തീയറ്ററിൽ നിന്നും മൊബൈൽ എടുത്ത് നോക്കുമ്പോൾ വിളിക്കുന്നത് പാപ്പനാണ്, സാക്ഷാൽ സുരേഷ് ഗോപി; നന്ദനയ്ക്ക് വേണ്ടി ആ മനുഷ്യസ്‌നേഹി മുടക്കുന്നത് ആറ് ലക്ഷം രൂപയാണ്; 'ഇത് പാപ്പന്റെ റിവ്യൂ അല്ല, സുരേഷ് ഗോപി എന്ന മനുഷ്യസ്നേഹിയുടെ റിവ്യൂ'; പാപ്പൻ കാണാൻ പോയ അനുഭവം പങ്കുവെച്ച് സന്ദീപ് വാര്യർ
തിരുവനന്തപുരം: പാപ്പൻ എന്ന സുരേഷ് ഗോപി ചിത്രം തിയേറ്ററുകളിൽ ആളുകളെ കയറ്റുന്ന ചിത്രമായി മാറുകയാണ്. ഇടക്കാലം കൊണ്ട് മങ്ങിപ്പോയ താരപ്രഭാവം സുരേഷ്ഗോപി വീണ്ടെടുക്കാനുള്ള ശ്രമത്തിലാണ്. അതിന് വേണ്ടിയുള്ള പരിശ്രമങ്ങൾക്ക് മികച്ച പ്രതികരണങ്ങൾ ലഭിക്കുകയും ചെയ്യുന്നു. ഇതിനിടെ പാപ്പൻ കാണാൻ തീയറ്ററിൽ പോയപ്പോൾ ഉണ്ടായ അനുഭവം പങ്കുവെക്കുകയാണ് ബിജെപി നേതാവ് സന്ദീപ് വാര്യർ.
അതേസമയം സിനിമയുടെ റിവ്യൂ ആയിരുന്നില്ല സന്ദീപ് വാര്യർ പങ്കുവെച്ചത്. സ്‌ക്രീനിൽ മക്കളുടെ ജീവൻ രക്ഷിക്കാൻ പാപ്പൻ എന്ന കഥാപാത്രം നിറഞ്ഞാടുമ്പോൾ യഥാർത്ഥ ജീവിതത്തിൽ നടൻ സുരേഷ്ഗോപി നടത്തുന്ന ഇടപെടലുകളാണ് അദ്ദേഹം ഫേസ്‌ബുക്ക് കുറിപ്പിലൂടെ അറിയിച്ചത്. ഒരു കുഞ്ഞിന് വേണ്ടി സുരേഷ് ഗോപി ഇടപെടൽ നടത്തിയ കാര്യങ്ങളാണ് പുറത്തുവരുന്നത്.
പാപ്പൻ കാണാൻ പോയപ്പോഴുണ്ടായ അദ്ദേഹത്തിന്റെ അനുഭവമിങ്ങനെ:
ക്ഷമിക്കണം ഇത് പാപ്പന്റെ റിവ്യൂ അല്ല. ഇന്നലെ പെരിന്തൽമണ്ണ വിസ്മയയിൽ കുടുംബസമേതം പാപ്പൻ കണ്ടു. രാവിലെ സുരേഷേട്ടനോട് ഫോണിൽ ഓൾ ദി ബെസ്റ്റ് പറഞ്ഞ് സംസാരിച്ചതിന്റെ ത്രില്ലിൽ പടം കാണാൻ വന്നിരിക്കുകയാണ് എന്റെ ഭാര്യ ഷീജ. സിനിമ തുടങ്ങി. ഹൗസ് ഫുൾ ആണ്. പണ്ട് സംഗീതയിൽ 'കമ്മീഷണർ' കാണാൻ പോയ അതേ ആവേശത്തോടെ ഞാൻ സീറ്റിന്റെ തുമ്പത്തിരുന്നു.
സ്റ്റയിലിഷായി സൂപ്പർ സ്റ്റാർ സുരേഷ് ഗോപി സ്‌ക്രീനിൽ വരുന്ന നിമിഷം പാപ്പൻ എന്ന ടൈറ്റിൽ തെളിയുന്നു. തീയേറ്ററിൽ നിലയ്ക്കാത്ത കരഘോഷം. ഉദ്യോഗജനകമായ കുറ്റാന്വേഷണ കഥ ഊഹിക്കാനൊരു ചെറിയ സൂചന പോലും നൽകാതെ മുന്നോട്ട് പോവുകയാണ്. പാപ്പനായി സുരേഷേട്ടനും മൈക്കിളായി ഗോകുലും എല്ലാം അത്യുഗ്രൻ പ്രകടനം.
