ശ്രീകൃഷ്ണനായി മഞ്ജു വാര്യരുടെ പകർന്നാട്ടം; മനംകവർന്ന് രാധേ ശ്യാം നൃത്തനാടകം; വൈറലായ ചിത്രങ്ങൾ കാണാം

തിരുവനന്തപുരം: മികച്ച നടി എന്ന നിലയിൽ മാത്രമല്ല നർത്തകിയായും ആരാധകരുടെ ഹൃദയം കീഴടക്കിയ താരമാണ് മഞ്ജു വാര്യർ. താരം സിനിമയിലേക്ക് തിരിച്ചെത്തിയതു തന്നെ നൃത്ത വേദിയിൽ സജീവമായിക്കൊണ്ടാണ്.ഇപ്പോൾ ശ്രീകൃഷ്ണ വേഷത്തിൽ വേദിയിലെത്തിയ താരത്തിന്റെ ചിത്രങ്ങളാണ് സോഷ്യൽ മീഡിയയിൽ വൈറലാവുന്നത്.

 

സൂര്യ ഫെസ്റ്റിവലിന്റെ സമാപനവേദിയിൽ കുച്ചിപ്പുടി നൃത്ത നാടകമാണ് മഞ്ജുവും സംഘവും അവതരിപ്പിച്ചത്. രാധേ ശ്യാം എന്ന നൃത്ത നാടകത്തിൽ നിന്നുള്ള ചിത്രങ്ങൾ താരം തന്നെയാണ് സോഷ്യൽ മീഡിയയിൽ പങ്കുവച്ചത്. കലാക്ഷേത്ര പൊന്നിയാണ് രാധയായി എത്തിയത്.

പാദം സ്‌കൂൾ ഓഫ് ഡാൻസ് അവതരിപ്പിച്ച നൃത്തനാടകത്തിന്റെ ആശയവും നൃത്തസംവിധാനവും ഗീത പത്മകുമാറിന്റേത് ആയിരുന്നു. അർജുൻ ഭരദ്വാജിന്റെ വരികൾക്ക് ഭാഗ്യലക്ഷ്മി ഗുരുവായൂർ സംഗീതം പകർന്ന പരിപാടിയുടെ മ്യൂസിക് പ്രൊഡക്ഷൻ രാമു രാജ് ആയിരുന്നു.

 

കഴിഞ്ഞ ദിവസമാണ് മഞ്ജുവിന്റെ പുതിയ ചിത്രം ആയിഷ റിലീസിന് എത്തിയത്. നവാഗതനായ ആമിർ പള്ളിക്കൽ ആണ് ചിത്രത്തിന്റെ സംവിധായകൻ. മികച്ച പ്രതികരണമാണ് ചിത്രത്തിന് ലഭിക്കുന്നത്.

നീണ്ട ഇടവേളയ്ക്ക് ശേഷം റാസൽ ഖൈമയിൽ ചിത്രീകരിക്കുന്ന മലയാള സിനിമയാണിത്. ഈ ചിത്രത്തിനുവേണ്ടി വേണ്ടി മഞ്ജു വാര്യർ അറബി ഭാഷ പഠിച്ചിരുന്നു. ചിത്രത്തിന്റെ രചന ആഷിഫ് കക്കോടിയാണ് നിർവഹിച്ചിരിക്കുന്നത്.