റൊമാന്റിക് ഷൈൻ ടോം ചാക്കോ, ഒപ്പം അഹാനയും; പശ്ചാത്തല സംഗീതത്തിൽ വിസ്മയിപ്പിക്കാൻ ഗോവിന്ദ് വസന്തയും; പ്രതീക്ഷ നൽകി 'അടി' ട്രെയിലർ പുറത്ത്

ദുൽഖർ സൽമാന്റെ വേഫേറർ ഫിലിംസ് നിർമ്മിച്ച് ഷൈൻ ടോം ചാക്കോ, അഹാന കൃഷ്ണ എന്നിവർ പ്രധാന വേഷങ്ങളിൽ എത്തുന്ന ചിത്രം 'അടി'യുടെ ട്രെയിലർ പുറത്തുവിട്ടു. സജീവ് എന്ന കഥാപാത്രത്തെയാണ് ഷൈൻ ടോം അവതരിപ്പിക്കുന്നത്. ഗീതിക എന്നാണ് അഹാനയുടെ കഥാപാത്രത്തിന്റെ പേര്.

രജിസ്റ്റർ ഓഫീസിൽ വച്ചുനടക്കുന്ന ഇവരുടെ വിവാഹവും തുടർന്നുള്ള പ്രണയനിമിഷങ്ങളുമാണ് ട്രെയിലറിന്റെ തുടക്കത്തിൽ. പിന്നീട് 'അടി' എന്ന പേര് സൂചിപ്പിക്കുന്നതുപോലെ അപ്രതീക്ഷിത രംഗങ്ങൾ സംഭവിക്കും. സജീവിനെ ഒരു സംഘവും പിന്തുടരുന്നതും ഇവർക്കിടയിലെ പ്രശ്നങ്ങളുമാണ് ചിത്രത്തിലുള്ളത് എന്നാണ് ട്രെയിലറിൽ നിന്ന് വ്യക്തമാകുന്നത്. തന്റെ പ്രശ്നങ്ങൾ ഗീതികയിൽ നിന്ന് മറച്ചുവയ്ക്കുന്ന സജീവ് അത് സ്നേഹം കൊണ്ടാണെന്നാണ് ന്യായീകരിക്കുന്നത്.

'അടി' ഏപ്രിൽ 14ന് വിഷു റിലീസായി തിയേറ്ററുകളിലേക്കെത്തുകയാണ്. ലില്ലി, അന്വേഷണം എന്നീ ചിത്രങ്ങൾ ഒരുക്കിയ പ്രശോഭ് വിജയനാണ് ചിത്രത്തിന്റെ സംവിധാനം. ഇഷ്‌കിന്റെ തിരക്കഥാകൃത്ത് രതീഷ് രവിയുടേതാണ് തിരക്കഥ. ധ്രുവൻ, ബിറ്റോ ഡേവിസ്, ശ്രീകാന്ത് ദാസൻ എന്നിവർ മറ്റു പ്രധാന വേഷങ്ങളിലെത്തുന്നു.