ജോഷിയുടെ അനുഭവ സമ്പത്തിന്റെ ബലത്തിൽ സിനിമ മുന്നോട്ട് പോകവേ രസം കൊല്ലാനായി എന്റെ മൊബൈലിലേക്ക് ആരോ വിളിക്കുന്നു. മൊബൈൽ എടുത്ത് നോക്കുമ്പോൾ വിളിക്കുന്നത് പാപ്പനാണ്. സാക്ഷാൽ സുരേഷ് ഗോപി. ഫോണെടുത്ത് 'പടം കണ്ട് കൊണ്ടിരിക്കുകയാണ് സുരേഷേട്ടാ' എന്ന് പറഞ്ഞു.
എന്നാൽ അത് കേൾക്കാനായിരുന്നില്ല ആ കാൾ. 'സന്ദീപ്, നന്ദനയെ രണ്ടാം തീയതി തിരുവനന്തപുരത്ത് എത്തിക്കാൻ കഴിയുമോ എന്ന് ചോദിക്കൂ, അന്ന് ആ മെഷീൻ നൽകാൻ ഞാൻ ഡോക്ടറോട് സംസാരിച്ചിട്ടുണ്ട്' 'ഇപ്പോ അറിയിക്കാം സുരേഷേട്ടാ' ഞാൻ ഫോൺ കട്ട് ചെയ്തു.
നന്ദന..കൽപ്പറ്റ കോട്ടത്തറയിലെ ഓട്ടോ ഡ്രൈവറായ മനോജന്റെയും അനുപമയുടെയും മക. ടൈപ്പ് വൺ പ്രമേഹ ബാധിതയായ കുട്ടിയാണ് നന്ദന. ദിവസേന അഞ്ചും ആറും തവണ ശരീരത്തിൽ സൂചിയിറക്കി ഷുഗർ ലെവൽ പരിശോധിക്കേണ്ടി വരുന്ന ഹതഭാഗ്യയായ കുട്ടി. ഈ ദുരവസ്ഥക്ക് പരിഹാരമായി ഇൻസുലിൻ പമ്പ് എന്ന ഉപകരണം നന്ദനയുടെ ശരീരത്തിൽ ഘടിപ്പിച്ചാൽ ആ കുടുംബത്തിന് സമാധാനമായി ജീവിക്കാൻ കഴിയും. പാർലമെന്റ് അംഗമായിരിക്കെ ടൈപ്പ് വൺ പ്രമേഹ ബാധിതരായ കുഞ്ഞുങ്ങളുടെ അവസ്ഥ സുരേഷ് ഗോപി സഭയിൽ അവതരിപ്പിച്ചിരുന്നു.
വയനാട് സന്ദർശനത്തിനിടെ നന്ദനയെയും എടുത്ത് കാണാൻ വന്ന രക്ഷിതാക്കളുടെ കണ്ണീർ കണ്ട് സുരേഷ് ഗോപി വാക്ക് കൊടുത്തു. 'നന്ദനയ്ക്ക് ഇൻസുലിൻ പമ്പ് ഞാൻ നൽകാം'. ഇൻസുലിൻ പമ്പ് എന്നല്ല automated insulin delivery system എന്നാണ് അതിന്റെ പേര്. ആറ് ലക്ഷം രൂപയാണ് വില. ആ തുക പൂർണമായും സുരേഷ് ഗോപി എന്ന മനുഷ്യ സ്‌നേഹി വഹിക്കും.
തീയേറ്ററിൽ ഇരുന്ന് തന്നെ നന്ദനയെ ഫോൺ ചെയ്തു. ഓഗസ്റ്റ് 2ന് നന്ദനയും കുടുംബവും തിരുവനന്തപുരത്ത് എത്തും. ഡോ. ജ്യോതിദേവ് കേശവദേവിന്റെ മേൽനോട്ടത്തിൽ നന്ദനയുടെ ജീവൻ രക്ഷാ ഉപകരണം സ്ഥാപിക്കും. സ്‌ക്രീനിൽ മക്കളുടെ ജീവൻ രക്ഷിക്കാൻ പാപ്പൻ നിറഞ്ഞാടുമ്പോൾ അതേസമയം യഥാർത്ഥ ജീവിതത്തിൽ ഒരു കുഞ്ഞുമോളുടെ ജീവൻ രക്ഷിക്കാൻ സൂപ്പർ സ്റ്റാർ സുരേഷ് ഗോപി നടത്തുന്ന ഇടപെടലിൽ നിമിത്തമാകാൻ കഴിഞ്ഞതിന്റെ ചാരിതാർഥ്യത്തിലായിരുന്നു ഞാൻ. അതുകൊണ്ട് ഇത് പാപ്പന്റെ റിവ്യൂ അല്ല, സുരേഷ് ഗോപി എന്ന മനുഷ്യസ്നേഹിയുടെ റിവ്യൂ ആണ്..
