കെന്റക്കി: സിസ്റ്റേഴ്സ് ഓഫ് ചാരിറ്റി ഓഫ് നസറത്തിന്റെ പുതിയ മദർ ജനറാൾ (പ്രസിഡന്റ്) ആയി സംഗീത അയിത്തമറ്റത്തിൽ തെരഞ്ഞെടുക്കപ്പെട്ടു. അസിസ്റ്റന്റ് ജനറാളുമാരായി സി. ജാക്വി ജേസു, സി. അഡലിൻ ഫെഹ്രിബിച്ച് എന്നിവരേയും തെരഞ്ഞെടുത്തു.

സി. സംഗീത അയിത്തമറ്റം എസ്.സി.എൻ സഭയുടെ ആദ്യത്തെ മലയാളി മദർ ജനറാളാണ്. തലശേരി അതിരൂപതയിലെ ആലക്കോട്, പരപ്പ ഇടവകാംഗമാണ്.

2018 സെപ്റ്റംബർ ഒന്നാംതീയതി സി. സംഗീതയുടെ നേതൃത്വത്തിലുള്ള പുതിയ കൗൺസിൽ ചുമതലയേറ്റു. 1812-ൽ അമേരിക്കയിലെ കെന്റക്കിയിൽ സ്ഥാപിതമായ സന്യാസസഭയാണ് സിസ്റ്റേഴ്സ് ഓഫ് ചാരിറ്റി ഓഫ് നസറത്ത്.

അമേരിക്ക, യൂറോപ്പ്, ആഫ്രിക്ക, ഏഷ്യ, ഇന്ത്യ എന്നിവടങ്ങളിൽ വിദ്യാഭ്യാസം, ആശുപത്രികൾ, സാമൂഹിക പ്രവർത്തനം എന്നീ മേഖലകളിൽ സഭ സേവനം ചെയ്യുന്നു. അമേരിക്കയിലെ 20 സംസ്ഥാനങ്ങളിൽ സിസ്റ്റേഴ്സ് ഓഫ് നസറത്തിന്റെ സേവനം ലഭ്യമാണ്. കെന്റക്കിയിലുള്ള സ്പാൽഡിങ്ങ് യൂണിവേഴ്സിറ്റി സഭയുടേതാണ്.

ഇന്ത്യയിൽ കേരളം ഉൾപ്പടെ വിവിധ സംസ്ഥാനങ്ങളിലും സഭാംഗങ്ങൾ സേവനം ചെയ്യുന്നു. ആലക്കോട്, പരപ്പ അയിത്തമറ്റത്തിൽ പരേതരായ മാത്യുവിന്റേയും മേരിയുടേയും മകളാണ് സി. സംഗീത. അഞ്ച് സഹോദരന്മാരും, അഞ്ച് സഹോദരിമാരും ഉണ്ട്.

ബിജു ആൻഡ് പ്രിൻസി ആലുംമൂട്ടിൽ ലോസ്ആഞ്ചലസ്, സി. എൽസ കോയിക്കൽ നോർത്ത് കരോളിന, ഫാ. ജോസ് കോയിക്കൽ വൈസ് പ്രൊവിൻഷ്യാൾ ഡോൺബോസ്‌കോ ബാംഗ്ലൂർ എന്നിവർ സഹോദര മക്കളാണ്.ജോർജുകുട്ടി പുല്ലാപ്പള്ളിൽ അറിയിച്ചതാണിത്.