'ഉന്നത പൊലീസ് ഉദ്യോഗസ്ഥന്റെ സാന്നിധ്യത്തിൽ പരസ്യമായി മദ്യപിക്കുന്ന ജോജു ജോർജ്ജിന്റെ രഹസ്യ ദൃശ്യങ്ങൾ സൈബർ കോൺഗ്രസ് പുറത്തുവിട്ടു': കോൺഗ്രസിന്റെ മദ്യപാന ആരോപണത്തെ പരിഹസിച്ച് പി.വി.അൻവർ എംഎൽഎ

കൊച്ചി: റോഡ് ഗതാഗതം തടഞ്ഞ് പ്രതിഷേധം സംഘടിപ്പിച്ച കോൺഗ്രസ് നേതാക്കൾക്കെതിരെ പ്രതികരിച്ച ജോജു ജോർജിനെ പിന്തുണച്ച് വീണ്ടും പിവി അൻവർ എംഎൽഎ. ജോജുവിനെതിരെ കോൺഗ്രസ് നേതാക്കൾ ഉയർത്തിയ മദ്യപാന ആരോപണത്തെ പരിഹസിച്ച് കൊണ്ടാണ് അൻവർ രംഗത്തെത്തിയിരിക്കുന്നത്. ജോസഫ് സിനിമയിലെ ഒരു രംഗം പങ്കുവച്ചുകൊണ്ടാണ് അൻവറിന്റെ പരാമർശങ്ങൾ.

അൻവറിന്റെ ഫേസ്‌ബുക്ക് പോസ്റ്റ്:

'ഉന്നത പൊലീസ് ഉദ്യോഗസ്ഥന്റെ സാന്നിധ്യത്തിൽ പരസ്യമായി മദ്യപിക്കുന്ന ജോജു ജോർജ്ജിന്റെ രഹസ്യ ദൃശ്യങ്ങൾ സൈബർ കോൺഗ്രസ് പുറത്തുവിട്ടു. പഴയ കോൺഗ്രസിൽ നിന്ന് ഇന്നത്തെ കോൺഗ്രസ് ഒരൽപ്പം പോലും മാറിയിട്ടില്ല..അത് ഇനി യൂത്തനായാലും ശരി..മൂത്തനായാലും ശരി..''

ഇന്ന് മൂന്ന് പോസ്റ്റുകളാണ് അൻവർ ജോജുവിനെ പിന്തുണച്ച് ഫേസ്‌ബുക്കിലിട്ടത്.

ഇന്ധനവില നിയന്ത്രണം ആദ്യമായി കേന്ദ്ര സർക്കാരിൽ നിന്ന് എടുത്ത് മാറ്റി എണ്ണകമ്പനികളെ ഏൽപ്പിച്ച ജോജു നീതി പാലിക്കുക എന്നാണ് അൻവർ കോൺഗ്രസിനെ പരിഹസിച്ച് കൊണ്ടുള്ള ആദ്യ പോസ്റ്റിൽ പറഞ്ഞത്. പൊതുജനങ്ങളെ വഴി തടഞ്ഞുള്ള സമരത്തെ ചങ്കൂറ്റത്തോടെ എതിർത്ത സഹോദരനു അഭിനന്ദനങ്ങൾ, ആശംസകൾ എന്നും മറ്റൊരു പോസ്റ്റിൽ അൻവർ പറഞ്ഞു.

ഇന്ന് രാവിലെയാണ് വൈറ്റില മുതൽ ഇടപ്പള്ളി വരെയുള്ള റോഡിലെ ഗതാഗതം തടഞ്ഞ് കോൺഗ്രസ് നടത്തിയ പ്രതിഷേധത്തിനെതിരെ ജോജു പ്രതികരിച്ചത്.