ദോഹ: ഖത്തർ ആതിഥ്യമരുളിയ 2022 ലെ ഫിഫ ലോകകപ്പ് ഫുട്‌ബോൾ ഓർമക്കായി യൂത്ത് ഫോറം ഖത്തർ പുറത്തിറക്കിയ സുവനീർ 'ബിഷ്ത്' പ്രകാശനം ചെയ്തു. ലോകകപ്പ് ഫൈനലിന്റെ ഒന്നാം വാർഷിക ദിനമായ ഡിസംബർ 18 വൈകുന്നേരം ഹിൽട്ടൺ എംബസി സ്യൂട്ട് ഹോട്ടലിൽ നടന്ന പരിപാടിയിൽ ഇന്ത്യൻ സ്പോർട്സ് കൗൺസിൽ പ്രസിഡന്റ് ഇ.പി. അബ്ദുറഹ്മാൻ യൂത്ത് ഫോറം പ്രസിഡന്റ് എസ്. എസ്. മുസ്തഫക്ക് സുവനീർ കൈമാറി.

കായിക രംഗത്ത് അവിസ്മരണീയമായ മുഹൂർത്തങ്ങൾ സമ്മാനിച്ച ലോകകപ്പിന്റെ ഓർമകൾ അതിന്റെ സാമൂഹിക, സാംസ്‌കാരിക വിശകലനങ്ങളോടെ ഒരു സുവനീറായി ചിട്ടപ്പെടുത്തിയ യൂത്ത് ഫോറത്തിന്റെ പ്രവർത്തനം ശ്ലാഘനീയമാണെന്ന് ഇ.പി അബ്ദുറഹ്മാൻ അഭിപ്രായപ്പെട്ടു. ഖത്തർ ലോകകപ്പ് ഓർമകൾ ഇനിയുമേറെക്കാലം സ്മരിക്കപ്പെടുമെന്നും അദ്ദേഹം കൂട്ടിച്ചേർത്തു. ബിഷ്ത് എന്ന പേരിൽ തയ്യാറാക്കിയ സുവനീർ യൂത്ത് ഫോറത്തിന്റെ വൈവിധ്യമാർന്ന പ്രവർത്തനങ്ങളിൽ സുപ്രധാനമായൊരു അധ്യായമാണെന്ന് പ്രസിഡന്റ് എസ്.എസ്. മുസ്തഫ സൂചിപ്പിച്ചു. ലോകകപ്പിനോട് അനുബന്ധിച്ച് സംഘടിപ്പിക്കപ്പെട്ട വൈവിധ്യമാർന്ന പ്രോഗ്രാമുകളിലൊന്ന് മാത്രമാണ് ഈ സുവനീറെന്നും അദ്ദേഹം അഭിപ്രായപ്പെട്ടു.

എഡിറ്റർ അസ്ലം അബ്ദുൽറഹീം സുവനീർ പരിചയപ്പെടുത്തി സംസാരിച്ചു. ലോകകപ്പിന്റെ കിക്കോഫ് മുതൽ ഫൈനൽ വിസിൽ വരെയുള്ള അവിസ്മരണീയ മുഹൂർത്തങ്ങളെ ഓരോ മത്സരങ്ങളുടെയും വിശദാംശങ്ങളും, കളിക്കളത്തിനകത്തും പുറത്തുമുള്ള അനുഭവങ്ങളും ഉൾപ്പെടുത്തിയതാണ് സുവനീറിന്റെ ഘടനയെന്ന് അദ്ദേഹം സൂചിപ്പിച്ചു. ഒരു കായിക മാമാങ്കത്തിന്റെ സ്മരണികയെന്നതിനോടൊപ്പം, കായിക നാളുകളിൽ ആതിഥേയരായ ഖത്തർ ലോകത്തിന് പരിചയപ്പെടുത്തിയ മൂല്യങ്ങളെയും സംസ്‌കാരങ്ങളെയും കൂടി സുവനീർ വിശകലനം ചെയ്യുന്നുവെന്നും അദ്ദേഹം കൂട്ടിച്ചേർത്തു.

ഐ.സി.ബി.എഫ് പ്രസിഡന്റ് ഷാനവാസ് ബാവ, ഐ.സി.ബി.എഫ് മാനേജിങ് കമ്മിറ്റി അംഗം മുഹമ്മദ് കുഞ്ഞി, ഐ.എസ്.സി മാനേജിങ് അംഗം നിഹാദ് അലി, സിഐ.സി വൈസ് പ്രസിഡന്റ് അർഷദ് കെ.എ, സിഐ.സി കേന്ദ്ര സമിതി അംഗം കെ.സി അബ്ദുൽ ലത്തീഫ്, റേഡിയോ മലയാളം സി ഇ ഒ അൻവർ ഹുസൈൻ, ഇന്ത്യൻ മീഡിയാ ഫോറം പ്രസിഡന്റ് ഫൈസൽ ഹംസ, ഇന്ത്യൻ ഓതേഴ്‌സ് ഫോറം ജന. സെക്രട്ടറി ഹുസൈൻ കടന്നമണ്ണ, കാലിഗ്രാഫി ആർട്ടിസ്റ്റ് കരീം ഗ്രാഫി, മാധ്യമം-മീഡിയാവൺ ഖത്തർ ചെയർമാൻ റഹീം ഓമശ്ശേരി, മാധ്യമം ബ്യുറോ ചീഫ് കെ.ഹുബൈബ് നന്തി, ഓട്ടോ ഫാസ്റ്റ്ട്രാക്ക് പ്രതിനിധി നിയാസ്, ഹെൽപ്ലൈൻ ഗ്രൂപ്പ് പ്രധിനിധി അഫ്‌സൽ ടി. എ തുടങ്ങിയവർ പരിപാടിയിൽ ആശംസകൾ നേർന്ന് സംസാരിച്ചു.

യൂത്ത് ഫോറം കേന്ദ്ര സമിതി അംഗങ്ങളായ സൽമാൻ, അഹ്മദ് അൻവർ, സുഹൈൽ എന്നിവർ പ്രോഗ്രാമിന് നേതൃത്വം നൽകി. അബ്ദുസ്സമദ് കൊടിഞ്ഞി, ശഫീഅ് മുനീസ്, തൗഫീഖ് എം.എസ്. എന്നിവരാണ് സുവനീർ പ്രസാധക സമിതി അംഗങ്ങൾ.

 

സുവനീർ 'ബിഷ്ത്