പരിസ്ഥിതി സംരക്ഷണ നിയമം ലംഘിച്ച് ഖനനം: മീറോട് മല ചെങ്കൽ ക്വാറി പ്രവർത്തനങ്ങൾ നിർത്തി വെക്കാൻഉത്തരവ്; ഖനന മാഫിയയെ മുട്ടുകുത്തിച്ചത് മീറോട് മല സംരക്ഷണ വേദിയുടെ പ്രക്ഷോഭത്തെ തുടർന്ന്
കോഴിക്കോട്: ഖനന മാഫിയയ്‌ക്കെതിരെ പ്രദേശവാസികൾ നടത്തിയ പോരാട്ടം വിജയത്തിലേക്ക്. പേരാമ്പ്ര കീഴരിയൂർ മീറോട് മല ചെങ്കൽ ക്വാറി പ്രവർത്തനങ്ങൾ നിർത്തിവെക്കാന്മലിനീകരണ നിയന്ത്രണ ബോർഡ് ഉത്തരവിട്ടു. പരിസ്ഥിതി സംരക്ഷണ നിയമം ലംഘിച്ച് വ്യാപകമായി നടത്തിയ ചെങ്കൽ ഖനനത്തിനെതിരെഖനനമാഫിയയ്ക്ക് കാരണം കാണിക്കൽ നോട്ടീസ് അയച്ചു. മീറോട് മല സംരക്ഷണ വേദി മുഖ്യമന്ത്രിയുടെ പൊതുജന പരാതി പരിഹാര സെൽ മുഖേന പരാതി നൽകിയതിന്റെ അടിസ്ഥാനത്തിലാണ് നടപടി.
ചെങ്കൽ ക്വാറി പ്രവർത്തിച്ചത് മലിനീകരണ നിയന്ത്രണ ബോർഡിന്റെ അനുമതി ഇല്ലാതെയാണെന്ന് പരാതി ഉയർന്നിരുന്നു.കഴിഞ്ഞ ദിവസം മലിനീകരണ നിയന്ത്രണബോർഡ് ഉദ്യോഗസ്ഥർ മീറോട് മല സന്ദർശിച്ചിരുന്നു. ക്വാറിക്കെതിരെയുള്ള പ്രദേശവാസികളുടെ നിരന്തര സമരത്തിനെ തുടർന്ന് ജില്ലാ കളക്ടറും കഴിഞ്ഞ ജനുവരിയിൽ മല സന്ദർശിച്ചിരുന്നു.താലൂക്കിലെ കീഴരിയൂർ ,മേപ്പയ്യൂർ,തുറയൂർ പഞ്ചായത്തുകളിലെ നരക്കോട്, കീഴരിയൂർ, കൊറവട്ട, ഇരിങ്ങത്ത്കുളങ്ങര പ്രദേശങ്ങളുടെ നിലനിൽപ്പിന്റെ ആധാരമായ മീറോട് മലയിലെ ഖനനത്തിനെതിരെ വലിയ പ്രക്ഷോഭമായിരുന്നു പ്രദേശത്ത് ഉയർന്നു വന്നത്.
മേഖലയിലെ ജനങ്ങളുടെ കുടിവെള്ളം, കൃഷി,ഭക്ഷണം,ശുദ്ധവായു, തൊഴിൽ തുടങ്ങിയവയെല്ലാം മലയുമായി പ്രത്യക്ഷമായോ പരോക്ഷമായോ ബന്ധപ്പെട്ടു കിടക്കുന്നതാണ്.മലയുടെഘടനയിൽ ഉണ്ടാകുന്ന ഏതൊരു മാറ്റവും താഴ്‌വരയിലെ ജനജീവിതത്തെ പ്രതികൂലമായി ബാധിക്കുമെന്ന് പ്രദേശവാസികൾ വ്യക്തമാക്കുന്നു. മിച്ചഭൂമിയായി സർക്കാർ ഏറ്റെടുത്ത 140 ഏക്കറും അതിലും കൂടുതലായുള്ള സ്വകാര്യ ഉടമസ്ഥതയിലുള്ള ഭൂമിയും ചേർന്നതാണ് മീറോട് മല.
ഒരിക്കലും വറ്റാത്ത നീരുറവകളുണ്ടായിരുന്ന ചമ്പഭാഗത്തെ ചോലയിൽപ്രദേശം വരണ്ടുണങ്ങുന്ന സ്ഥിതിയാണ് . കണിയാണ്ടി കൊല്ലി ഭാഗവും മഴ കഴിയുന്നതോടെ വരണ്ടുണങ്ങുന്നു. ഈ പ്രദേശങ്ങളിൽ കുടിവെള്ളക്ഷാമം ഓരോ വർഷം കഴിയുന്തോറും രൂക്ഷമായിക്കൊണ്ടിരിക്കുന്നതായും പരാതി ഉയർന്നിരുന്നു.
അസംഖ്യം അമൂല്യ ഔഷധ സസ്യങ്ങൾ, അപൂർവ്വയിനം ചിത്രശലഭങ്ങൾ, മയിലും പെരുമ്പാമ്പുമടക്കമുള്ള വിവിധയിനം പക്ഷിമൃഗാദികൾ തുടങ്ങിയവയാൽ സമൃദ്ധമായ മീറോട് മല ജൈവവൈവിധ്യത്തിന്റെ കലവറ കൂടിയാണെന്ന് പരിസ്ഥിതി സ്‌നേഹികൾ ചൂണ്ടിക്കാണിക്കുന്നു.
