കൊച്ചി: ഗാനമേളയ്ക്കിടെ കടന്നു പിടിച്ചയാളെ തല്ലുന്ന ഗായികയുടെ വീഡിയോ വൈറലായിരുന്നു. ഈ ഗായിക റിമി ടോമിയാണതെന്ന പേരിലായിരുന്നു പ്രചരണം. പക്ഷേ റിമിയല്ല അതെന്ന് ഭർത്താവ് റോയ്സ് വ്യക്തമാക്കി. വീഡിയോയിലെ യഥാർത്ഥ ഗായികയായ ശബാനയാണെന്നാണ് പുറത്തുവരുന്ന വിവരം.

'എനിക്കും ഈ വീഡിയോ ഒരാൾ അയച്ചു തന്നിരുന്നു. ആരാണ് ഇത് ചെയ്തതെന്ന് ചോദിച്ചപ്പോൾ അദ്ദേഹത്തിനും അറിയില്ല എന്നാണ് പറഞ്ഞത്. മറ്റൊരാൾ അയച്ചതാണെന്നും പറഞ്ഞു. എനിക്കിപ്പോഴും ഈ വീഡിയോ കിട്ടുന്നുണ്ട്. ഒന്നു മാത്രം പറയാം ആ വീഡിയോയിലുള്ളത് റിമിയല്ല. റിമി ആരെയും തല്ലിയിട്ടില്ലെന്ന് മാത്രമല്ല ഗാനമേശകളിൽ സ്റ്റേജിൽ നിന്നിറങ്ങി പാടുകയും നൃത്തം ചെയ്യുകയും ചെയ്യുന്ന പതിവും റിമിക്കില്ല. നടക്കാത്തൊരു സംഭവത്തിലേയ്ക്കാണ് റിമിയുടെ പേര് വലിച്ചിഴയ്ക്കുന്നത്. നല്ല വിഷമമുണ്ട്. വീഡിയോ പ്രചരിപ്പിക്കുന്നവർക്ക് ഇതുകൊണ്ട് എന്താണ് ലഭം എന്നും അറിയില്ല' എന്ന റോയ്സ് വിശദീകരിച്ചു.

ശബാന എന്ന ഗായികയുടെ വീഡിയോയാണ് ശരിക്കും റിമിയുടേതെന്ന പേരിൽ പ്രചരിക്കുന്നത്. തനിക്കുണ്ടായ അനുഭവം വിശദീകരിച്ച് ശബാന കഴിഞ്ഞ ദിവസം വീഡിയോ പോസ്റ്റ് ചെയ്തിരുന്നു. സ്റ്റേജിൽ നിന്നിറങ്ങി പാടുന്നതിനിടെ നൃത്തം ചെയ്ത് അടുത്തെത്തിയ ഒരാൾ ഗായികയുടെ കയ്യിൽ പിടിച്ച് നൃത്തം ചെയ്യിക്കാൻ ശ്രമിക്കുകയും പിന്നീട് വസ്ത്രത്തിൽ പിടിച്ച് താഴെ ഇടാൻ നോക്കുകയുമായിരുന്നു. ഇത് എതിർത്തതോടെ അയാൾ അടിക്കുന്നതും ഗായിക തിരിച്ചടിക്കുന്നതും വീഡിയോയിൽ കാണാം.