പ്രിട്ടോറിയൻ പ്രവാസി മലയാളികളുടെ ഓണാഘോഷങ്ങൾ ഈ വർഷം സെപ്റ്റംബർ ഒൻപതിനു ലൊറേട്ട സ്‌കൂൾ, ക്യൂൻസ്‌വുഡ് പ്രിട്ടോറിയയിൽ ആഘോഷിക്കും. പ്രസിഡന്റ് ജസ്റ്റിൻ ജോർജ്, സെക്രട്ടറി ഐജിൻ ജോൺ, കോ ഓർഡിനേറ്റർ സൺലി ജോർജ് എന്നിവരുടെ നേതൃത്വത്തിൽ ചീഫ് ഗസ്റ്റായ റവ. ഫാ: അജിത് അലക്‌സാണ്ടറിന്റെയും (സൗത്ത് ആഫ്രിക്കൻ മാർത്തോമ്മ ചർച്ച്) അദ്ധ്യക്ഷനായ റവ. ഫാ: ജോമോൻ നെല്ലുവേലിയുടെയും (സീറോ മലബാർ കോ ഓർഡിനേറ്റർ, ജോഹന്നെസ്ബറി ഡയോസിസ്) വിലയേറിയ സാന്നിദ്ധ്യത്തിൽ ഓണപ്പുലരി 2017 ന് ആരംഭം കുറിക്കും.

വൈവിദ്ധ്യമായ കലാകായിക പരിപാടികളും ആകർഷകമായ വടംവലി മത്സരവും ഓണപ്പുലരിയിൽ മാറ്റു കൂട്ടുവാൻ സംഘാടകർ അണിയിച്ചൊരുക്കുന്നു. അത്തപ്പൂക്കളവും, മാവേലിമന്നനും വിവിധ രുചിഭേദങ്ങളോടു കൂടി ഓണസദ്യയും ഓണപ്പുലരിയിലെ മുഖ്യാകർഷകമാകും.

പ്രിട്ടോറിയയിലെയും സമീപ പ്രദേശങ്ങളിലുള്ള പ്രവാസി മലയാളികൾക്കും ഈ ഓണ സംഗമം ഓർമ്മയിൽ സൂക്ഷിക്കാനായി ഒരു സുദിനം സമ്മാനിക്കും.