മിസൈലുകളും ഇസ്ഫഹൻ പ്രവിശ്യ ലാക്കാക്കി തൊടുത്തുവിട്ടത്. ഇറാന്റെ ആണവ കേന്ദ്രവും, മിസൈൽ വേധ സംവിധാനവും ഒക്കെ ക്രമീകരിച്ചിരിക്കുന്ന സ്ഥലമാണ് ഇസ്ഫഹൻ.

ആക്രമണം നടത്തിയതായി ഇസ്രയേലോ, ആക്രമണം നടന്നതായി ഇറാനോ ഇതുവരെ പരസ്യമായി പറഞ്ഞിട്ടില്ല. ഇസ്രയേൽ വ്യോമസേന യുദ്ധവിമാനത്തിൽ നിന്നാണ് ഡ്രോണുകളും, മിസൈലുകളും തൊടുത്തുവിട്ടതെന്നാണ് റിപ്പോർട്ടുകൾ. ഇസ്രയേൽ ആക്രമിച്ച പ്രദേശത്തിന്റെ ഉപഗ്രഹ ചിത്രങ്ങൾ ബിബിസിയും, ദി ന്യൂയോർക്ക് ടൈംസും വിശലകനം ചെയ്ത് റിപ്പോർട്ട് ചെയ്തു. ഇസ്ഫഹൻ അന്താരാഷ്ട്ര വിമാനത്താവളത്തിന്റെ വടക്ക് കിഴക്കായി റഷ്യൻ നിർമ്മിത എസ് 300 ഭൂതല-വ്യോമ ബാലിസ്റ്റിക് മിസൈൽ വേധ സംവിധാനം ഏപ്രിൽ 15 ലെ ഉപഗ്രഹ ചിത്രത്തിൽ കാണാം. എന്നാൽ, ഏപ്രിൽ 19 ലെ ഗൂഗിൾ ഏർത്ത് ചിത്രത്തിൽ സ്ഥലം ശൂന്യമാണ്. എസ്-300 മിസൈൽ പ്രതിരോധ സംവിധാനത്തിന്റെ പൊടി പോലുമില്ല കണ്ടുപിടിക്കാൻ. ആക്രമണം നടന്ന സ്ഥലത്തിന്റെ വടക്കുഭാഗത്തായാണ് നതാൻസിലെ ആണവ കേന്ദ്രം.

ഒരു ഈച്ച പോലും അറിയാതെ ഇസ്രയേൽ ആക്രമണം

ഇറാന്റെ വ്യോമപ്രതിരോധ സംവിധാനം റഡാറുകൾ, മിസൈൽ വിക്ഷേപണികൾ എന്നിവയടക്കം നിരവധി ഉപകരണങ്ങൾ അടങ്ങുന്നതാണെന്ന് ബിബിസി വിശകലനത്തിൽ പറയുന്നു. ഇറാൻ വ്യോമ പ്രതിരോധ സംവിധാനത്തെ പൂർണമായി കബളിപ്പിച്ചുകൊണ്ടാണ് ഇസ്രയേലിന്റെ ഡ്രോണുകളും മിസൈലുകളും ലക്ഷ്യം കണ്ടത്.

കഴിഞ്ഞ വെള്ളിയാഴ്ച ഇറാന്റെ വ്യോമമേഖലയിൽ ഒന്നും പ്രവേശിച്ചതായി ശ്രദ്ധയിൽ പെട്ടിട്ടില്ലെന്ന് രണ്ട് ഉന്നത ഇറാൻ അധികൃതരെ ഉദ്ധരിച്ച് ദി ന്യൂയോർക്ക് ടൈംസ് റിപ്പോർട്ട് ചെയ്തു. ഇറാന്റെ വ്യോമ പ്രതിരോധ സംവിധാനം സജീവമാക്കിയില്ലെന്നും മിസൈൽ ആക്രമണം നടന്നിട്ടില്ലെന്നുമാണ് ഇറാൻ സർക്കാരിനെ അനുകൂലിക്കുന്ന ഐആർഎഎയുടെ റിപ്പോർട്ട്. എന്നാൽ, ഉപഗ്രഹ ചിത്രങ്ങൾ വിശകലനം ചെയ്ത് ബിബിസിയും, ദി ന്യൂയോർക്ക് ടൈംസും റിപ്പോർട്ട് ചെയ്യുന്നത്, ഇസ്ഫഹനിലെ വ്യോമ പ്രതിരോധ സംവിധാനത്തിന് കാര്യമായ തകരാർ സംഭവിച്ചെന്നാണ്.

