മാരാമൺ: ഭാരതത്തിലെ ന്യൂനപക്ഷങ്ങളുടെ ആശങ്ക അകറ്റാൻ ഭരണകർത്താക്കൾ തയ്യാറാകണമെന്ന് ഡോ.തിയഡോഷ്യസ് മാർത്തോമ്മാ മെത്രാപ്പൊലീത്ത ആവശ്യപ്പെട്ടു. ആനുകാലിക സംഭവ വികാസങ്ങൾ ഓരോന്നും ന്യൂനപക്ഷങ്ങളുടെ ആശങ്കകൾ വർദ്ധിപ്പിക്കുന്നുണ്ടെന്നും മെത്രാപ്പൊലീത്ത ഓർമ്മിപ്പിച്ചു. മാരാമൺ കൺവൻഷന് ദേശീയ പ്രാധാന്യം നൽകേണ്ടതാണ് എന്ന് അദ്ദേഹം അഭിപ്രായപ്പെട്ടു. അപരന്റെ കണ്ണീരൊപ്പാൻ വിശ്വാസി സമൂഹം പ്രതിജ്ഞാബദ്ധരാണെന്നും അദ്ദേഹം ഓർമ്മിപ്പിച്ചു. 129ാമത് മാരാമൺ കൺവൻഷൻ പമ്പാ മണപ്പുറത്ത് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

സുവിശേഷ പ്രസംഗ സംഘം പ്രസിഡന്റ് ഡോ.ഐസക്ക് മാർ ഫിലക്സിനോസ് അദ്ധ്യക്ഷത വഹിച്ചു. വചനം ശ്രവിക്കുന്നതിലൂടെ വിശാലമായ ലോക മാനവികത കണ്ടെത്തുന്നതിന് മനുഷ്യരാശി ശ്രമിക്കേണ്ടതാണെന്ന് അദ്ദേഹം ഓർമ്മിപ്പിച്ചു. പുരാതന കത്തോലിക്കാ സഭയുടെ ആർച്ച് ബിഷപ്പ് ബാരന്റ് തിയഡോർ വാലറ്റ് മാർത്തോമ്മാ സഭയും പുരാതന കത്തോലിക്കാ സഭയും ഐക്യതയിൽ പ്രവർത്തിക്കുന്നതിന് ധാരണാ പത്രം ഒപ്പിട്ട കാര്യം യോഗത്തിൽ അനുസ്മരിച്ചു കൊണ്ട് സംസാരിച്ചു. ജനറൽ സെക്രട്ടറി റവ.എബി.കെ.ജോഷ്വാ, വെരി.റവ.ജോർജ്ജ് മാത്യു, സഭാ സെക്രട്ടറി റവ.എബി.റ്റി.മാമ്മൻ എന്നിവർ പ്രസംഗിച്ചതായി കൺവീനർമാരായ അഡ്വ.ജേക്കബ്ബ് ജോൺ കരിക്കം, തോമസ് കോശി എന്നിവർ അറിയിച്ചു.

മന്ത്രിമാരായ വീണാ ജോർജ്ജ്, സജി ചെറിയാൻ, കടന്നപ്പള്ളി രാമചന്ദ്രൻ, എംപി മാരായ കൊടിക്കുന്നിൽ സുരേഷ്, എൻ.കെ.പ്രേമചന്ദ്രൻ, ആന്റോ ആന്റണി, എംഎ‍ൽഎമാരായ അഡ്വ.മാത്യു റ്റി തോമസ്, പ്രമോദ് നാരായണൻ, പത്തനംതിട്ട ജില്ലാ പഞ്ചായത്ത് പ്രസിഡന്റ് ഓമല്ലൂർ ശങ്കരൻ, മനുഷ്യാവകാശ കമ്മീഷൻ ജസ്റ്റീസ് ജെ. ബഞ്ചമിൻ കോശി തുടങ്ങി രാഷ്ട്രീയ സാമൂഹിക രംഗത്തെ പ്രമുഖർ ഉദ്ഘാടന യോഗത്തിൽ പങ്കെടുത്തു.

50 വർഷം പൂർത്തിയാക്കുന്ന സുവിശേഷ പ്രസംഗ സംഘം ഗോസ്പൽ ടീമിന്റെ ഔദ്യോഗിക ലോഗോ ഡോ.തിയഡോഷ്യസ് മാർത്തോമ്മാ മെത്രാപ്പൊലീത്ത നിർവ്വഹിച്ചു. ഡയറക്ടർ റവ.ജേക്കബ്ബ് തോമസ് ആനിക്കാട്, റവ.ജിജി വർഗ്ഗീസ്, പ്രൊഫ.എബ്രഹാം പി മാത്യു, ഡോ.എബി വാരിക്കാട് എന്നിവർ ലോഗോ പ്രകാശനത്തിന് നേതൃത്വം നൽകി.

തിങ്കൾ രാവിലെ 07.30നുള്ള ബൈബിൾ ക്ലാസ്സിന് ഡോ.മാത്യൂസ് മാർ മക്കാറിയോസ് അദ്ധ്യക്ഷത വഹിക്കുന്നതും റവ.ബോബി മാത്യു നേതൃത്വം നൽകുന്നതുമാണ്. രാവിലെ 09.30 ന്റെ യോഗത്തിൽ ഡോ.തോമസ് മാർ തീത്തോസ് അദ്ധ്യക്ഷത വഹിക്കുന്നതും, സഖറിയാസ് മാർ അപ്രേം മുഖ്യ സന്ദേശം നൽകുന്നതുമാണ്. ഉച്ചയ്ക്ക് 02.30ന് കുടുംബവേദിയിൽ പ്രമുഖ കൗൺസിലർ റവ.ഡോ.കെ.തോമസ് ക്ലാസ്സ് നയിക്കും.

06.00ന് നടക്കുന്ന സായാഹ്ന യോഗത്തിൽ ഡോ. ജോസഫ് മാർ ഈവാനിയോസ് അദ്ധ്യക്ഷത വഹിക്കുന്നതും, മാത്യൂസ് മാർ സെറാഫീം മുഖ്യ സന്ദേശം നൽകുന്നതുമാണെന്ന് ഭാരവാഹികൾ അറിയിച്ചു.