പതിറ്റാണ്ടുകൾ നീണ്ട തടസ്സങ്ങളെ പിന്നിലാക്കി ചരിത്രത്താളുകളിലേക്ക്; വനിതാ സംവരണ ബിൽ രാജ്യസഭയും പാസാക്കി; ലോക്സഭയിൽ രണ്ടുപേർ എതിർത്തെങ്കിൽ രാജ്യസഭയിൽ ബില്ലിന് ഏകകണ്ഠമായി അംഗീകാരം; രാജ്യത്ത് സ്ത്രീശാക്തീകരണത്തിന്റെ നിർണായക ചുവടുവയ്പാണിതെന്ന് പ്രധാനമന്ത്രി; ആറുവർഷം കാത്തിരിക്കാതെ നിയമം ഉടൻ നടപ്പാക്കണമെന്ന് പ്രതിപക്ഷവും
ന്യൂഡൽഹി: പതിറ്റാണ്ടുകൾ നീണ്ട തടസ്സങ്ങൾക്ക് ശേഷം വനിതാ സംവരണ ബിൽ രാജ്യസഭയുടെയും കടമ്പ കടന്നതോടെ ചരിത്രം കുറിച്ചു. ഇനി ലോക്‌സഭയിലും, സംസ്ഥാന നിയമസഭകളിലും, വനിതകൾക്ക് 33 ശതമാനം സംവരണത്തിന് ബില്ലിൽ രാഷ്ട്രപതി ഒപ്പുവയ്ക്കണം.
ലോക്സഭയിൽ, രണ്ടുഅംഗങ്ങൾ ബില്ലിനെ എതിർത്തെങ്കിൽ, രാജ്യസഭയിൽ അംഗങ്ങൾ ഏകകണ്ഠമായി പിന്തുണച്ചു. നെഗറ്റീവ് വോട്ടുകളോ, വിട്ടുനിൽക്കലുകളോ ഉണ്ടായില്ല. 215 വോട്ടുകളുടെ ബലത്തിലാണ് രാജ്യസഭ ബിൽ പാസാക്കിയത്. ഇന്നലെ ലോക്സഭയിൽ 454 എംപിമാരാണ് ബില്ലിന് അനുകൂലമായി വോട്ടുചെയ്തത്. ലോക്സഭയിൽ പരമ്പരാഗതരീതിയിൽ ബാലറ്റ് പേപ്പർ ഉപയോഗിച്ച് വോട്ടെടുപ്പ് നടത്തിയാണ് ബില്ലിന് അംഗീകാരം നൽകിയതെങ്കിൽ രാജ്യസഭയിൽ ഇലക്ട്രോണിക് സാങ്കേതിക വിദ്യ ഉപയോഗിച്ചാണ് വോട്ടെടുപ്പ് നടത്തി ബിൽ പാസാക്കിയത്.
ബില്ലിനെ പിന്തുണച്ച എല്ലാവർക്കും പ്രധാനമന്ത്രി നരേന്ദ്ര മോദി നന്ദി പറഞ്ഞു. 'സംവാദങ്ങൾ വളരെ വിജയകരമായിരുന്നു. ഭാവിയിലും ഈ സംവാദം നമ്മളെ സഹായിക്കും. രാജ്യത്ത് സ്ത്രീശാക്തീകരണത്തിന്റെ നിർണായക ചുവടുവയ്പാണിത്', പ്രധാനമന്ത്രി നരേന്ദ്ര മോദി പറഞ്ഞു.
ലോക്‌സഭയിലെ പോലെ തന്നെ ബിൽ നടപ്പാക്കുന്നതിലെ കാലപരിധിയായിരുന്നു രാജ്യസഭയിലെയും മുഖ്യസംവാദ വിഷയം. സെൻസസും, മണ്ഡല പുനർനിർണയവും കഴിയാതെ നിയമം നടപ്പാകില്ല. അതായത് ആറുവർഷം കൂടി ഇനി കാത്തിരിക്കേണ്ടി വരും. പ്രതിപക്ഷ സഖ്യമായ ഇന്ത്യ നിയമം ഉടൻ നടപ്പാക്കണമെന്ന ആവശ്യക്കാരായിരുന്നു.
' ഈ ബില്ലിന്റെ ഭേദഗതി ബുദ്ധിമുട്ടുള്ളതല്ല. നിങ്ങൾക്കിത് ഇപ്പോൾ തന്നെ ചെയ്യാവുന്നതേയുള്ളു. 2031 വരെ നീട്ടി വയ്‌ക്കേണ്ട കാര്യമെന്താണ്? , കോൺഗ്രസ് അദ്ധ്യക്ഷൻ മല്ലികാർജ്ജുൻ ഖാർഗെ ചോദിച്ചു. വനിതാ ശാക്തീകരണത്തെ ബിജെപി ഗൗരവത്തോടെ കാണുന്നില്ലെന്ന് തൃണമൂലിന്റെ ഡെറക് ഒബ്രിയാൻ വിമർശിച്ചു. എൻഡിഎ ഭരിക്കുന്ന 16 സംസ്ഥാനങ്ങളിൽ ഒരു വനിതയെ പോലും മുഖ്യമന്ത്രിയാക്കാൻ ശ്രമിച്ചില്ല, ഒബ്രിയാൻ കുറ്റപ്പെടുത്തി.
