'മുണ്ടും ജുബ്ബയുമിട്ട് ഭാര്യയ്ക്കൊപ്പം നടക്കുന്ന ആ ബ്ലാക്ക് ആൻഡ് വൈറ്റ് ചിത്രം; ഒരുമിച്ചുള്ള യാത്ര തുടങ്ങിയിട്ട് 43 വർഷം' എന്ന അടിക്കുറിപ്പും; വിവാഹ വാർഷിക ദിനത്തിൽ ഭാര്യയ്‌ക്കൊപ്പമുള്ള പഴയ ചിത്രം പങ്കുവെച്ച് ജഗതി ശ്രീകുമാർ
തിരുവനന്തപുരം: വിവാഹ വാർഷിക ദിനത്തിൽ ഭാര്യ ശോഭയ്ക്കൊപ്പമുള്ള ഒരു ബ്ലാക്ക് ആൻഡ് വൈറ്റ് പങ്കുവെച്ച് നടൻ ജഗതി ശ്രീകുമാർ. 'ഒരുമിച്ചുള്ള യാത്ര തുടങ്ങിയിട്ട് ഇന്ന് 43 വർഷം' എന്ന അടിക്കുറിപ്പോടെയാണ് ചിത്രം ഫേസ്‌ബുക്കിൽ പങ്കുവെച്ചത്. മുണ്ടും ജുബ്ബയുമിട്ട് ഭാര്യക്കൊപ്പം നടന്നുവരുന്ന ബ്ലാക്ക് ആൻഡ് വൈറ്റ് ഫോട്ടോയാണ് ഷെയർ ചെയ്തിരിക്കുന്നത്. സാരിയാണ് ശോഭ ധരിച്ചിരിക്കുന്നത്.
വാഹനപകടത്തിൽ പരിക്കേറ്റതിനെ തുടർന്ന് വർഷങ്ങളോളം സിനിമയിൽ നിന്നു വിട്ടുനിന്ന ജഗതി സിബിഐ 5 എന്ന ചിത്രത്തിലൂടെയാണ് തിരിച്ചുവരവ് നടത്തിയത്. 2012ൽ മലപ്പുറം തേഞ്ഞിപ്പലത്തുണ്ടായ കാർ അപകടത്തിലാണ് ജഗതിക്ക് ഗുരുതര പരിക്കേറ്റത്.അപകടത്തിൽ ഗുരുതരമായി പരിക്കേറ്റ ജഗതി വർഷങ്ങൾ നീണ്ട ചികിത്സയിലൂടെയാണ് ജീവിതത്തിലേക്ക് മടങ്ങിവന്നത്.
ആദ്യം നടി മല്ലികയെ ആയിരുന്നു വിവാഹം കഴിച്ചതെങ്കിലും പിന്നീട് ബന്ധം വേർപിരിയുകയായിരുന്നു. പിന്നീടാണ് ശോഭയെ വിവാഹം കഴിക്കുന്നത്. ഈ ബന്ധത്തിൽ പാർവതി, രാജ്കുമാർ എന്നീ രണ്ടു മക്കളുമുണ്ട്.
