'ഞാൻ റബർ സ്റ്റാമ്പല്ല; ബില്ലുമായി ബന്ധപ്പെട്ട ചോദ്യങ്ങളിൽ മുഖ്യമന്ത്രി നേരിട്ടെത്തി വിശദീകരണം നൽകണം': രാജ്ഭവൻ മാർച്ച് അക്രമത്തിന്റെ ഭാഷയെന്നും തന്റെയടുത്ത് അത് വിലപ്പോവില്ലെന്നും ഗവർണർ

തിരുവനന്തപുരം: മുഖ്യമന്ത്രിയുടെ പരാമർശങ്ങൾക്ക് മറുപടിയുമായി ഗവർണർ. താൻ റബർ സ്റ്റാംപ് അല്ലെന്ന് ആരിഫ് മുഹമ്മദ് ഖാൻ പറഞ്ഞു. ബില്ലിലെ ചോദ്യങ്ങളിൽ മുഖ്യമന്ത്രി നേരിട്ട് വിശദീകരണം നൽകണമെന്നും അദ്ദേഹം പറഞ്ഞു. മാധ്യമങ്ങളോട് സംസാരിക്കുകയായിരുന്നു ഗവർണർ.

''ഞാൻ റബർ സ്റ്റാംപ് അല്ല. ബില്ലുമായി ബന്ധപ്പെട്ട ചോദ്യങ്ങളിൽ മുഖ്യമന്ത്രി നേരിട്ടെത്തി വിശദീകരണം നൽകണം. രാജ്ഭവൻ മാർച്ച് സമ്മർദ തന്ത്രമാണ്. അത് അക്രമത്തിന്റെ ഭാഷയാണ്. എന്റെയടുത്ത് അത് വിലപ്പോകില്ല. അധികം ചെലവിന് പണം ആവശ്യപ്പെട്ട് സർക്കാരും രാജ്ഭവനുമായി കത്തിടപാട് നടന്നുകാണും'' ഗവർണർ പറഞ്ഞു.

നിയമസഭ പാസാക്കിയ ബില്ലുകളിൽ ഒപ്പിടാത്ത ഗവർണർ ആരിഫ് മുഹമ്മദ് ഖാനെ കഴിഞ്ഞ ദിവസം മുഖ്യമന്ത്രി പിണറായി വിജയൻ വിമർശിച്ചിരുന്നു. ''നിയമഭേദഗതിയിൽ ഗവർണർ ഒപ്പിടുന്നില്ലെങ്കിൽ രാജ്ഭവനിലേക്കു കൃഷിക്കാരുടെ സംഘടിതമായ മാർച്ച് നടത്തുമെന്ന് എൽഡിഎഫ് സംസ്ഥാന കമ്മിറ്റി തീരുമാനിച്ചു. എന്തിനും അതിരുണ്ട്. ആ അതിരുകൾ ലംഘിച്ചുപോകുന്ന അവസ്ഥയാണ്. നമ്മുടെ നാട്ടിൽ ഇതുപോലുള്ള കാര്യങ്ങൾക്കു തടസ്സം നിൽക്കുന്ന ചിലരുണ്ട്. അവർ അവരുടേതായ തടസ്സങ്ങളുമായി മുന്നോട്ട് പോകും'' എന്നായിരുന്നു ഗവർണർക്കെതിരെ മുഖ്യമന്ത്രിയുടെ വിമർശനം