വടക്കാങ്ങര ടാലന്റ് പബ്ലിക് സ്‌ക്കൂൾ വിദ്യാർത്ഥികളുടെ ശ്രദ്ധേയമായ ഹ്രസ്വ ചിത്രത്തിന് മാനേജ്‌മെന്റിന്റെ അംഗീകാരം
വടക്കാങ്ങര ടാലന്റ് പബ്ലിക് സ്‌കൂളിലെ വിദ്യാർത്ഥികളും മലയാളം അദ്ധ്യാപിക സഫ്ന ടീച്ചറും കൂടി ചേർന്ന് തയ്യാറാക്കിയ ' തെറ്റിൽ നിന്നും ശരിയിലേക്ക്' എന്ന ഹ്രസ്വ ചിത്രം തന്മയത്വമാർന്ന അവതരണം കൊണ്ടും സന്ദേശത്തിന്റെ പ്രാധാന്യം കൊണ്ടും ശ്രദ്ധേയമായി. യുട്യൂബിൽ അപ്ലോഡ് ചെയ്ത് ദിവസങ്ങൾക്കകം ആയിരക്കണക്കിനാളുകളാണ് ഈ ഹ്രസ്വചിത്രം കാണുകയും അഭിപ്രായം രേഖപ്പെടുത്തുകയും ചെയ്തത്.
കൂട്ടുകാരുടെ മനോഹരമായ വസ്തുക്കൾ സ്വന്തമാക്കണമെന്ന കൗതുകത്തിൽ നടത്തിയ ഒരു മോഷണം വളരെ മതൃകാപരമായി തിരുത്തുന്ന അദ്ധ്യാപികയും സഹപാഠികളുമാണ് ചിത്രം അടയാളപ്പെടുത്തത്. കൗമാരത്തിന്റെ കൗതുകത്തിൽ സുന്ദരമായ എന്തും സ്വന്തമാക്കണമെന്ന മോഹമുണ്ടാവുക സ്വാഭാവികമാണ്. എന്നാൽ താൻ ചെയ്ത ഒരു തെറ്റിന്റെ പേരിൽ തന്റെ സഹപാഠി ശിക്ഷിക്കപ്പെടുകയെന്നത് നിഷ്‌കളങ്കമായ ബാല്യത്തിന് സഹിക്കാനാവുന്നില്ല. അവിടെ കുറ്റമേറ്റ് പറഞ്ഞ് മാപ്പു ചോദിക്കാനും തന്റെ കൂട്ടുകാരന്റെ അഭിമാനം സംരക്ഷിക്കാനുമുള്ള ആ വിദ്യാർത്ഥിയുടെ വൈകാരിക പക്വതയാണ് ഈ ചിത്രത്തെ വ്യതിരിക്തമാക്കുന്നതെന്ന് നുസ്രത്തുൽ അനാം ട്രസ്റ്റ് ചെയർമാൻ അനസ് അബ്ദുൽ ഖാദർ അഭിപ്രായപ്പെട്ടു.
ചിത്രത്തിന്റെ സ്‌ക്രിപ്റ്റും കാമറയും എഡിറ്റിംഗും എല്ലാം വിദ്യാർത്ഥികളാണ് നിർവഹിച്ചത് എന്ന കാര്യം പ്രത്യേക പരാമർശമർഹിക്കുന്നു. ഓൺ ലൈൻ ക്ളാസുകൾ കുട്ടികളെ പാസീവ് വിനോദങ്ങൾക്കടിമപ്പെടുത്തുന്നുവെന്ന പരാതികൾക്കിടയിൽ സന്ദേശപ്രധാനമായ ഈ ചിത്രം വിദ്യാർത്ഥികളുടെ ക്രിയാത്മക പ്രവർത്തനത്തിന്റെ സാക്ഷ്യ പത്രമാണെന്ന് ചടങ്ങിൽ സംസാരിച്ചവർ പറഞ്ഞു.
ചടങ്ങിൽ സി. ഇ. ഒ. യാസിർ കരുവാട്ടിൽ, മാനേജർ ജൗഹറലി, വൈസ് പ്രിൻസിപ്പൽ ഫർസാന. പി. വി. മദ്രസ പ്രിൻസിപ്പൽ ജാബിർ കരുവാട്ടിൽ തുടങ്ങിയവർ സംബന്ധിച്ചു.
ഫാദിൽ അബ്ദുൽ റസാഖാണ് സംവിധായകൻ. ഹംദാൻ യാസർ കരുവാട്ടിൽ (എഡിറ്റർ), ഫാഹിം ജൗഹറലി ( നടൻ), മുഹമ്മദ് റോഷൻ, ജാസിം കെ. ( കാമറാമാൻ) സഫ്ന എം (മലയാളം അദ്ധ്യാപിക) എന്നിവരാണ് ചിത്രത്തിന് പിന്നിലെ പ്രധാന പ്രവർത്തകർ.
https://www.youtube.com/watch?v=DynnNGUUYXk
