കോതമംഗലം: മാർ അത്തനേഷ്യസ് കോളജ് മുൻ പ്രിൻസിപ്പലും കിറ്റെക്‌സ് ഗാർമെന്റ്‌സ് ഡയറക്ടറുമായ ഇരുമലപ്പടി ഇരുമല പ്രൊഫ. ഇ.എം. പൗലോസ്(85) നിര്യതനായി
സംസ്‌കാരം ഇന്ന് 11.30ന് കോട്ടപ്പടി നാഗഞ്ചേരി സെന്റ് ജോർജ് ഹെബ്രോൺ പള്ളിയിൽ നടക്കും. ഭാര്യ: നിമ്മി പോൾ. മക്കൾ: എക്യുമെനി പോൾ(എംഎ കോളജ്), പ്രസീദ പോൾ(കാനഡ). മരുമകൻ: എൽദോസ് ജോൺ(കാനഡ).
1963ൽ പത്തനംതിട്ട കാതോലിക്കേറ്റ് കോളജിൽ അദ്ധ്യാപനം തുടങ്ങിയ അദ്ദേഹം പിന്നീട് എംഎ കോളജ് ചരിത്ര വിഭാഗം തലവനും പ്രിൻസിപ്പലുമായി. എംഎ കോളജ് , യുസി കോളജ് എന്നിവിടങ്ങളിൽ ഗവേണിങ് ബോർഡ് അംഗമായിരുന്നു. വൈഎംസിഎ റീജനൽ ചെയർമാനായിരുന്ന അദ്ദേഹം വൈസ്മെൻ ഇന്റർനാഷനലിന്റെ മിഡ്വെസ്റ്റ് ഇന്ത്യ റീജനൽ ഡയറക്ടറുമായിരുന്നു.
മലങ്കര ഓർത്തഡോക്‌സ് ചർച്ച് മാനേജിങ് കമ്മിറ്റി അംഗമായി പ്രവർത്തിച്ചിട്ടുണ്ട്. 1971ൽ പോൾ ആറാമൻ മാർപ്പാപ്പയിൽ നിന്ന് പേപ്പൽ മെഡൽ ഏറ്റുവാങ്ങി. ആരംഭകാലം മുതൽക്കേ സാന്ത്വനം സ്‌പെഷൽ സ്‌കൂളിന്റെ പ്രവർത്തനങ്ങൾക്കു നേതൃത്വം നൽകി. വൈസ്മെൻ ഇന്റർനാഷനൽ പാവപ്പെട്ടവർക്കു ഭവനങ്ങൾ നിർമ്മിച്ചു നൽകിയപ്പോൾ അതിനു നേതൃത്വം നൽകി. ബിഹാർ വരൾച്ചക്കാലത്ത് ദുരിതാശ്വാസ നിധി സ്വരൂപിക്കാൻ നടത്തിയ ശ്രമങ്ങൾ പ്രധാനമന്ത്രിയായിരുന്ന ഇന്ദിരാഗാന്ധിയുടെ പ്രശംസ പിടിച്ചുപറ്റി.
സാംസ്‌കാരിക സംഘടനയായ 'കല'യുടെ പ്രസിഡന്റായിരുന്നു. എംജി സർവകലാശാല ബോർഡ് ഓഫ് സ്റ്റഡീസ് അംഗമായിരുന്ന അദ്ദേഹം ഹിസ്റ്ററി ഓഫ് ഇന്ത്യൻ വൈസ്ഡം, ദ് ഇൻഫ്‌ളുവൻസ് ഓഫ് ദ് സെർമൻ ഓൺ ദ് മൗണ്ട് ഓൺ മഹാത്മാഗാന്ധി എന്നീ പുസ്തകങ്ങൾ രചിച്ചിട്ടുണ്ട്. അന്ന കിറ്റെക്‌സ് ഗ്രൂപ്പ് സ്ഥാപകനായിരുന്ന പരേതനായ എം.സി. ജേക്കബ് അദ്ദേഹന്റെ സഹോദരീ ഭർത്താവാണ്.
