വേഷപ്പകർച്ചകളിൽ അമ്പരിപ്പിക്കാൻ വീണ്ടും വിക്രം; തകർപ്പൻ പ്രകടനവുമായി റോഷൻ മാത്യുവും; 'കോബ്ര' ട്രെയിലർ പുറത്ത്

ചെന്നൈ: പല ഭാവങ്ങളിൽ വിക്രമിന്റെ പകർന്നാട്ടം. വേഷപ്പകർച്ചകളിൽ വിക്രം വിസ്മയിക്കും എന്ന് ഉറപ്പുനൽകി ഇതാ 'കോബ്ര'യുടെ ട്രെയിലർ എത്തിയിരിക്കുന്നു. മലയാളി താരം റോഷൻ മാത്യവും ചിത്രത്തിൽ ശ്രദ്ധ നേടും എന്ന് ട്രെയിലറിൽ നിന്ന് വ്യക്തമാകുന്നു. തമിഴകത്ത് വീണ്ടും വിക്രമിന്റെ ഒരു ചിത്രം അലയടിക്കാൻ പോകുന്നുവെന്ന കൃത്യമായ സൂചന നൽകുന്നതാണ് 'കോബ്ര'യുടെ ട്രെയിലർ.

ആർ അജയ് ജ്ഞാനമുത്തു സംവിധാനം ചെയ്യുന്ന ചിത്രം ഓഗസ്റ്റ് 31ന് ആണ് റിലീസ് ചെയ്യുക.'കോബ്ര' എന്ന ചിത്രത്തിന്റെ സംഗീത സംവിധാനം നിർവഹിക്കുന്നത് എ ആർ റഹ്‌മാൻ ആണ്. വിക്രം നായകനാകുന്ന ചിത്രത്തിന്റെ ഛായാഗ്രഹണം ഹരീഷ് കണ്ണൻ ആണ്. 'കെജിഎഫി'ലൂടെ സുപരിചിതയായ ശ്രീനിധി ഷെട്ടി നായികയാവുന്ന ചിത്രത്തിൽ കെ എസ് രവികുമാർ, ആനന്ദ്‌രാജ്, റോബോ ശങ്കർ, മിയ ജോർജ്, മൃണാളിനീ രവി, മീനാക്ഷി ഗോവിന്ദ്‌രാജൻ തുടങ്ങിയവരും അഭിനയിക്കുന്നു.

'മഹാന്' ശേഷമെത്തുന്ന വിക്രം ചിത്രമാണ് 'കോബ്ര'. എന്നാൽ 'മഹാൻ' ആമസോൺ പ്രൈം വീഡിയോയുടെ ഡയറക്ട് റിലീസ് ആയിരുന്നു. കൊവിഡിനു മുൻപ് പ്രദർശനത്തിനെത്തിയ 'കദരം കൊണ്ടാൻ' ആണ് അവസാനം തിയറ്ററുകളിൽ റിലീസ് ചെയ്യപ്പെട്ട വിക്രം ചിത്രം. അതിനാൽ തന്നെ 'കോബ്ര' എന്ന ചിത്രത്തിൽ വിക്രമിന് വലിയ പ്രതീക്ഷകളാണ് ഉള്ളത്.

ആക്ഷൻ ത്രില്ലർ ഗണത്തിൽ പെടുന്ന ചിത്രമാണ് 'കോബ്ര'. വിക്രം ഏഴ് വ്യത്യസ്ത ഗെറ്റപ്പുകളിൽ പ്രത്യക്ഷപ്പെടുന്ന ചിത്രം ചിത്രീകരണസമയത്തേ വാർത്തകളിൽ ഇടംപിടിച്ചിരുന്നു. ക്രിക്കറ്റ് താരം ഇർഫാൻ പത്താന്റെ സിനിമാ അരങ്ങേറ്റമായ ചിത്രത്തിൽ മലയാളത്തിൽ നിന്ന് റോഷൻ മാത്യുവിന് പുറമേ മിയ ജോർജും സർജാനോ ഖാലിദും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. നേരത്തെ പുറത്തെത്തിയ ടീസറും ആരാധകപ്രീതി നേടിയിരുന്നു. 'ഇമൈക നൊടികൾ', 'ഡിമോണ്ടെ കോളനി' എന്നീ ശ്രദ്ധേയ ചിത്രങ്ങൾ ഒരുക്കിയ സംവിധായകനാണ് അജയ് ജ്ഞാനമുത്തു.