നാനിയും ഷൈൻ ടോം ചാക്കോയും നേർക്കുനേർ; ആഘോഷമാക്കാൻ 'ദസറ' വരുന്നു; ട്രെയിലർ പുറത്ത്

ഹൈദരാബാദ്: നാനി നായകനാകുന്ന ചിത്രമാണ് 'ദസറ'. തെന്നിന്ത്യൻ പ്രേക്ഷകരുടെ പ്രിയപ്പെട്ട താരങ്ങളിൽ ഒരാളായ കീർത്തി സുരേഷാണ് 'ദസറ'യിലെ നായിക. മലയാളി നടൻ ഷൈൻ ടോം ചാക്കോയും പ്രധാന വേഷത്തിലുണ്ട്. നാനിയുടെ 'ദസറ'യുടെ ട്രെയിലർ പുറത്തുവിട്ടിരിക്കുകയാണ്.

നാനി ആടിത്തിമിർക്കുന്ന ചിത്രമായിരിക്കും 'ദസറ'. വെന്നെല' എന്ന കഥാപാത്രമായിട്ടാണ് ചിത്രത്തിൽ എത്തുന്നത്. ശ്രീകാന്ത ഒഡേല ആണ് ചിത്രം സംവിധാനം ചെയ്യുന്നത്. സന്തോഷ് നാരായണനാണ് ചിത്രത്തിന്റെ സംഗീത സംവിധാനം നിർവഹിക്കുന്നത്. നവിൻ നൂലി ചിത്രത്തിന്റെ ചിത്രസംയോജനം നിർവഹിക്കുന്നു. സത്യൻ സൂര്യൻ ഐഎസ്‌സി ഛായാഗ്രാഹണം നിർവഹിക്കുന്നു. അവിനാശ് കൊല്ലയാണ് ചിത്രത്തിന്റെ ആർട്.

കീർത്തി സുരേഷ് നായികയായി ഒട്ടേറെ ചിത്രങ്ങൾ വിവിധ ഭാഷകളിൽ പ്രഖ്യാപിച്ചിട്ടുണ്ട്. തമിഴിൽ കീർത്തി സുരേഷ് നായികയാകുന്ന പുതിയ സിനിമ 'സൈറൺ' ആണ്. ആന്റണി ഭാഗ്യരാജ് ആണ് ചിത്രം സംവിധാനം ചെയ്യുന്നത്. ജയം രവി നായകനാകുന്ന ചിത്രത്തിന്റെ സംഗീത സംവിധാനം നിർവഹിക്കുന്നത് ജി വി പ്രകാശ് കുമാർ ആണ്. 'ഭോലാ ശങ്കർ' എന്ന തെലുങ്ക് ചിത്രത്തിലും ഒരു പ്രധാന വേഷത്തിൽ കീർത്തി സുരേഷ് അഭിനയിക്കുന്നു. ചിരഞ്ജീവിയുടെ സഹോദരിയായിട്ടാണ് കീർത്തി സുരേഷ് 'ഭോലാ ശങ്കറി'ൽ അഭിനയിക്കുന്നത്. മെഹർ രമേഷാണ് സംവിധാനം ചെയ്യുന്നത്.

'മാമന്നൻ' എന്ന തമിഴ് ചിത്രം കീർത്തി സുരേഷ് അഭിനയിച്ച് പൂർത്തിയായിരുന്നു. ഉദയ്‌നിധി സ്റ്റാലിനും ഫഹദും പ്രധാന കഥാപാത്രങ്ങളെ അവതരിപ്പിക്കുന്ന ചിത്രം മാരി സെൽവരാജ് ആണ് സംവിധാനം ചെയ്യുന്നത്. തേനി ഈശ്വർ ആണ് ഛായാഗ്രഹണം. 'പരിയേറും പെരുമാൾ', 'കർണൻ' എന്നീ ചിത്രങ്ങൾക്കു ശേഷം മാരി സെൽവരാജ് സംവിധാനം ചെയ്യുന്ന ചിത്രം കൂടിയാണ് 'മാമന്നൻ'.