ശാലിനിയുടേത് എന്ന വിധത്തിൽ ട്വിറ്ററിൽ പ്രചരിക്കുന്ന അക്കൗണ്ട് വ്യാജം; ദയവായി ആ അക്കൗണ്ട് അവഗണിക്കുക; വ്യക്തമാക്കി അജിത്തിന്റെ മാനേജർ

ചെന്നൈ: തെന്നിന്ത്യയിൽ വലിയ ആരാധകരുള്ള നടന്മാരിൽ ഒരാളാണ് അജിത് കുമാർ എന്ന തല അജിത്ത്. എന്നാൽ മറ്റു താരങ്ങളപ്പോലെ അജിത് സോഷ്യൽ മീഡിയയിൽ സജീവമല്ല അദ്ദേഹം. അദ്ദേഹത്തിന്റെ മാനേജരാണ് താരത്തിനുവേണ്ടി ആരാധകരോട് സംസാരിക്കാറുള്ളത്. അജിത്തിന്റെ ഭാര്യയും മുൻ നടിയുമായ ശാലിനിയും ഇതുപോലെ സോഷ്യൽ മീഡിയയിൽ നിന്ന് അകന്നു നിൽക്കുകയാണ്.

അതിനിടെ ശാലിനിയുടേതാണെന്ന തരത്തിൽ ട്വിറ്ററിൽ ഒരു അക്കൗണ്ട് പ്രചരിക്കുന്നുണ്ട്. നിരവധി ഫോളോവേഴ്‌സുള്ള അക്കൗണ്ട് വ്യാജമാണെന്ന് വ്യക്തമാക്കിയിരിക്കുകയാണ് അജിത്തിന്റെ മാനേജർ. ശാലിനി അജിത്ത് കുമാറിന്റെ പേരിൽ ഒരു വ്യാജ ട്വിറ്റർ അക്കൗണ്ട് ഉണ്ട്. ശാലിനി ട്വിറ്ററിൽ ഇല്ലെന്ന് വ്യക്തമാക്കുകയാണ്. ദയവായി ആ അക്കൗണ്ട് അവഗണിക്കുക.- അജിത്തിന്റെ മാനേജരായ സുരേഷ് ചന്ദ്ര ട്വിറ്ററിൽ കുറിച്ചിരിക്കയാണ്.

ശാലിനിയുടെ പേരിലുള്ള വ്യാജ ട്വിറ്റർ അക്കൗണ്ടിന് 13,000ൽ അധികം ഫോളോവേഴ്‌സ് ആണ് ഉള്ളത്. 2010 ഡിസംബറിൽ തുടങ്ങിയ അക്കൗണ്ട് ആണിത്. ആരെയും ഫോളോ ചെയ്യാത്ത ഈ അക്കൗണ്ടിൽ നിന്ന് ഒരു ട്വീറ്റ് പോലും ചെയ്തിട്ടുമില്ല. തനിക്ക് സോഷ്യൽ മീഡിയയിൽ അക്കൗണ്ടില്ലെന്ന് അജിത്ത് കുമാർ നേരത്തെ തന്നെ വ്യക്തമാക്കിയിട്ടുണ്ട്. അതിനാൽ തന്നെ താരത്തിന്റെ പേരിൽ ഫാൻ പേജുകളാണ് സജീവമായിട്ടുള്ളത്. വലിമൈ ആണ് അജിത്തിന്റെ അടുത്ത റിലീസ്. ചിത്രം ഈ മാസം 24ന് തിയറ്ററുകളിലെത്തും.