'നാം രണ്ട് നമുക്ക് രണ്ട് എന്ന് പറയുന്ന സർക്കാരിന് സൗഹൃദ ദിനാശംസകൾ,'; മോദിയുടെ പ്രമുഖ വ്യവസായി സൗഹൃദങ്ങളെ സൗഹൃദ ദിനത്തിൽ ട്രോളി രാഹുൽഗാന്ധി
ന്യൂഡൽഹി: സൗഹൃദ ദിനത്തിൽ പ്രധാനമന്ത്രി നരേന്ദ്ര മോദിക്ക് വ്യത്യസ്തമായ രീതിയിൽ ആശംസകൾ നേർന്ന് കോൺഗ്രസ് നേതാവ് രാഹുൽ ഗാന്ധി. രാജ്യത്തെ പ്രമുഖ വ്യവസായികൾക്കൊപ്പമുള്ള മോദിയുടെ ചിത്രങ്ങൾ പങ്കുവെച്ചുകൊണ്ടാണ് രാഹുൽ ഗാന്ധി ഇൻസ്റ്റഗ്രാമിൽ ആശംസ അറിയിച്ചത്.
'ഐ വിൽ ബി ദേർ ഫോർ യു'എന്ന പ്രശസ്ത ഗാനത്തിനൊപ്പമാണ് ചിത്രങ്ങൾ. വ്യവസായികളാണ് രാജ്യം ഭരിക്കുന്നത് എന്ന് നേരത്തെയും രാഹുൽ ഗാന്ധി ആരോപിച്ചിരുന്നു.
'നാം രണ്ട് നമുക്ക് രണ്ട് എന്ന് പറയുന്ന സർക്കാരിന് സൗഹൃദ ദിനാശംസകൾ,' എന്നാണ് രാഹുൽ ഇൻസ്റ്റഗ്രാമിൽ പോസ്റ്റ് ചെയ്തിരിക്കുന്നത്.
മുകേഷ് അംബാനി, ഗൗതം അദാനി തുടങ്ങി രാജ്യത്തെ വ്യവസായികളെ ചേർത്ത് പിടിച്ചിരിക്കുന്ന മോദിയുടെ ചിത്രങ്ങളാണ് രാഹുൽ ഇൻസ്റ്റഗ്രാമിൽ പോസ്റ്റ് ചെയ്തിരിക്കുന്നത്.
പ്രതിപക്ഷത്തെ പ്രവർത്തിക്കാൻ മോദി സർക്കാർ അനുവദക്കുന്നില്ലെന്നും രാഹുൽ ഗാന്ധി ആരോപിച്ചിരുന്നു. പാർലമെന്റ് അംഗങ്ങൾ ജനങ്ങളുടെ ശബ്ദമാകുന്നതും ദേശീയ പ്രാധാന്യമുള്ള വിഷയങ്ങൾ ചർച്ച ചെയ്യുന്നതുമാണ് ജനാധിപത്യത്തിന്റെ അടിസ്ഥാനം എന്നും രാഹുൽ പറഞ്ഞിരുന്നു.
പാർലമെന്റിന്റെ മൺസൂൺ സമ്മേളനം നടത്താൻ കോൺഗ്രസ് അനുവദിക്കുന്നില്ലെന്ന് മോദിയുടെ പരാമർശത്തിന് പിന്നാലെയായിരുന്നു രാഹുലിന്റെ പ്രതികരണം.