ഇറാനും 'അയൺ ഡോം' ഉണ്ട്

ഹമാസിന്റെ മിസൈലുകളെ ചെറുക്കാൻ ഇസ്രയേൽ സജ്ജീകരിച്ചിട്ടുള്ള അയൺഡോം പോലൊന്ന് ഇറാനും ഉണ്ട്. മിസൈൽവേധ സംവിധാനത്തിന്റെ പേര് സ്‌കൈ ഡിഫൻഡേഴ്സ് വെലായത് 1400 എന്നാണ്. ക്രൂയിസ് മിസൈലുകളെ നേരിടാനാണ് പ്രധാനമായും പുതിയ സംവിധാനം വികസിപ്പിച്ചത്. ഒറ്റത്തവണ 12 മിസൈൽ വേധ റോക്കറ്റുകൾ വിക്ഷേപിക്കാം. റഷ്യയുടെ എസ് 300 മിസൈൽ സംവിധാനവുമായി സാമ്യമുള്ള ബവാർ 373 ഇടയ്ക്ക് റഷ്യ വികസിപ്പിച്ചെടുത്തിരുന്നു. ഇറാനിൽ എവിടെയെല്ലാം ഇത് ഉപയോഗിക്കുന്നുണ്ടെന്ന് വ്യക്തമല്ല

ബിബിസി, ദി ന്യൂയോർക്ക് ടൈംസ് റിപ്പോർട്ടുകൾ

ബിബിസി റിപ്പോർട്ട് പ്രകാരം, എസ് 300 മിസൈൽ പ്രതിരോധ സംവിധാനത്തിന്റെ റഡാറുകൾ ഇസ്രയേൽ ആക്രമണത്തിൽ തകർന്നു. എന്നാൽ, മിസൈൽ വിക്ഷേപണികൾക്ക് സാരമായ കേടുപാടുണ്ടായില്ല. മിസൈലിനെ ലക്ഷ്യത്തിലേക്ക് നയിക്കുന്നത് റഡാറാണ്. അതുകൊണ്ട് തന്നെ ഇറാന്റെ പ്രതിരോധ സംവിധാനത്തിലെ സുപ്രധാന ഘടകത്തിലാണ് തകരാർ സംഭവിച്ചത്. ഇറാൻ ഭരണകൂടത്തിന്റെ വിമർശകരായ വാർത്താ ഏജൻസി ഇറാൻ ഇന്റർനാഷണലും ഇതു ശരി വയ്ക്കുന്നു. ' ഭുതല-വ്യോമ മിസൈലുകളുടെ ദിശ നിർണയിക്കുന്ന റഡാർ ഇസ്രയേൽ ആക്രമണത്തിൽ തകർന്നിട്ടുണ്ട്'-വാർത്താ ഏജൻസി പറഞ്ഞു.

ഇസ്രയേൽ ആക്രമണം ഉണ്ടാക്കിയ നഷ്ടത്തിന്റെ തോത് വ്യക്തമല്ല. എന്തുതരം ആയുധങ്ങളാണ് ഇസ്രയേൽ ഉപയോഗിച്ചതെന്ന കാര്യത്തിലും വ്യക്തതയില്ല. എന്നിരുന്നാലും, ഇറാന്റെ പ്രതിരോധ സംവിധാനത്തെ വളരെ രഹസ്യമായി ഭേദിക്കാൻ തങ്ങൾക്ക് കഴിയുമെന്ന സന്ദേശമാണ് ഇസ്രയേൽ നൽകിയതെന്ന് ദി ന്യൂയോർക്ക് ടൈംസ് റിപ്പോർട്ട് ചെയ്തു. ഇസ്രയേലിന്റെ മിസൈലോ, വിമാനമോ, ജോർദ്ദാന്റെ വ്യോമമേഖലയിൽ പ്രവേശിക്കുകയും ചെയ്തിട്ടില്ല.

റഷ്യയുടെ എസ്-300

വർഷങ്ങളുടെ ചർച്ചകൾക്ക് ശേഷമാണ് ഇറാന് എസ്-300 വ്യോമ പ്രതിരോധ സംവിധാനത്തിന്റെ വിതരണം 2016 ൽ പൂർത്തിയാക്കിയത്.

റഷ്യൻ നടപടിയിൽ ഇസ്രയേൽ ആശങ്ക പ്രകടിപ്പിച്ചിരുന്നു. പാശ്ചാത്യ രാജ്യങ്ങളുടെ സമ്മർദ്ദത്തെ തുടർന്നാണ് റഷ്യ കരാർ അവസാനിപ്പിച്ചത്.