സിനിമാകൊട്ടകയും കവിഞ്ഞൊരുപാട് ദൂരം ഒഴുകിയ സ്‌നേഹം കണ്ടു; പ്രേക്ഷകർക്ക് നന്ദി പറഞ്ഞ് ലിജോ ജോസ് പെല്ലിശ്ശേരി ; ഐഎഫ്എഫ്‌കെയിൽ മികച്ച അഭിപ്രായം നേടി 'നൻപകൽ നേരത്ത് മയക്കം'
തിരുവനന്തപുരം : ലിജോ ജോസ് പെല്ലിശ്ശേരിയുടെ ഏറ്റവും പുതിയ ചിത്രമായ 'നൻപകൽ നേരത്ത് മയക്കം' കഴിഞ്ഞ ദിവസം കേരള രാജ്യാന്തര ചലച്ചിത്ര മേളയിൽ പ്രദർശിപ്പിച്ചിരുന്നു. മമ്മൂട്ടി നായകനായ ചിത്രം കാണാൻ തിയറ്റർ കവിഞ്ഞും ആൾക്കാരുണ്ടായിരുന്നു. ചിത്രത്തിന് ലഭിച്ച സ്വീകാര്യതയിൽ നന്ദി പറഞ്ഞ് രംഗത്ത് എത്തിയിരിക്കുകയാണ് ലിജോ ജോസ് പെല്ലിശ്ശേരി.
'നൻപകൽ നേരത്ത്' സിനിമാകൊട്ടകയും കവിഞ്ഞൊരുപാട് ദൂരം ഒഴുകിയ നിങ്ങളുടെ സ്‌നേഹം കണ്ടു, ഒരുപാടൊരുപാട് നന്ദി എന്നാണ് ലിജോ ജോസ് പെല്ലിശ്ശേരി ഫേസ്‌ബുക്കിൽ കുറിച്ചിരിക്കുന്നത്.
പ്രേക്ഷക പങ്കാളിത്തം കൊണ്ട് അമ്പരിപ്പിക്കുന്ന കാഴ്ചയായിരുന്നു 'നൻപകൽ നേരത്ത് മയക്ക'ത്തിന്റെ വേൾഡ് പ്രീമിയർ. അഭൂതപൂർവമായ തിക്കും തിരക്കുമാണ് ചിത്രം കാണാൻ ഉണ്ടായത്. കേരള രാജ്യാന്തര ചലച്ചിത്ര മേളയിലെ മത്സരവിഭാഗത്തിലായിരുന്നു ചിത്രം പ്രദർശിപ്പിച്ചത്. ചിത്രം പ്രദർശിപ്പിച്ച് കഴിഞ്ഞപ്പോൾ ലിജോ ജോസ് പെല്ലിശ്ശേരിയുടെ വാക്കുകൾ ആരവത്തോടെയായിരുന്നു പ്രേക്ഷകർ ഏറ്റെടുത്തത്.
'നൻപകൽ നേരത്ത് മയക്കം' തിയറ്ററിൽ തന്നെ റിലീസ് ചെയ്യണമെന്ന് പ്രേക്ഷകർ ലിജോ ജോസ് പെല്ലിശ്ശേരിയോട് ആവശ്യപ്പെട്ടു. കാത്തുനിന്നഎല്ലാ പ്രേക്ഷകർക്കും സിനിമ കാണാനാകും വിധം ഐഎഫ്എഫ്‌കെയിലെ പ്രദർശനങ്ങളുടെ എണ്ണം വർദ്ധിപ്പിക്കണം എന്നും പ്രേക്ഷകരിൽ നിന്ന് ആവശ്യമുണ്ടായി. മമ്മൂട്ടിയോട് ഇക്കാര്യം സംസാരിക്കാമെന്ന് ലിജോ ജോസ് പെല്ലിശ്ശേരി ഉറപ്പുനൽകുകയും ചെയ്തു.
മമ്മൂട്ടി കമ്പനിയുടെ ബാനറിലുള്ള ആദ്യത്തെ ചിത്രമാണ് 'നൻപകൽ നേരത്ത് മയക്കം'. മമ്മൂട്ടിക്ക് പുറമേ അശോകൻ, രമ്യാ പാണ്ഡ്യൻ, കൈനകരി തങ്കരാജ്, ടി സുരേഷ് ബാബു, ചേതൻ ജയലാൽ, അശ്വത് അശോക്കുമാർ, സഞ്ജന ദിപു തുടങ്ങിയവരും ചിത്രത്തിൽ വേഷമിട്ടു. തേനി ഈശ്വർ ആണ് ചിത്രത്തിന്റെ ഛായാഗ്രാഹണം നിർവഹിച്ചത്. എസ് ഹരീഷിന്റേതാണ് തിരക്കഥ.
ലിജോ ജോസിന്റെ സംവിധാനത്തിലുള്ള പുതിയ ചിത്രത്തിൽ നായകൻ മോഹൻലാലാണ്. ജോൺ ആൻഡ് മേരി ക്രിയേറ്റീവ്, മാക്‌സ് ലാബ്‌സ്, സെഞ്ച്വറി ഫിലിംസ് ചിത്രം നിർമ്മിക്കുന്നത്. 'ചെമ്പോത്ത് സൈമൺ' എന്ന കഥാപാത്രത്തെയാണ് മോഹൻലാൽ അവതരിപ്പിക്കുക എന്നാണ് സാമൂഹ്യമാധ്യമങ്ങളിലെ പ്രചരണം. പീരിയഡ് ഡ്രാമയായി ഒരുങ്ങുന്ന ചിത്രത്തിൽ മോഹൻലാൽ ഗുസ്തിക്കാരനായാണ് എത്തുകയെന്നും റിപ്പോർട്ടുകൾ സൂചിപ്പിക്കുന്നു.
