കേരളമെന്ന മരണവീട്ടിലെ ജനങ്ങൾക്ക് തെറ്റായ സന്ദേശം നൽകുന്ന ആഘോഷം; കോവിഡ് പ്രോട്ടോക്കോളും ട്രിപ്പിൾ ലോക്ക്ഡൗണും നിലനിൽക്കേയുള്ള സത്യപ്രതിജ്ഞ ചടങ്ങിനെതിരെ അങ്കമാലി എറണാകുളം അതിരൂപത

കൊച്ചി: കോവിഡ് പ്രോട്ടോക്കോളും ട്രിപ്പിൾ ലോക്ക്ഡൗണും നിലനിൽക്കേ അഞ്ഞൂറിലേറെ പേരെ പങ്കെടുപ്പിച്ചുള്ള പിണറായി സർക്കാരിന്റെ സത്യപ്രതിജ്ഞയെ വിമർശിച്ച് എറണാകുളം അങ്കമാലി അതിരൂപത മുഖപത്രം സത്യദീപം.

രാജ്ഭവനിലെ ലളിതമായ ചടങ്ങിൽ അത്യാവശ്യം ആളുകളെ മാത്രം പങ്കെടുപ്പിച്ച് സത്യപ്രതിജ്ഞ നടത്തുകയാണ് കേരളമെന്ന മരണവീടിന് നല്ലതെന്നാണ് മുഖപ്രസംഗത്തിലെ വിമർശനം.'ഇരട്ടനീതിയുടെ ഇളവുകൾ' എന്ന തലക്കെട്ടിലുള്ള മുഖപ്രസംഗത്തിൽ മുഖ്യമന്ത്രിയുടെ ന്യായീകരണം കൊവിഡിന് തിരിഞ്ഞോ എന്നും അതിരൂപത വിമർശിക്കുന്നു.

ലോക്ക്ഡൗണിൽ അകത്തിരിക്കാൻ നിർബന്ധിതരായ ജനങ്ങൾക്ക് തെറ്റായ സന്ദേശം നൽകുന്നതാണ് ഈ ആഘോഷമെന്നും മുഖപ്രസംഗം കുറ്റപ്പെടുത്തുന്നു. എൻ രമണ സുപ്രീംകോടതി ചീഫ് ജസ്റ്റിസായി അധികാരമേറ്റത് മുപ്പത് പേർ മാത്രം പങ്കെടുത്ത ചടങ്ങിലാണെന്നും അതിരൂപത ചൂണ്ടിക്കാട്ടുന്നു.

സാധാരണക്കാരുടെ മൃതസംസ്‌ക്കാര ശുശ്രൂഷയിൽ ഇരുപത് പേരെ കർശനമായി നിജപ്പെടുത്തുമ്പോൾ, വി ഐ പികളുടെ വിടവാങ്ങലിന് ആൾക്കൂട്ടമനുവദിക്കുന്ന നിലപാട് മാറ്റം നിലവാരമില്ലാത്തതാണ്. കോവിഡ് പതാക ഇപ്പോഴും ഉയരെപ്പറക്കുമ്പോൾ ഈ സത്യപ്രതിജ്ഞാഘോഷം അനൗചിത്യമാണെന്നും സത്യദീപം മുഖപ്രസംഗത്തിലൂടെ വിമർശിക്കുന്നു.