തൃശ്ശൂർ: സ്വപ്‌ന ലോകത്താണോ താൻ ജീവിക്കുന്നത് എന്നറിയാത്ത അവസ്ഥയിലാണ് തൃശ്ശൂർ പൂങ്കുന്നത്തെ വാര്യർ കുട്ടി. ഒരു കണ്ണടക്കൽ കൊണ്ട് ലോകം മുഴുവൻ ശ്രദ്ധിക്കപ്പെടുന്ന ഇന്റർനെറ്റ് താരമായി പ്രിയ മാറിയിട്ടുണ്ട്. ഗൂഗിൽ സെർച്ചിൽ സാക്ഷാൽ സണ്ണി ലിയോണിനെ പോലും പ്രിയ വാര്യർ കടത്തിവെട്ടി. അന്താരാഷ്ട്ര തലത്തിൽ ട്രെൻഡിംഗാണ് പ്രിയ ഇപ്പോൾ. ഒമർ ലുലു ഒരുക്കുന്ന ഒരു അഡാർ ലൗവിലെ മാണിക്യ മലരായ പാട്ടിനെ സൈബർലോകം ഏറ്റെടുത്തപ്പോൾ ഏറ്റവും ശ്രദ്ധിച്ചത് പ്രിയയുടെ കണ്ണുകൊണ്ടുള്ള പ്രണയമായിരുന്നു.

ഒരു സ്‌കൂളിന്റെ പശ്ചാത്തലത്തിൽ ഒരുക്കിയിരിക്കുന്ന ഈ ഗാനത്തിൽ കൗമാരപ്രായക്കാരുടെ കുസൃതിയും പ്രണയവുമെല്ലാം ചിത്രീകരിച്ചിരിക്കുന്നു. കൂട്ടുകാരനെ നോക്കി പുരികക്കൊടി ഉയർത്തി കണ്ണിറുക്കിക്കാണിക്കുന്ന ഒരു കുസൃതിപ്പെണ്ണിനെ അവതരിപ്പിച്ച പ്രിയ ഇപ്പോൾ അത്ഭുതലോകത്തെത്തിയ ആലീസിന്റെ അവസ്ഥയിലാണ്. ഒരൊറ്റ സീൻ കൊണ്ട് ജീവിതം ഇങ്ങനെ മാറിമറയുമെന്ന് പ്രിയ പ്രതീക്ഷിച്ചില്ല.

ഒരു ദിവസം കൊണ്ട് ഇത്രയൊക്കെ സംഭവിക്കുമെന്ന് ഞാൻ കരുതിയില്ല. പാട്ട് പുറത്തിറങ്ങിയത് മുതൽ ഒരുപാട് പേർ എന്നെ വിളിച്ച് അഭിനന്ദിച്ചുവെന്നും പ്രിയ പറഞ്ഞു. ഒരുപാട് മെസേജുകൾ വരുന്നുണ്ട്. എല്ലാവരോടും നന്ദിയുണ്ടെന്ു തൃശ്ശൂർ വിമല കോളേജിലെ ബികോം വിദ്യാർത്ഥിനിയായ പ്രിയ പറയുന്നു. ഇന്നലെ കോളേജിലേക്ക് പ്രിയ എത്തിയത് കൂട്ടുകാരിളുടെ ആർപ്പുവിളികളുടെ അകമ്പടിയോടെ ആയിരുന്നു. ഇൻസ്റ്റഗ്രാമിൽ ദുൽഖർ സൽമാനേക്കാൾ ഫെയിമസായ താരമായി പ്രിയ മാറി. വിവിധ രാജ്യങ്ങളിൽ നിന്നുള്ളവരാണ് ഞൊടിയിടയിൽ പ്രിയയുടെ ആരാധകരായി മാരഇയത്.