കാസർകോട്ട് പേവിഷബാധയേറ്റ് രണ്ടാംക്ലാസുകാരൻ മരിച്ചു; കുട്ടിക്ക് മൂന്ന് ഡോസ് ആന്റി റാബിസ് കൂത്തിവെപ്പ് നൽകിയിരുന്നതായി ബന്ധുക്കൾ

കാസർകോട്: ചെറുവത്തൂരിൽ രണ്ടാം ക്ലാസുകാരൻ പേവിഷബാധയേറ്റ് മരിച്ചു. ആലന്തട്ട വലിയപൊയിൽ തോമസിന്റെ മകൻ എംകെ ആനന്ദ് ആണ് മരിച്ചത്. കഴിഞ്ഞമാസമാണ് കുട്ടിക്ക് നായയുടെ കടിയേറ്റത്.

കടിയേറ്റതിന് പിന്നാലെ കുട്ടിയെ കാഞ്ഞങ്ങാട്ടെ ജില്ല ആശുപത്രിയിലെത്തിച്ച് കുത്തിവയ്പ് നടത്തിയിരന്നു. കൃത്യമായി മൂന്ന് ഡോസ് നൽകിയിരുന്നതായും ബന്ധുക്കൾ പറഞ്ഞു. നാലാമത്തെ ഡോസ് ഈ മാസം പതിമൂന്നിനായിരുന്നു എടുക്കേണ്ടിയിരുന്നത്. അതിനിടെ രണ്ട് ദിവസങ്ങൾക്ക് മുൻപ് കുട്ടി പേയുടെ ലക്ഷണങ്ങൾ കാണിച്ചതിനെ തുടർന്ന് കോഴിക്കോട് മെഡിക്കൽ കോളജിൽ പ്രവേശിപ്പിക്കുകയായിരുന്നു.

ഇന്ന് ഉച്ചയോടെയാണ് പേ വിഷബാധ മൂർച്ഛിച്ച് കുട്ടി മരിച്ചത്. മുഖത്തായിരുന്നു നായയുടെ കടിയേറ്റത്. കുട്ടിക്ക് ആഴത്തിൽ മുറിവേൽക്കുകയും ചെയ്തിരുന്നു. ആലന്തട്ട എയുപി സ്‌കൂൾ രണ്ടാം ക്ലാസ് വിദ്യാർത്ഥിയാണ്.