' ആരാണ് ഇനി അധികാരത്തിൽ വരിക എന്നറിയില്ല. എന്നാൽ ബിജെപി അധികാരത്തിലുണ്ടെങ്കിൽ 2026നകം സംവരണം നടപ്പിലായില്ലെങ്കിൽ രാജിവയ്ക്കുമെന്ന് സഭയ്ക്കു ഉറപ്പു നൽകാൻ പ്രധാനമന്ത്രിയും ആഭ്യന്തര മന്ത്രിയും തയാറാകണം, കപിൽ സിബൽ ആവശ്യപ്പെട്ടു.
സ്ത്രീകളുമായി ബന്ധപ്പെട്ട വിഷയങ്ങളിൽ, ബിജെപി രാഷ്ട്രീയം കളിക്കാറില്ലെന്നായിരുന്നു മന്ത്രി നിർമല സീതാരാമന്റെ വാദം. ചരിത്രപരമായ ബിൽ പാസാക്കിയതിലൂടെ പുതിയ പാർലമെന്റ് മന്ദിരത്തിന് നല്ല തുടക്കം ഇട്ടിരിക്കുകയാണെന്നും നിർമല പറഞ്ഞു.
ബില്ല് ലോക്സഭയിൽ കേന്ദ്ര നിയമമന്ത്രി അർജുൻ മേഘ്വാൾ ചൊവ്വാഴ്ചയാണ് അവതരിപ്പിച്ചത്. ചർച്ചകൾക്കൊടുവിൽ ബുധനാഴ്ച ബിൽ പാസാക്കുകയായിരുന്നു. പട്ടിക ജാതി-വർഗ വിഭാഗങ്ങൾക്കായി സംവരണം ചെയ്ത സീറ്റുകളുടെ മൂന്നിലൊന്നും ബില്ലിൽ വനിതകൾക്കായി സംവരണം ചെയ്യുന്നുണ്ട്. പൂർണ സംസ്ഥാനപദവിയില്ലാത്ത ഡൽഹിയിലെ നിയമസഭയിലും സമാനമായ സംവരണമാണ് ബില്ലിൽ വ്യവസ്ഥ ചെയ്യുന്നത്. 15 വർഷത്തേക്കായിരിക്കും ഒരുസീറ്റ് വനിതാസംവരണമായി നിലനിർത്തുക. ഓരോ മണ്ഡല പുനർനിർണയത്തിനുംശേഷം വനിതാസംവരണ സീറ്റുകൾ റൊട്ടേഷൻ അടിസ്ഥാനത്തിൽ മാറും. ഇത് സംബന്ധിച്ച് 334-എ എന്ന അനുച്ഛേദം ബില്ലിൽ പുതുതായി ഉൾപ്പെടുത്തിയിട്ടുണ്ട്.
33 ശതമാനം വനിതാ സംവരണം നടപ്പാക്കണമെങ്കിൽ സെൻസസും, മണ്ഡല പുനർനിർണയവും നടത്തണം. അടുത്ത വർഷത്തെ ലോക്സഭാ തിരഞ്ഞെടുപ്പിന് ശേഷം മണ്ഡല പുനർനിർണയ കമ്മീഷൻ രൂപീകരിക്കും. എല്ലാ പാർട്ടി പ്രതിനിധികളെയും ഉൾപ്പെടുത്തിയായിരിക്കും കമ്മീഷൻ. അതിനൊപ്പം സെൻസസും നടത്തും. വനിതാ ക്വാട്ട 2029 ഓടെ നടപ്പാക്കാൻ കഴിയുമെന്നാണ് പ്രതീക്ഷിക്കുന്നത്.
ഭരണഘടനയുടെ 82 ാം വകുപ്പ് പ്രകാരം, 2026 ന് ശേഷമുള്ള സെൻസസ് ഡാറ്റ മാത്രമേ മണ്ഡല പുനർനിർണയത്തിന് ഉപയോഗിക്കാൻ സാധിക്കുകയുള്ളു. ഈ കടമ്പ സർക്കാർ എങ്ങനെ കടക്കുമെന്ന് വ്യക്തമല്ല. കഴിഞ്ഞ മണ്ഡല നിർണയ പ്രക്രിയ 18 മാസം നീണ്ടു നിന്നിരുന്നു. ഓരോ സംസ്ഥാനത്തും പബ്ലിക് ഹിയറിങ്ങുമായി 211 യോഗങ്ങൾ നടന്നിരുന്നു. പാർലമെന്റിൽ 7 മണിക്കൂർ നീണ്ട സംവാദത്തിൽ വനിതാ സംവരണ ബിൽ കാലതാമസം കൂടാതെ നടപ്പാക്കണമെന്നാണ് പ്രതിപക്ഷം ആവശ്യപ്പെട്ടത്.
