'റമദാൻ ക്വസ്റ്റ്' മെഗാ ലൈവ് ക്വിസ്സിന്റെ രെജിസ്‌ട്രേഷൻ ആരംഭിച്ചു വിജയികളായ അഞ്ചുപേർക്ക് സ്വർണനാണയം സമ്മാനം ദോഹ: ദോഹ അന്താരാഷ്ട്ര മതാന്തര സംവാദ കേന്ദ്രവുമായി (ഡി.ഐ.സിഐ.ഡി) സഹകരിച്ച് യൂത്ത് ഫോറം ഖത്തർ സംഘടിപ്പിക്കുന്ന പതിനൊന്നാമത് ദോഹ റമദാൻ മീറ്റിനോടുബന്ധിച്ച് സംഘടിപ്പിക്കുന്ന 'റമദാൻ ക്വസ്റ്റ്' മെഗാ ലൈവ് ക്വിസ്സിൽ പങ്കെടുക്കാനുള്ള രെജിസ്ട്രേഷൻ ആരംഭിച്ചതായി സംഘാടകർ അറിയിച്ചു. 20 മുതൽ 40 വയസ്സ് വരെയുള്ള പുരുഷന്മാർക്കുള്ള തത്സമയ മെഗാ ക്വിസിനായി പരമാവധി 400 ആളുകൾ പങ്കെടുക്കുന്ന രീതിയിലാണ് സംഘാടകർ ഒരുക്കിയിരിക്കുന്നത് .

ഇസ്ലാമിക വിജ്ഞാനം പൊതുജനങ്ങളിലേക്ക് എത്തിക്കുകയെന്ന ലക്ഷ്യത്തോടൊപ്പം ഖത്തറിൽ ഏറ്റവും കൂടുതൽ പേർ പങ്കെടുക്കുന്ന തത്സമയ ക്വിസ് മത്സരമായി 'റമദാൻ ക്വസ്റ്റ്' നെ മാറ്റാനും സംഘാടകർ ലക്ഷ്യമിടുന്നു. മാർച്ച് 29ന് അൽ അറബി സ്റ്റേഡിയം ഇൻഡോർ ഹാളിൽ വെച്ച് ഉച്ചക്ക് ശേഷം 3.30നാണ് ക്വിസ് മത്സരം ആരംഭിക്കുക. ഖുർആൻ, റമദാൻ, ഇസ്ലാമിക ചരിത്രം, മുസ്ലിം ലോകം എന്നീ വിഷയങ്ങളെ ആസ്പദമാക്കിയായിരിക്കും ക്വിസ് മത്സരത്തിലെ ചോദ്യങ്ങളെന്ന് സംഘാടകർ അറിയിച്ചു. കഹൂത് പ്ലാറ്റ്ഫോം വഴിയാണ് മത്സരം നടക്കുകയെന്നും മത്സരാർഥികൾ ഇന്റർനെറ്റ് കണക്ഷൻ ഉൾപ്പെടെയുള്ള ഫോണുമായാണ് മത്സരത്തിനെത്തേണ്ടതെന്നും സംഘാകർ വ്യക്തമാക്കി.

ആദ്യ വിജയികളായ അഞ്ചുപേർക്ക് സ്വർണനാണയമാണ് സമ്മാനം. മത്സരത്തിൽ പങ്കെടുക്കുന്നതിനായി യൂത്ത് ഫോറം ഖത്തർ ഫേസ്‌ബുക് പേജ് വഴി ഷെയർ ചെയുന്ന ലിങ്ക് വഴി രെജിസ്റ്റർ ചെയ്യാവുന്നതാണ്. ഡി.ഐ.സിഐ.ഡിയുമായി സഹകരിച്ച് യൂത്ത് ഫോറം സംഘടിപ്പിക്കുന്ന ദോഹ റമദാൻ മീറ്റ് ഖത്തറിലെ ഇന്ത്യൻ പ്രവാസികളുടെ ഏറ്റവും വലിയ റമദാൻ സംഗമങ്ങളിലൊന്നായാണ് അറിയപ്പെടുന്നത്. വൈകുന്നേരം നാലിന് ആരംഭിച്ച് ഇഫ്താർ സംഗമത്തോടെ സമാപിക്കുന്ന റമദാൻ മീറ്റിൽ രാജ്യത്തിന്റെ വിവിധ ഭാഗങ്ങളിൽ നിന്നായി രണ്ടായിരത്തിലധികം യുവാക്കൾ പങ്കെടുക്കുമെന്നാണ് പ്രതീക്ഷിക്കുന്നത്.