വാഷിങ്ടൺ: ഇന്ത്യൻ അമേരിക്കൻ കോൺഗ്രസംഗം പ്രമീള ജയ്പാലിന്റെ നേതൃത്വത്തിൽ നാൽപത്തി ഏഴ് ലോ മേക്കേഴ്സ് ട്രമ്പിനെതിരെ കടുത്ത പ്രതിഷേധവുമായി രംഗത്ത്. കഴിഞ്ഞ ശനിയാഴ്ച ഷാർലെറ്റ് വില്ലയിൽ നടന്ന സംഭവത്തിനുശേഷം ട്രമ്പ് സ്വീകരിച്ച നിലപാടുകൾക്കെതിരെയാണ് ഇവർ പ്രതിഷേധവുമായി രംഗത്തെത്തിയിരിക്കുന്നത്.

ഓഗസ്റ്റ് 18ന് യു.എസ്. കോൺഗ്രസംഗം ജെറോൾഡ് നാഡ്ലർ, ബോണി വാട്ട്സൺ എന്നിവർ സ്പോൺസർ ചെയ്ത സെൻഷർ പ്രമേയം യു.എസ്. പ്രതിനിധി സഭയിൽ അവതരിപ്പിക്കുമെന്ന് പ്രമീള പറഞ്ഞു.

ആഭ്യന്തര ഭീകരതയും, വർദ്ധിച്ചുവരുന്ന വംശീയ അക്രമങ്ങളും നിയന്ത്രിക്കുന്നതിൽ ട്രമ്പ് ഭരണകൂടം പരാജയപ്പെട്ടതായും ഇവർ കുറ്റപ്പെടുത്തുന്നു. അമേരിക്കൻ ജനതയ്ക്കാകമാനം അപമാനകരമായ സംഭവമാണ് ശനിയാഴ്ച അരങ്ങേറിയതെന്നും നാഷ്ണൽ സിക്ക് ക്യാമ്പയ്ൻ കൊ.ഫൗണ്ടർ രജ്വന്ത് സിങ് പറഞ്ഞു.

മതവിശ്വാസത്തിന്റേയും, ജാതിയുടേയും, നിറത്തിന്റേയും പേരിൽ ഭിന്നിച്ചു നിൽക്കാതെ എല്ലാവരേയും ഒരുമിപ്പിച്ചു കൊണ്ടുപോകുന്നതിനുള്ള ശ്രമങ്ങളാണ് നടത്തേണ്ടതെന്നും സിങ് പറഞ്ഞു.