തിരുവനന്തപുരം: പ്രമുഖ ക്വിസ് മാസ്റ്ററും തിരുവനന്തപുരം മാർ ഇവാനിയോസ് കോളജ് ഇംഗ്ലീഷ് വിഭാഗം മുൻ മേധാവിയുമായ ഡോ. എബ്രഹാം ജോസഫ് അന്തരിച്ചു.60 വയസ്സായിരുന്നു. ശനിയാഴ്ച രാവിലെ തിരുവനന്തപുരത്തെ സ്വകാര്യ ആശുപത്രിയിൽ വച്ചായിരുന്നു അന്ത്യം.

അദ്ധ്യാപക ജീവിതത്തിനൊപ്പം തന്നെ വൈജ്ഞാനീക മേഖലയിലും സജീവസാന്നിദ്ധ്യമായിരുന്നു എബ്രഹാം ജോസഫ്.ക്വിസ് മാസ്റ്റർ രംഗത്ത് തന്റെതായ ശൈലി രൂപീകരിച്ച് അവതരണത്തിന് പുത്തൻ ശൈലി നൽകാനും അദ്ദേഹത്തിന് സാധിച്ചു.പ്രമുഖ ടെലിവിഷൻ ചാനലിൽ വർഷങ്ങളോളം ക്വിസ് മത്സര പരമ്പര അവതരിപ്പിച്ചിട്ടുണ്ട്.30 വർഷത്തോളം ക്വിസ് മാസ്റ്റർ ആയിരുന്ന ഡോ. എബ്രഹാം ജോസഫ് ബ്രെയിൻ ഓഫ് കേരള എന്നാണ് അറിയപ്പെട്ടിരുന്നത്.

30 വർഷത്തോളം മാർ ഇവാനിയോസ് കോളേജിലെ അദ്ധ്യാപകനായിരുന്നു. ആറു വർഷം ഇംഗ്ലീഷ് വിഭാഗത്തിന്റെ മേധാവിയായി പ്രവർത്തിച്ചിട്ടുണ്ട്.ഉന്നത വിദ്യാഭ്യാസം അടക്കമുള്ള വിഷയങ്ങളിൽ അദ്ദേഹം നിരവധി ലേഖനങ്ങളും എഴുതിയിട്ടുണ്ട്. കെസിബിസിയുടെ മികച്ച അദ്ധ്യാപകനുള്ള അവാർഡ് നേടിയിട്ടുണ്ട്. ക്വിസ് മാസ്റ്റർ എന്ന നിലയിലും നിരവധി അംഗീകാരങ്ങൾ ഡോ. എബ്രഹാം ജോസഫിനെ തേടിയെത്തിയിട്ടുണ്ട്.

തിരുവനന്തപുരത്തെ സ്വകാര്യ ആശുപത്രിയിലെ മോർച്ചറിയിൽ സൂക്ഷിച്ചിരിക്കുന്ന മൃതദേഹം ഞായറാഴ്ച ഉച്ചയ്ക്ക് ഉള്ളൂരിലെ വീട്ടിലെത്തിക്കും. സംസ്‌കാരം തിങ്കളാഴ്ച രാവിലെ മാർ ഇവാനിയോസ് വിദ്യാനഗറിലെ സെമിത്തേരിയിൽ നടക്കും.

മറുനാടന്‍ മലയാളി

    മറുനാടന്‍ മലയാളി ബ്യൂറോ