ശാന്തസുന്ദരമീ ഗ്രാമമൊരുനാൾ
നിദ്രയിലലിയാൻ വെമ്പൽ കൊൾകെ
ജീവിതമാമീയാത്ര മറ്റൊരിതൾകൂടി
പൊട്ടിവിടരാൻ കാത്തുനിൽക്കെ
കണ്ടു ഞാൻ നിന്നെയന്നാദ്യമായി
വിധിയുടെ അങ്കണത്തിലുയർന്നു
മറ്റൊരു കൗശലത്തിൻ തിരശ്ശീല
യാത്രയായി നമ്മൾ
മൈലുകൾ താണ്ടി
യാത്ര തുടർന്നു നമ്മൾ
യാത്രയിലങ്ങോളമിങ്ങോളം
പിന്തുടർന്നുവെൻ മിഴികൾ
കാത്തിരുന്നു ഞാനാനിമിഷത്തിനായി
നിൻ കടാക്ഷമെൻ മിഴികളിൽ
പതിയുന്നൊരാ നിമിഷത്തിനായി
മഴ കാത്തിരിക്കുന്ന വേഴാമ്പലോ ഞാൻ
വിടരാൻ കൊതിക്കുന്നൊരു മുല്ലമൊട്ടോ
ആരെയോ തേടുന്ന പോൽ അലയുന്ന നിൻ
മിഴികളിൽ തട്ടിയുടഞ്ഞോരെൻ കാത്തിരിപ്പ്
പുതുമഴയിൽ തളിർത്തൊരു പുതു-
നാമ്പുപോൽ തുള്ളിതളിർത്തുവെൻ മനം
പുലർക്കാല സുന്ദര സ്വപ്നങ്ങളോയിത്
മഴവില്ലിലാടുന്നൊരാ പൊന്മയിലോ
നിൻ മൊഴികളെൻ ഹൃദയത്തിൽ
പളുങ്കുമണികൾ പോൽ വീണുകിലുങ്ങി
രംഗമൊഴിഞ്ഞു ആളൊഴിഞ്ഞു
തുച്ചമാം വേദികൾ പങ്കിട്ട നാം
നിശ്ചലം നിശബ്ദം വേർപിരിഞ്ഞു
എങ്കിലും നിന്നോർമകൾ മങ്ങാതെയെൻ
മനസ്സിൽ നീന്തിതുടിക്കുമീ വേളയിൽ
മറ്റോരരങ്ങിനായി കാത്തിരിപ്പു
ആടുവാൻ പാടുവാൻ ആടിത്തിമിർക്കാൻ
അടങ്ങാത്തോരെൻ ദാഹം
അറിയുമോ ഓമലേ നീ എന്നാളിലും