ന്യൂജേഴ്‌സി: ന്യൂജേഴ്‌സിയിലെ എസ്.ബി/അസംപ്ഷൻ അലുംമ്‌നി അസോസിയേഷനിലെ അംഗങ്ങൾ ഏപ്രിൽ 18-ന് ശനിയാഴ്ച സ്റ്റാറ്റൻഐലന്റിൽ കൂടിയ യോഗത്തിൽ അലുംമ്‌നി പുനഃസമാഗമവും കുടുംബ സംഗമവും 2015 സെപ്റ്റംബറിൽ നടത്താൻ തീരുമാനിച്ചു. തിരക്കുനിറഞ്ഞ ജീവിതത്തിലും മരിക്കാത്ത ഓർമ്മകൾ പങ്കിടാൻ ഒരുമിച്ചുകൂടിയവർ സ്വയം പരിചയപ്പെടുത്തുകയും, അമേരിക്കൻ ജീവിതത്തിൽ കഴിഞ്ഞുപോയ അനുഭവങ്ങൾ പങ്കുവെയ്ക്കുകയും ചെയ്തു. ന്യൂജേഴ്‌സിയിലുള്ള എസ്.ബി പൂർവ്വ വിദ്യാർത്ഥികളെ കണ്ടെത്തുന്നതിനു ഫേസ്‌ബുക്ക് പേജ് ഉണ്ടാക്കുകയും അതുവഴി ആശയവിനിമയം നടത്തി ഒരുമിപ്പിക്കാൻ ശ്രമിച്ച ഡൊമിനിക് കൈലാത്തിന്റെ പ്രയത്‌നങ്ങളെ എല്ലാവരും പ്രശംസിച്ചു.

എസ്.ബി കോളജ് യൂണിയൻ മുൻ ചെയർമാനും ട്രൈസ്റ്റേറ്റ് മേഖലയിൽ വ്യക്തമായ സാന്നിധ്യമുള്ള ഫാർമസികളുടെ ഉടമയുമായ റ്റോം പെരുമ്പായിൽ അലുംമ്‌നി അസോസിയേഷന്റെ എല്ലാ പ്രവർത്തനങ്ങൾക്കും പിന്തുണ വാഗ്ദാനം ചെയ്തു. അമേരിക്കൻ കെമിക്കൽ സൊസൈറ്റിയുടെ 2015-ലെ ഇൻഡസ്ട്രിയൽ കെമിസ്ട്രി അവാർഡിന് അർഹനായ ജെ.എം.സി.സി.റ്റിയുടെ റിസേർച്ച് ഡവലപ്‌മെന്റ് ആഗോള ഡയറക്ടറും എസ്.ബി കോളജ് പൂർവ്വ വിദ്യാർത്ഥിയുമായ തോമസ് കൊളക്കാട്ടിനെ അംഗങ്ങൾ അനുമോദിച്ചു.

ജെയിംസ് മുക്കാടന്റെ നേതൃത്വത്തിൽ കൂടിയ യോഗത്തിൽ സെപ്റ്റംബറിൽ നടത്താൻ നിശ്ചയിച്ച പൂർവ്വ വിദ്യാർത്ഥി സംഗമത്തിന് നേതൃത്വം നൽകാൻ ഡൊമിനിക് കൈലാത്ത്, റ്റോം പെരുമ്പായിൽ, പിന്റോ ചാക്കോ, തോമസ് ആലുംമൂട്ടിൽ, ജെയിംസ് മുക്കാടൻ, തോമസ് കൊളക്കാട്ട്, ട്രീസാ ജോൺ തിരുവാതുക്കൽ, റോസമ്മ മുക്കാടൻ എന്നിവരെ ചുമതലപ്പെടുത്തി. രാജശ്രീ പിന്റോ അറിയിച്ചതാണിത്.