ചിത്രകലാ വിദ്യാലയ പ്രിൻസിപ്പലിനെതിരെ ജീവനക്കാരിയുടെ പീഡന പരാതി; കൂടെ യാത്ര ചെയ്യാൻ നിരന്തരം നിർബന്ധിച്ചെന്നും വഴങ്ങാത്തതിന് ഭീഷണിപ്പെടുത്തിയെന്നും പരാതി; പൊലീസ് അന്വേഷണം ആരംഭിച്ചു

കണ്ണൂർ: തലശ്ശേരി മഞ്ഞോടിയത് ചിത്രകലാ വിദ്യാലയത്തിലെ പ്രിൻസിപ്പലിനെതിരെ ജീവനക്കാരി പീഡന പരാതി നൽകി. ചക്കരക്കൽ പൊലിസിലാ ണ് പരാതി നൽകിയത്. സ്ഥാപനത്തിലെ ജീവനക്കാരിയാണ് പരാതിയുമായി രംഗത്തെത്തിയത്. പ്രിൻസിപ്പൽ രവീന്ദ്രൻ തന്നെ മാനസികമായും ശാരീരികമായും പീഡിപ്പിച്ചെന്നാണ് ജീവനക്കാരിയുടെ ആരോപണം. പരാതി സ്ഥാപന മേധാവികൾ പൂഴ്‌ത്തിയെന്ന് യുവതി ആരോപിച്ചു. പ്രിൻസിപ്പലിനെ രക്ഷിക്കാനാണ് ശ്രമിക്കുന്നതെന്നും ഇതിനായി തന്നെ ഭീഷണിപ്പെടുത്തിയെന്നും യുവതി ആരോപിച്ചു.

ചിത്രകലാ വിദ്യാലയത്തിലെ ഓഫീസ് റൂമിൽ വെച്ച് നിരവധി തവണ അപമര്യാദയായി പെരുമാറാൻ ശ്രമിച്ചെന്നും നിരന്തരം ഫോണിൽ വിളിച്ചും മെസേജ് അയച്ചും ബുദ്ധിമുട്ടിക്കുന്നുവെന്നും യുവതി ആരോപിച്ചു. കൂടെ യാത്ര ചെയ്യാൻ നിരന്തരം നിർബന്ധിച്ചെന്നും വഴങ്ങാത്തതിന് ഭീഷണിപ്പെടുത്തിയെന്നും യുവതിയുടെ പരാതിയിൽ പറയുന്നു.പരാതി നൽകിയിട്ടും മാനേജ്മെന്റ് നടപടിയെടുത്തില്ലെന്ന് യുവതി ചൂണ്ടിക്കാട്ടി.

വിദ്യാഭ്യാസ യോഗ്യതയുടെ അടിസ്ഥാനത്തിൽ ജീവനക്കാരിയെ വിദ്യാലയത്തിലെ അദ്ധ്യാപികയാക്കി സ്ഥാനക്കയറ്റം നൽകാനുള്ള കമ്മിറ്റി തീരുമാനത്തെയും പ്രിൻസിപ്പൽ തടഞ്ഞതായി യുവതി കൂട്ടിച്ചേർത്തു. അദ്ധ്യാപികയാവണമെങ്കിൽ തനിക്ക് വഴങ്ങിത്തരണമെന്ന് പ്രിൻസിപ്പൽ ആവശ്യപ്പെട്ടതായി യുവതി ആരോപിച്ചു. യുവതിയുടെ പരാതി അന്വേഷിച്ചുവരികയാണെന്ന് ചക്കരക്കൽ പൊലിസ് അറിയിച്ചു.