ദോഹ . ദോഹ ആസ്ഥാനമായി പ്രവർത്തിക്കുന്ന അൽ മവാസിം ഗ്രൂപ്പ് മാനേജിങ് ഡയറക്ടർ ഷഫീഖ് ഹുദവിക്ക് പ്രവാസി ഭാരതി കർമ ശ്രേഷ്ഠ പുരസ്‌കാരം . ഇരുപത്തിരണ്ടാമത് പ്രവാസി ദിനാഘോഷങ്ങളുടെ ഭാഗമായി പ്രവാസി ഭാരതി ന്യൂസ് ബുള്ളറ്റിനും എൻ.ആർ.ഐ കൗൺസിൽ ഓഫ് ഇന്ത്യയും ഏർപ്പെടുത്തിയ പ്രവാസി ഭാരതി കർമ ശ്രേഷ്ഠ പുരസ്‌കാരത്തിന് ഡോ.ഷഫീഖ് ഹുദവിയെ
തെരഞ്ഞെടുത്തതായി എൻ.ആർ.ഐ കൗൺസിൽ ഓഫ് ഇന്ത്യ ചെയർമാനും ഇരുപത്തിരണ്ടാമത് പ്രവാസി ദിനാഘോഷങ്ങളുടെ ജനറൽ കൺവീനറുമായ ഡോ.എസ്. അഹ് മദ് അറിയിച്ചു. ഒരു മികച്ച സംരംഭകൻ എന്നതിലുപരി സാമൂഹ്യ സാംസ്‌കാരിക രംഗങ്ങളിലെ സജീവ സാന്നിധ്യവും പരിഗണിച്ചാണ് ഡോ.ഷഫീഖ് ഹുദവിയെ അവാർഡിന് തെരഞ്ഞെടുത്തത്.
ജനുവരി 11 ന് തിരുവനന്തപുരം മാസ്‌കറ്റ് ഹോട്ടലിലെ സിംഫണി കൺവെൻഷൻ സെന്ററിൽ നടക്കുന്ന ചടങ്ങിൽ പശ്ചിമ ബംഗാൾ ഗവർണർ സി.വി. ആനന്ദ ബോസ് അവാർഡ് സമ്മാനിക്കും.
മലപ്പുറം ജില്ലയിലെ കൊണ്ടോട്ടി (കോടങ്ങാട്) സ്വദേശിയായ ഷഫീഖ് ഹുദവി കഴിഞ്ഞ ഒ്ന്നര പതിറ്റാണ്ടോളമായി ഖത്തറിൽ സജീവമാണ്. തീർത്തും ഒരു സാധാരണ കുടുംബത്തിൽ ജനിച്ചുവളർന്ന ഹുദവി സ്വന്തം പരിശ്രമങ്ങൾകൊണ്ട് ഒരു മികച്ച സംരംഭകനായി വളരുകയായിരുന്നുവെന്ന് അവാർഡ് കമ്മറ്റി വിലയിരുത്തി. ഖത്തറിന് പുറമേ യു.എ.ഇ, ഈജിപ്ത് , ഇന്ത്യ എന്നിവിടങ്ങളിൽ ശാഖകളുള്ള അൽ മവാസിം ഗ്രൂപ്പിന്റെ മാനേജിങ് ഡയറക്ടറാണ്. അൽ മവാസിം ട്രാൻസ് ലേഷൻ ആൻഡ് സർവീസസ്, ലീഗൽ ഫോർ ട്രാൻസ് ലേഷൻ ആൻഡ് സർവീസസ്, അൽ മവാസിം അക്കാദമി, സി.കെ.എസ്. ലിമോസിൻ, തുടങ്ങിയവയാണ് അൽ മവാസിം ഗ്രൂപ്പിന്റെ പ്രധാന സ്ഥാപനങ്ങൾ.
സൈദലവി ഹാജി ചക്കുന്നന്റേയും സൈനബ പൂന്തലയുടേയും മകനായ ഷഫീഖ് 2009ലാണ് ചെമ്മാട്ടെ പ്രശസ്തമായ ദാറുൽ ഹുദ അക്കാദിമിയിൽ നിന്നും ഹുദവി ബിരുദമെടുത്തത്. തുടർന്ന് ഇഗ്നോയുടെ എം.എ. ഇംഗ്‌ളീഷും ഹൈദറാബാദിൽ നിന്നും എം. എ. ഉറുദുവും പൂർത്തിയാക്കി. ബുഷ്‌റ തടത്തിലാണ് ഭാര്യ.
