ഡബ്ലിൻ: മലങ്കര ഓർത്തോഡോക്‌സ് സഭയുടെ നിരണം ഭദ്രാസനാധിപൻ ഡോ. യൂഹാനോൻ മാർ ക്രിസോസ്റ്റമോസ് തിരുമേനിക്ക് അയർലണ്ടിൽ ഊഷ്മളമായ സ്വീകരണം നൽകി. ആദ്യമായി അയർലണ്ടിൽ സന്ദർശനം നടത്തുന്ന അഭിവന്ദ്യ തിരുമേനിയെ യു.കെ.-യൂറോപ്പ്-ആഫ്രിക്ക ഭദ്രാസനാധിപൻ അഭിവന്ദ്യ ഡോ. മാത്യൂസ് മാർ തീമോത്തിയോസ് തിരുമേനിയുടെ നേതൃത്വത്തിൽ ഡബ്ലിൻ എയർപോർട്ടിൽ സ്വീകരിച്ചു. 

തിങ്കളാഴ്ച അയർലണ്ടിലെ കാതോലിക്കേറ്റ് കേന്ദ്രമായ ഡബ്ലിൻ മലങ്കര മന്ദിരത്തിൽ എത്തിച്ചേർന്ന തിരുമേനിയെ ഡബ്ലിൻ സെന്റ് തോമസ് ഇടവക അംഗങ്ങൾ ആദരപൂർവം സ്വീകരിച്ചു. മലങ്കര മന്ദിരത്തിൽ തിരുമേനിമാരുടെ കാർമികത്വത്തിൽ സന്ധ്യാ നമസ്‌കാരം നടത്തപ്പെട്ടു. തുടർന്ന് ക്രിസോസ്റ്റമോസ് തിരുമേനി ധ്യാന പ്രസംഗം നടത്തി. വികാരി ഫാ. അനിഷ് കെ. സാം സ്വാഗതം ആശംസിച്ചു. ഫാ. റ്റി. ജോർജ്, ഫാ. എൽദോ വർഗീസ് എന്നിവർ സന്നിഹിതർ ആയിരുന്നു. 22ന് ഡ്രോഹിഡാ സെന്റ് പീറ്റേഴ്സ് & സെന്റ് പോൾസ് പള്ളിയിൽ സ്വീകരണവും സന്ധ്യാ നമസ്‌കാരവും ധ്യാന പ്രസംഗവും നടത്തപ്പെടും.