ദമ്മാം: മുൻ കേരള മുഖ്യമന്ത്രിയും, കൊണ്‌ഗ്രെസ്സ് നേതാവുമായ ശ്രീ ഉമ്മൻ ചാണ്ടിയുടെ നിര്യാണത്തിൽ നവയുഗം സാംസ്കാരികവേദി കേന്ദ്രകമ്മിറ്റി അനുശോചനം രേഖപ്പെടുത്തി.
എന്നും ജനങ്ങൾക്കിടയിൽ പ്രവർത്തിച്ച ജനകീയനായ രാഷ്ട്രീയപ്രവർത്തകനായിരുന്നു ശ്രീ ഉമ്മൻ ചാണ്ടി. ലാളിത്യവും, ആത്മാർത്ഥതയും കൈമുതലായ അദ്ദേഹത്തിന്റെ ഏറ്റവും വലിയ ശക്തി ജനപിന്തുണ തന്നെയായിരുന്നു. അമ്പതു വർഷത്തിലധികം പുതുപ്പള്ളി എന്ന മണ്ഡലത്തിൽ നിന്നും നിയമസഭാംഗമാകാൻ അദ്ദേഹത്തിന് കഴിഞ്ഞത് ആ ജനപിന്തുണ കൊണ്ടാണ്. മതേതര മൂല്യങ്ങളോട് പ്രതിബന്ധതയും, മനുഷ്യാവകാശങ്ങളോട് പ്രതിബദ്ധതയും പുലർത്തിയ അദ്ദേഹത്തിന്റെ മരണത്തോടെ, കേരളരാഷ്ട്രീയത്തിലെ മൂല്യബോധം നിറഞ്ഞ ഒരു കാലഘട്ടമാണ് വിട വാങ്ങുന്നത്.
ജനഹൃദയങ്ങളിൽ എന്നും അവശേഷിക്കുന്ന രാഷ്ട്രീയ ഓർമ്മകൾ അവശേഷിപ്പിച്ചിട്ടു വിട വാങ്ങിയ ഉമ്മൻ ചാണ്ടിയുടെ നിര്യാണം, കേരളരാഷ്ടീയത്തിൽ നികത്താനാകാത്ത വലിയൊരു വിടവ് സൃഷ്ടിക്കുമെന്ന് നവയുഗം കേന്ദ്രകമ്മിറ്റി പ്രസിഡന്റ് ജമാൽ വില്യാപ്പള്ളിയും, ജനറൽ സെക്രെട്ടറി എം എ വാഹിദും അനുശോചന സന്ദേശത്തിൽ പറഞ്ഞു.
