പ്രണയ നായകനായി പെപ്പെ; 'ആനപ്പറമ്പിലെ വേൾഡ് കപ്പ്' പാട്ട് പുറത്തിറങ്ങി; ചിത്രമൊരുങ്ങുന്നത് ഫാന്റസി സ്പോർട്സ് ഡ്രാമ വിഭാഗമായി

ആന്റണി വർഗീസിനെ നായകനാക്കി നവാഗതനായ നിഖിൽ പ്രേംരാജ് രചനയും സംവിധാനവും നിർവ്വഹിച്ച 'ആനപ്പറമ്പിലെ വേൾഡ്കപ്പ്' എന്ന ചിത്രത്തിലെ ഗാനം പുറത്തെത്തി. കരിമിഴി പ്രാവേ എന്നാരംഭിക്കുന്ന ഗാനത്തിന് വരികൾ എഴുതിയിരിക്കുന്നത് ബി കെ ഹരിനാരായണൻ ആണ്. ജേക്‌സ് ബിജോയ് സംഗീതം പകർന്നിരിക്കുന്ന ഗാനം ആലപിച്ചിരിക്കുന്നത് കെ എസ് ഹരിശങ്കർ ആണ്.

ഫാന്റസി സ്പോർട്സ് ഡ്രാമയെന്ന് അണിയറക്കാർ വിശേഷിപ്പിച്ചിരിക്കുന്ന ചിത്രം ഫുട്‌ബോൾ പശ്ചാത്തലമാക്കിയുള്ള ഒരു ഫീൽ ഗുഡ് എന്റർടെയ്‌നർ ആയിരിക്കും. ഫുട്‌ബോൾ വേൾഡ്കപ്പിനെ വരവേൽക്കാൻ ഒരുങ്ങിയിരിക്കുന്ന ഉത്തരകേരളത്തിലെ ഒരു ഗ്രാമമാണ് ചിത്രത്തിന്റെ കഥാപശ്ചാത്തലം. കടുത്ത ഫുട്‌ബോൾ പ്രേമിയായ ഒൻപത് വയസ്സുകാരന്റെ ജീവിതത്തിലേക്ക് ഒരു അപ്രതീക്ഷിത അതിഥി കടന്നുവരുന്നതും തുടർന്ന് അവന്റെ ജീവിതത്തിലുണ്ടാവുന്ന മാറ്റങ്ങളുമാണ് ചിത്രത്തിന്റെ പ്ലോട്ട്. ടി ജി രവി, ബാലു വർഗീസ്, ലുക്മാൻ, ഐ എം വിജയൻ, ആദിൽ ഇബ്രാഹിം, നിഷാന്ത് സാഗർ, ജോപോൾ അഞ്ചേരി, ആസിഫ് സഹീർ, അർച്ചന വാസുദേവ്, ജെയ്‌സ് ജോസ്, ദിനേശ് മോഹൻ, ഡാനിഷ്, അമൽ, ബാസിത്ത്, ശിവപ്രസാദ്, റിത്വിക്, കാശിനാഥ്, ഇമ്മാനുവൽ തുടങ്ങിയവർ മറ്റു കഥാപാത്രങ്ങളെ അവതരിപ്പിക്കുന്നു.

അച്ചാപ്പു മൂവി മാജിക്, മാസ് മേഡിയ പ്രൊഡക്ഷൻ എന്നീ ബാനറുകളിൽ ഫൈസൽ ലത്തീഫ്, സ്റ്റാൻലി സി എസ് എന്നിവരാണ് നിർമ്മാണം. സഹ നിർമ്മാണം ഷോണി സ്റ്റിജോ സെബാസ്റ്റ്യൻ, ഛായാഗ്രഹണം ഫായിസ് സിദ്ദിഖ്, സംഗീതവും പശ്ചാത്തല സംഗീതവും ജേക്‌സ് ബിജോയ്, എഡിറ്റിങ് നൗഫൽ അബ്ദുള്ള, ജിത്ത് ജോഷി, പ്രൊഡക്ഷൻ ഡിസൈനർ ബാദുഷ, പ്രൊജക്റ്റ് കോഡിനേറ്റർ അനൂട്ടൻ വർഗീസ്, അഡീഷണൽ സോംഗ് ഹിഷാം അബ്ദുൾ വഹാബ്, സൗണ്ട് ഡിസൈൻ ശങ്കരൻ എ എസ്, കെ സി സിദ്ധാർഥൻ, സൗണ്ട് മിക്‌സ് വിഷ്ണു സുജാതൻ, ഡിഐ കളറിസ്റ്റ് ശ്രിക് വാര്യർ, വസ്ത്രാലങ്കാരം അരുൺ മനോഹർ, മേക്കപ്പ് ജിത്തു പയ്യന്നൂർ, ചീഫ് അസോസിയേറ്റ് ഡയറക്ടർ പ്രേംനാഥ്. നവംബർ 11 ന് ചിത്രം തിയറ്ററുകളിൽ എത്തും.