എന്നാൽ, മണ്ഡല പുനർനിർണയ കമ്മീഷൻ സുപ്രധാനമാണെന്നും കമ്മീഷന് മാത്രമേ ആ ചുമതല നിർവഹിക്കാൻ കഴിയു എന്നും അമിത് ഷാ പറഞ്ഞു. ' നമ്മൾ മൂന്നിലൊന്ന് സീറ്റ് സംവരണം ചെയ്യുകയാണെങ്കിൽ അത് ആരു ചെയ്യും? ഞങ്ങൾ അതുനിർവ്വഹിച്ചാൽ, നിങ്ങൾ ചോദ്യം ചെയ്യും. വയനാടോ, ഹൈദരാബാദോ വനിതാ സംവരണമാക്കിയാൽ നിങ്ങൾ അത് രാഷ്ട്രീയമാണെന്ന് പറയും, അമിത് ഷാ രാഹുലിനെ പരോക്ഷമായി കളിയാക്കി കൊണ്ടുപറഞ്ഞു. നേരത്തെ, വനിതാ ക്വാട്ട നടപ്പിലാക്കാൻ സർക്കാർ എന്തിന് പുതിയ സെൻസസും, മണ്ഡല പുനർനിർണയവും നടത്തുന്നുവെന്ന് രാഹുൽ ഗാന്ധി ആരാഞ്ഞിരുന്നു. ബിൽ ഈ നിലയിൽ അപൂർണമാണെന്നും ഒബിസി സംവരണം ഉൾപ്പെടുത്തണമെന്നും രാഹുൽ ആവശ്യപ്പെട്ടിരുന്നു. എന്തായാലും മണ്ഡല പുനർനിർണയം സുതാര്യമായി നടത്താൻ കമ്മീഷൻ തന്നെയാണ് ഉചിതമെന്നും അമിത്ഷാ തീർത്തുപറഞ്ഞു.
പത്തുവർഷം കൂടുമ്പോൾ നടത്തുന്ന ജനസംഖ്യാ കണക്കെടുപ്പിന് ആനുപാതികമായി ഒരു പുനഃപരിശോധനക്ക് ഭരണഘടന വ്യവസ്ഥ ചെയ്യുന്നുണ്ട്. 1961ലെയും 1971ലെയും ജനസംഖ്യാ കണക്കെടുപ്പിന് ശേഷം അതിൻപ്രകാരം മണ്ഡല പുനർവിഭജനം നടത്തുകയുണ്ടായി. എന്നാൽ, 1976ൽ ഒരു ഭരണഘടനാ ഭേദഗതിയിലൂടെ അത് അവസാനിപ്പിച്ചു. ഓരോ സംസ്ഥാനത്തിന്റെയും സീറ്റ് വിഹിതം 2001ലെ സെൻസസ് കഴിയുംവരെ മരവിപ്പിച്ചതായി വ്യവസ്ഥ ചെയ്തു.
ജനസംഖ്യാ വർദ്ധനവിന്റെ അടിസ്ഥാനത്തിൽ രാജ്യത്ത് 2002ൽ മണ്ഡല പുനർനിർണയം നടത്തേണ്ടതായിരുന്നു. അത് 84ാം ഭരണഘടനാ ഭേദഗതിയിലൂടെ മരവിപ്പിച്ചിരിക്കയാണ്. അതനുസരിച്ച് 2026ന് ശേഷം നടത്തുന്ന സെൻസസിലെ വിവരങ്ങളുടെ അടിസ്ഥാനത്തിലാണ് മണ്ഡല പുനർനിർണയം നടത്തേണ്ടത്. 2021ൽ നടത്തേണ്ടിയിരുന്ന സെൻസസിന്റെ നടപടികൾ പൂർത്തിയായ ശേഷമാവും ഇനി മണ്ഡല പുനർനിർണയം. 1951 -52ലെ ആദ്യ തിരഞ്ഞെടുപ്പിൽ ആദ്യ ലോക്‌സഭ 489സീറ്റുമായി നിലവിൽ വന്നു. പിന്നീട് മണ്ഡലം പുനർനിർണയങ്ങളിലാണ് നിലവിൽ 543 സീറ്റായത്. 1952, 1963, 1973, 2002 വർഷങ്ങളിലാണ് മണ്ഡലം പുനർനിർണയ കമ്മിഷനുകളെ നിയമിച്ചത്. .
