മധ്യപ്രദേശ് മോഡൽ പരീക്ഷണം രാജസ്ഥാനിലും; മുതിർന്ന കേന്ദ്രമന്ത്രിമാരെ തെരഞ്ഞെടുപ്പു രംഗത്തിറക്കാൻ ബിജെപി; കേന്ദ്ര നേതൃത്വത്തിന്റെ നീക്കത്തില് വസുന്ധര രാജെ കടുത്ത അതൃപ്തിയിൽ

ന്യൂഡൽഹി: നിയമസഭ തെരഞ്ഞെടുപ്പ് നടക്കുന്ന രാജസ്ഥാനിലും മധ്യപ്രദേശിന്റെ മാതൃകയിൽ കേന്ദ്രമന്ത്രിമാരെ രംഗത്തിറക്കാൻ ബിജെപി. രാജസ്ഥാനിൽ മുന്മുഖ്യമന്ത്രി വസുന്ധര രാജെ സിന്ധ്യയെ വീണ്ടും മത്സരിപ്പിക്കുമോ എന്നതിൽ അനിശ്ചിതത്വം നിലനിൽക്കെയാണ് ബിജെപി കേന്ദ്രനേതൃത്വത്തിന്റെ പുതിയ നീക്കം. കുറച്ചുകാലമായി കേന്ദ്രനേതൃത്വവുമായി ഉടക്കിലാണ് വസുന്ധര. തന്നെ ഒതുക്കാൻ ശ്രമിക്കുന്നു എന്നതാണ് വസുന്ധരയുടെ പരാതി.

കേന്ദ്ര ജലശക്തി മന്ത്രി ഗജേന്ദ്ര സിങ് ശെഖാവത്ത്, നിയമമന്ത്രി അർജുൻ രാം മേഘ്വാൾ, മുൻ കേന്ദ്രമന്ത്രിയും എംപിയുമായ രാജ്യവർധൻ സിങ് റാത്തോഡ്, രാജ്സമന്ദിൽ നിന്നുള്ള എംപി ദിയാ കുമാരി എന്നിവരെ മത്സരരംഗത്തിറക്കുമെന്നാണ് റിപ്പോർട്ടുകൾ. മുഖ്യമന്ത്രി സ്ഥാനാർത്ഥിയെ മുൻകൂട്ടി തീരുമാനിക്കേണ്ടതില്ലെന്നുമാണ് ബിജെപിയുടെ തീരുമാനം.

വിജയിച്ച എംഎൽഎമാർ മുഖ്യമന്ത്രിയെ തീരുമാനിക്കട്ടെ എന്നാണ് കേന്ദ്ര നേതൃത്വത്തിന്റെ നിലപാട്. നിയമസഭ തെരഞ്ഞെടുപ്പിൽ തന്നെ പാർട്ടിയുടെ മുഖമായി ഉയർത്തിക്കാട്ടാത്തതിൽ വസുന്ധര രാജെ സിന്ധ്യ കടുത്ത അതൃപ്തിയിലാണ്. ബിജെപിക്ക് അധികാരം ലഭിച്ചാൽ ഗജേന്ദ്ര സിങ് ശെഖാവത്തിനെയും മുഖ്യമന്ത്രി സ്ഥാനത്തേക്ക് പരിഗണിച്ചേക്കും.

കഴിഞ്ഞ ലോക്സഭ തെരഞ്ഞെടുപ്പിൽ ജോധ്പൂർ മണ്ഡലത്തിൽ, മുഖ്യമന്ത്രി അശോക് ഗെഹലോട്ടിന്റെ മകൻ വൈഭവ് ഗെഹലോട്ടിനെ പരാജയപ്പെടുത്തിയാണ് ഗജേന്ദ്ര സിങ് ശെഖാവത്ത് എംപിയായത്. 85 വയസ്സുകാരനും ആറു തവണ എംഎൽഎയുമായ സൂര്യകാന്ത വ്യാസിന് ഇത്തവണ സ്ഥാനാർത്ഥിത്വം നൽകിയേക്കില്ലെന്നുമാണ് റിപ്പോർട്ട്.