ദോഹ. ഖത്തറിലെ മാപ്പിള പാട്ടാസ്വാദകർക്കായ് മീഡിയ പ്ലസും റേഡിയോ സുനോ 91.7 എഫ്.മും ചേർന്നൊരുക്കിയ ഇശൽ നിലാവ് സീസൺ 2 ഇന്ത്യൻ കൾചറൽ സെന്റർ അശോക ഹാളിലെ നിറഞ്ഞ സദസ്സിന് സംഗീതാസ്വാദനത്തിന്റെ വേറിട്ട അനുഭവമായി. സന്ദേശ പ്രധാനമായ തെരഞ്ഞെടുത്ത തനത് മാപ്പിളപ്പാട്ടുകളുടെ മനോഹരമായ അവതരണം ഇശൽ നിലാവ് സീസൺ 2 വിനെ അവിസ്മരണീയമായി.
മലയാളത്തിന്റെ പ്രിയ കവി പി.ടി.അബ്ദുറഹിമാന്റെ ഓർമദിവസത്തെ അന്വർഥമാക്കി അദ്ദേഹത്തിന്റെ മാനവ മൈത്രിയുടെ സന്ദേശ പ്രധാനമായ അനശ്വര ഗാനം എല്ലാ ഗായിക ഗായകരും ചേർന്നവതരിപ്പിച്ചുകംാണ്ടാണ് പരിപാടി തുടങ്ങിയത്. പിന്നീടങ്ങോട്ട് മാപ്പിളപ്പാട്ടിന്റെ പെരുമഴ സംഗീതാസ്വാദകരെ കോൾമയിർകൊള്ളിച്ചു.
മാപ്പിളപ്പാട്ടിന് മഹത്തായ സംഭാവന നൽകിയ അനശ്വര പ്രതിഭകളായിരുന്ന എരഞ്ഞോളി മൂസ, പീർ മുഹമ്മദ്, വി എം .കുട്ടി എന്നിവരുടെ തെരഞ്ഞെടുത്ത പാട്ടുകൾ കോർത്തിണക്കിയ മെഡലിയും ഇശൽ നിലാവിനെ സവിശേഷമാക്കി.
പ്രമുഖ ഗായകൻ ആദിൽ അത്തുവിനൊപ്പം ഖത്തറിലെ ജനപ്രിയ ഗായകരായ റിയാസ് കരിയാട്, ഹംദാൻ ഹംസ, നിശീത , മൈഥിലി എന്നിവരാണ് സംഗീത സന്ധ്യയെ ധന്യമാക്കിയത്.
സംഗീതാസ്വാദകനായ അൽ സുവൈദ് ഗ്രൂപ്പ് മാനേജിങ് ഡയറക്ടർ ഡോ.വി.വി. ഹംസയുടെ ഗാനം സദസ്സിന്റെ പ്രത്യേകം കയ്യടി നേടി .
റേഡിയോ സുനോ ആർ.ജെകളായ ഷാഫി, നിസ, ആശിയ എന്നിവരായിരുന്നു പരിപാടിയുടെ അവതാരകർ.
മീഡിയ പ്‌ളസ് ജനറൽ മാനേജർ ഷറഫുദ്ധീൻ തങ്കയത്തിൽ , മാർക്കറ്റിങ് മാനേജർ മുഹമ്മദ് റഫീഖ്, മാർക്കറ്റിങ് കൺസൽട്ടന്റുമാരായ സുബൈർ പന്തീരങ്കാവ്, നസീമ വലിയപറമ്പിൽ , അമീൻ എന്നിവർ പരിപാടിക്ക് നേതൃത്വം നൽകി.
