കൊച്ചി: പൃഥ്വിരാജും പ്രിയ ആനന്ദും പ്രധാന വേഷങ്ങളിലെത്തുന്ന 'എസ്ര'യിലെ ഗാനങ്ങൾ റിലീസ് ചെയ്തു. മൂന്ന് ഗാനങ്ങളാണ് ആൽബത്തിലുള്ളത്. ആദ്യത്തെ ഗാനം 'ലൈലാകമേ' ആലപിച്ചിരിക്കുന്നത് ഹരിചരൺ ആണ്. ഹരിനാരായണൻ ബി.കെയുടെ വരികൾക്ക് രാഹുൽ രാജ് ഈണം പകർന്നിരിക്കുന്നു. ഗാനത്തിന്റെ വീഡിയോക്ക് യൂട്യൂബിൽ 10 ലക്ഷത്തിലധികം വ്യൂസ് ലഭിച്ചിട്ടുണ്ട്.

ബാക്കി രണ്ടു ഗാനങ്ങൾക്കും സംഗീതം നൽകിയിരിക്കുന്നത് സുഷിൻ ശ്യാം ആണ്. 'തമ്പിരാൻ' എന്ന ഗാനം രചിച്ചിരിക്കുന്നത് അൻവർ അലിയും ആലപിച്ചിരിക്കുന്നത് വിപിൻ രവീന്ദ്രനുമാണ്. മൂന്നാമത്തെ ഗാനമായ 'ഇരുളു നീളും രാവേ' എഴുതിയിരിക്കുന്നത് വിനായക് ശശികുമാറാണ്. ആലാപനം സച്ചിൻ ബാലു.

ജയ് കെ കഥയെഴുതി സംവിധാനം ചെയ്യുന്ന 'എസ്ര'യിൽ പൃഥ്വിരാജ് സുകുമാരൻ, പ്രിയ ആനന്ദ്, ടോവിനോ തോമസ്, സുജിത് ശങ്കർ, വിജയരാഘവൻ എന്നിവർ അഭിനയിക്കുന്നുണ്ട്. ഈ ഹൊറർ ത്രില്ലെറിന്റെ ഛായാഗ്രഹണം സുജിത് വാസുദേവും ചിത്രസംയോജനം വിവേക് ഹർഷനുമാണ് നിർവഹിച്ചിരിക്കുന്നത്. പശ്ചാത്തല സംഗീതം സുഷിൻ ശ്യാമിന്റെയാണ്.

മ്യൂസിക്247നാണ് ഒഫീഷ്യൽ മ്യൂസിക് ലേബൽ. ഇ ഫോർ എന്റർടെയിന്മെന്റിന്റെയും എവിഎ പ്രൊഡക്ഷൻസിന്റെയും ബാനറിൽ മുകേഷ് മേത്ത, സി വി സാരഥി, എ വി അനൂപ് എന്നിവരാണ് 'എസ്ര' നിർമ്മിച്ചിരിക്കുന്നത്.