കൊച്ചി: മോഹൻലാൽ കൂടുതൽ കാമ്പുള്ള വേഷങ്ങൾ തിരഞ്ഞെടുക്കണമെന്ന മുറവിളി ആരാധകർ മുഴക്കാൻ തുടങ്ങിയിട്ട് നാളേറെയായി. എന്തുകൊണ്ട് പുതിയ യുവ സംവിധായകർക്ക് താരം അവസരം കൊടുക്കുന്നില്ലെന്ന ചോദ്യവും ഉയർന്നുവന്നിരുന്നു. മലയാള സിനിമയിലെ മാസ്റ്റർ ക്രാഫ്റ്റ്‌സ്മാനായ ലിജോ ജോസ് പല്ലിശേരിക്കൊപ്പം മോഹൻലാൽ സിനിമ ചെയ്യുന്നു.

ലിജോ ജോസ് പെല്ലിശ്ശരിയുടെ സംവിധാനത്തിൽ മോഹൻലാൽ കേന്ദ്രകഥാപാത്രമായി വരുന്ന ചിത്രവുമായി ബന്ധപ്പെട്ട പോസ്റ്റർ സോഷ്യൽ മീഡിയയിൽ വൈറൽ ആയിരിക്കുകയാണ്. ജോൺ ആൻഡ് മേരി ക്രിയേറ്റീവിന്റെ ബാനറിൽ ഷിബു ബേബി ജോണാണ് ചിത്രം നിർമ്മിക്കുന്നത്. ജോൺ ആൻഡ് മേരി ക്രിയേറ്റീവിന്റെ ആദ്യ ചിത്രത്തിലെ കോമ്പോ ആരാണെന്ന് പ്രവചിക്കാമോ എന്ന കുറിപ്പോടുകൂടിയാണ് ഇവർ പോസ്റ്റർ പങ്കുവച്ചിരിക്കുന്നത്. മോഹൻലാലിന്റെ മീശയും ലിജോ ജോസ് പെല്ലിശേരിയുടെ ബാഗുമാണ് പുറത്ത് വിട്ട പോസ്റ്ററിലുള്ളത്.

പ്രതിഭയും പ്രതിഭാസവും ഒന്നാകാൻ തീരുമാനിച്ച നല്ല നാളേക്കായി ഞങ്ങൾ കൈകോർക്കുന്നു.John and Mary Creative ബാനറിന്റെ ആദ്യ സിനിമയുമായി ഞങ്ങൾ എത്തുന്നു. ഇന്ത്യൻ സിനിമ അത്ഭുതത്തോടെ കാത്തിരിക്കുന്ന ഈ കോമ്പോ ആരാണെന്ന് ഇനി നിങ്ങൾക്കും പ്രവചിക്കാം.നന്നായി കലക്കി ഒന്നാലോചിച്ച് ഉത്തരം പറയുന്നവർക്ക് ഒരു കിടിലം സർപ്രൈസ് കാത്തിരിക്കുന്നു..ഊഹാപോഹങ്ങളുടെ കെട്ടഴിക്കുമ്പോൾ ചിലപ്പോൾ നിങ്ങളുടെ ഉത്തരവും ശരിയായേക്കാം.

ബിഗ് ബജറ്റിൽ നിർമ്മിക്കുന്ന ചിത്രം പിരീഡ് സിനിമയായിരിക്കുമെന്നും മോഹൻലാൽ ചിത്രത്തിൽ ഗുസ്തിക്കാരനായിട്ടായിരിക്കും വേഷമിടുക എന്നതരത്തിലുള്ള വാർത്തകളാണ് ഇപ്പോൾ പുറത്ത് വരുന്നത്.പ്രമുഖ ട്രേഡ് അനലിസ്റ്റ് ശ്രീധർ പിള്ള 100ശതമാനം ഉറപ്പാണ് ഈ പ്രോജക്ട് എന്നും 2023 ജനുവരിയിൽ രാജസ്ഥാനിൽ വച്ച് ചിത്രീകരണം ആരംഭിക്കുമെന്നും ട്വീറ്റ് ചെയ്തിട്ടുണ്ട്.

മറുനാടന്‍ മലയാളി

    മറുനാടന്‍ മലയാളി ബ്യൂറോ