വിനീതിന്റെ കൈപിടിച്ച് ഹാളിലേക്ക്; മുൻപന്തയിൽ മോഹൻലാലിനരികത്തായി ഇരിപ്പിടം; പിന്നാലെ ലാലിനൊപ്പം തമാശകൾ പറഞ്ഞ് പൊട്ടിച്ചിരിച്ച് ശ്രീനിവാസൻ; യുവനിർമ്മാതാവിന്റെ വിവാഹത്തിൽ കുടുംബസമേതം താരങ്ങൾ; വൈറൽ വീഡിയോ

തിരുവനന്തപുരം: യുവ നിർമ്മാതാവ് വിശാഖ് സുബ്രഹ്മണ്യത്തിന്റെ വിവാഹത്തിൽ പങ്കെടുത്ത് താര കുടുംബങ്ങൾ. മോഹൻലാൽ, സുചിത്ര മോഹൻലാൽ, കല്യാണി പ്രിയദർശൻ, ശ്രീനിവാസൻ, വിമല ശ്രീനിവാസൻ, മക്കളായ വിനീത്, ധ്യാൻ, അജു വർഗീസ്, എംജി ശ്രീകുമാർ, വിധു പ്രതാപ്, റഹ്മാൻ ഉൾപ്പടെ നിരവധി പേർ സകുടുംബമാണ് വിവാഹത്തിൽ പങ്കെടുത്തത്.

നിരവധി താരങ്ങളാൽ സമ്പന്നമണെങ്കിലും ചടങ്ങിനെ ശ്രദ്ധേയമാക്കിയത് ശ്രീനിവാസന്റെയും മോഹൻലാലിന്റെയും കൂടിക്കാഴ്‌ച്ചയായിരുന്നു.അവശതകളെ മാറ്റിവെച്ച്, വിനീതിന്റെ കയ്യും പിടിച്ച് ശ്രീനിവാസൻ വിവാഹ വേദിയിൽ എത്തിയതിന്റെ വീഡിയോകൾ സമൂഹമാധ്യമങ്ങളിൽ ശ്രദ്ധനേടുകയാണ്.

ഹാളിലേക്കെത്തിയ ശ്രീനിവാസൻ മോഹൻലാലിന് തൊട്ടടുത്തായി ഇരിക്കുകയും തമാശകൾ പങ്കുവെക്കുകയും ചെയ്തു.നിർമ്മാതാവ് സുരേഷ് കുമാറും ഇവർക്കരികിൽ ഉ്ണ്ടായിരുന്നു.

 

ഈ വർഷം ഓഗസ്റ്റിലാണ് വിശാഖിന്റെ വിവാഹ നിശ്ചയം നടന്നത്.സംരംഭകയായ അദ്വിത ശ്രീകാന്ത് ആണ് വധു. ഒരുകാലത്ത് മലയാള സിനിമയിലെ പ്രമുഖ നിർമ്മാണ കമ്പനിയായിരുന്ന മെറിലാൻഡ് സ്റ്റുഡിയോ ഉടമ പി സുബ്രഹ്മണ്യത്തിന്റെ ചെറുമകനാണ് വിശാഖ് സുബ്രഹ്മണ്യം. ധ്യാൻ ശ്രീനിവാസൻ സംവിധായകനായി അരങ്ങേറ്റം കുറിച്ച 'ലവ് ആക്ഷൻ ഡ്രാമ'യിലൂടെയാണ് വിശാഖ് സുബ്രഹ്മണ്യം ചലച്ചിത്ര നിർമ്മാണത്തിലേക്ക് എത്തിയത്.

 

പിന്നീട് സാജൻ ബേക്കറി സിൻസ് 1962 എന്ന ചിത്രവും ഇതേ ബാനർ നിർമ്മിച്ചു. വിനീത് ശ്രീനിവാസൻ സംവിധാനം ചെയ്ത് പ്രണവ് മോഹൻലാൽ, കല്യാണി പ്രിയദർശൻ, ദർശന രാജേന്ദ്രൻ എന്നിവർ കേന്ദ്രകഥാപാത്രങ്ങളായ ഹൃദയമാണ് വിശാഖിനെ ഹിറ്റ് നിർമ്മാതാക്കളുടെ പട്ടികയിൽ എത്തിച്ചത്.