ദോഹ: മാനവികതയും സാഹോദര്യവുമാണ് ഓരോ ആഘോഷങ്ങളും ഉദ്ഘോഷിക്കുന്നതെന്നും മാനവികതയുടെ കാവലാളാവുകയെന്ന ആശയത്തിന് പ്രസക്തി വർദ്ധിക്കുകയാണെന്നും വേൾഡ് മലയാളി കൗൺസിൽ ഖത്തർ പ്രൊവിൻസ് വനിത വിഭാഗം അധ്യക്ഷയും ദോഹ ബ്യൂട്ടി സെന്റർ മാനേജിങ് ഡയറക്ടറുമായ ഡോ. ഷീല ഫിലിപ്പോസ് അഭിപ്രായപ്പെട്ടു. അൽ സുവൈദ് ഗ്രൂപ്പ് ആസ്ഥാനത്ത് നടന്ന ചടങ്ങിൽ മീഡിയ പ്ളസ് പ്രസിദ്ധീകരിച്ച പെരുന്നാൾ നിലാവിന്റെ പ്രകാശനം നിർവഹിച്ച് സംസാരിക്കുകയായിരുന്നു അവർ .

മനുഷ്യ സാഹോദര്യവും സൗഹാർദ്ധവുമാണ് സമൂഹങ്ങളെ കൂട്ടിയിണക്കുകയും ഐക്യത്തോടെ മുന്നേറുവാൻ പ്രേരിപ്പിക്കുകയും ചെയ്യുന്നത്. ഓരോ ആഘോഷങ്ങളും ഈ രംഗത്ത് ശക്തമായ ചാലക ശക്തിയാണ്. പരസ്പരം ഗുണകാംക്ഷയോടെ പെരുമാറാനും ഹൃദയം തുറന്ന് ആശംസകൾ കൈമാറാനും സഹായകമായ പെരുന്നാൾ നിലാവിന്റെ ദൗത്യം മാതൃകാപരമാണെന്ന് അവർ പറഞ്ഞു.ഔൾ ബിസിനസ് ഗ്രൂപ്പ് മാനേജിങ് ഡയറക്ടർ ആഷിഖ് റഹ് മാൻ പെരുന്നാൾ നിലാവിന്റെ ആദ്യ പ്രതി ഏറ്റുവാങ്ങി. വളർന്നുവരുന്ന എഴുത്തുകാർക്കും കലാകാരന്മാർക്കും പ്രോൽസാഹനം നൽകുന്ന പ്രസിദ്ധീകരണമെന്ന നിലക്ക് പെരുന്നാൾ നിലാവിന്റെ പങ്ക് വളരെ വലുതാണെന്ന് അദ്ദേഹം പറഞ്ഞു.

ഗുഡ് വിൽ കാർഗോ മാനേജിങ് ഡയറക്ടർ മുഹമ്മദ് നൗഷാദ്, അൽ സുവൈദ് ഡയറക്ടർ ഫൈസൽ റസാഖ്, അൽ മവാസിം ബിസിനസ് ഗ്രൂപ്പ് മാർക്കറ്റിങ് മാനേജർ എഞ്ചിനീയർ ആദിൽ, ഖത്തർ ടെക് മാനേജിങ് ഡയറക്ടർ ജെബി കെ ജോൺ എന്നിവർ സംസാരിച്ചു.
മീഡിയ പ്ളസ് സിഇഒ യും പെരുന്നാൾ നലാവ് ചീഫ് എഡിറ്ററുമായ ഡോ. അമാനുല്ല വടക്കാങ്ങര സ്വാഗതവും മാർക്കറ്റിങ് മാനേജർ മുഹമ്മദ് റഫീഖ് തങ്കയത്തിൽ നന്ദിയും പറഞ്ഞു.