ന്യൂഡൽഹി: നോട്ടുനിരോധന വിഷയത്തിൽ തന്നെ പാർലമെന്റിൽ സംസാരിക്കാൻ അനുവദിക്കുന്നില്ലെന്ന് കോൺഗ്രസ് ഉപാധ്യക്ഷൻ രാഹുൽ ഗാന്ധി. ഇന്ത്യയുടെ ചരിത്രത്തിലെ ഏറ്റവും വലിയ കുംഭകോണമാണ് നോട്ടുനിരോധനത്തിന്റെ പേരിൽ നടക്കുന്നത്. സർക്കാർ ചർച്ചയെ ഭയക്കുകയാണെന്നും തന്നെ സംസാരിക്കാൻ അനുവദിക്കുന്നില്ലെന്നും താൻ സംസാരിച്ചാൽ ഭൂകമായിരിക്കും ഉണ്ടാകുകയെന്നും രാഹുൽ പറഞ്ഞു.

നോട്ടുനിരോധന വിഷയത്തിൽ വോട്ടെടുപ്പ് കൂടാതെയുള്ള ചർച്ചയ്ക്ക് തയാറാണെന്ന് പ്രതിപക്ഷം സ്പീക്കറെ അറിയിച്ചതിന് പിന്നാലെയാണ് രാഹുലിന്റെ ഈ മുന്നറിയിപ്പ്. പാർലമെന്റിനു പുറത്ത് മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.

ഇന്ത്യ മുഴുവൻ നടന്ന് പ്രസംഗിക്കുന്ന പ്രധാനമന്ത്രിക്ക് ലോക്‌സഭയിൽ വരാൻ എന്തിനാണു പേടിക്കുന്നതെന്ന് രാഹുൽ ചോദിച്ചു. നോട്ടുനിരോധനം പ്രഖ്യാപിച്ചനാൾ മുതൽ പാർലമെന്റിൽ ചർച്ച വേണമെന്ന് ആഗ്രഹിക്കുന്നതാണ്. അവർ ചർച്ചയിൽനിന്ന് ഒളിച്ചോടുകയാണ്. എന്നാൽ ചർച്ചയ്ക്കു തയാറാണെന്ന് അവകാശപ്പെടുകയും ചെയ്യുന്നു. നോട്ടുനിരോധന വിഷയത്തിൽ തുടർച്ചയായ പാർലമെന്റ് സ്തംഭനങ്ങൾക്കെതിരെ രാഷ്ട്രപതി പ്രണബ് മുഖർജിയും ബിജെപി മുതിർന്ന നേതാവ് എൽ.കെ.അഡ്വാനിയും രംഗത്തെത്തിയിരുന്നു.